بەرپرسی ئۆفیسی کۆمسیۆن لە دھۆک: بەھیچ شێوەیەک ھەڕه‌شەمان لێ نەکراوە و کارەکان زۆر بە ئارامی بەرێوە دەچن
دھۆک-تایبەت بەKDP.info/ بەرپرسی ئۆفیسی دھۆکی کۆمسیۆنی باڵای سەربەخۆی ھەڵبژاردنەکانی عێراق ئاشکرایکرد، کاری جیاکردنەوەی دەنگەکان زۆر بە باشی بەڕێوەدچێت و ئەوەی ئۆپۆزسیۆنیش باسی لێوە دەکات کە ھەڕەشە لەوان کراوە دوورە لەراستی وھیچ بنەمایەکی نییە.
سەربەست مفتی بەرپرسی ئۆفیسی دھۆکی کۆمسیۆنی باڵای سەربەخۆی ھەڵبژاردنەکانی عێراق بەkdp.infoراگەیاند: کاری جیاکردنەوەی دەنگەکان زۆر بە ئارامی بەڕێوەدەچێت, رەنگە ئەمڕۆ کارەکانیان تەواو بێت و رەوانەی ھەولێری بکەن بۆ ئەوەی بەفڕۆکەیەکی تایبەت رەوانەی بەغدا بکرێت.
سەربەست مفتی گوتیشی: ئەو دەنگۆیانەی باس لەوە ده‌کەن بەھەمان شێوەی سلێمانی ھەڕەشە لەسەر بنکەکانی جیاکردنەوەی دەنگەکان ھەیە دوورە لە راستی و ھیچ بنەمایەکی نییە و کارەکانی ئێمە زۆر بەئارامی بەرێوە ده‌چێت.
سەبەرست مفتی راشیگەیاند: گومان لە ژمارەیەک سندوقی دەنگدان دەکرا کە ساختەکاری تێدا کرابێت، بەڵام کارمەندانی ئێمە سندوقەکانیان کرده‌وە،ھیچ کێشەیەکی نەبوو و جیاکراونەتەوە و ھەژمارکراون و ئێستاش ھیچ سندوقێکی سوریان نییە.
ناوبراو ئاماژەی بەوەشکرد، ئەمجارە زه‌حمەتە ئەنجامی بەرای رابگەینن و رەنگە لە سەره‌تای ھەفتەی داھاتوو ئەنجامی کۆتایی رابگەینن.
ئەمەش لەکاتێکدایە لایەنە ئۆپۆزسیۆنەکان لەکۆنگرەیەکی رۆژنامەوانیدا لەشاری سلێمانی رایانگەیاند: بەھەمان شێوەی سلێمانی لە پارێزگای دھۆکیش فشار لەسەر بنکەکانی دەنگدان ھەیە بۆ ئەوەی گۆڕانکاری لە ئەنجامی ھەڵبژاردن بکرێت، بەڵام کۆمسیۆن ئەمە بە درۆ و بێ بنەما وەسف دەکات.
