هەوڵی متمانە سەندنەوە لە حكوومەتەكەی عەلی زێدان دەدرێت

لیبیا/KDP.info- پەرلەمانتارانی لیبیا بۆ سەندنەوەی متمانە لە حكوومەتی عەلی زێدان ئیمزا كۆدەكەنەوە. لەمبارەیەوە محەمەد سەفوان سەرۆكی حزبی بنیاتنان و دادوەریی لە لیبیا بە رۆژنامەوانانی رایگەیاند كە بە مەبەستی سەندنەوەی متمانە لەكابینەی عەلی زێدان ئیمزای 100 پەرلەمانتاریان كۆكردۆتەوە. حزبی بنیاتنان و دادوەریی كە بە پێنج وەزیر بەشدارە لەكابینەی ئێستای حكوومەت، سەرۆكەكەی هەڕەشەی كردووە كە بەهۆی قەیرانی سیاسی لە وڵاتدا و كۆبوونەوەی سەرۆك وەزیران لەگەڵ عەبدولفەتاح سیسی، وەزیری بەرگریی میسر، لەكابینەی زێدان دەكشێنەوە. جێی باسە بە پێی یاسای ناوخۆی پەرلەمانی لیبیا بۆ ئەوەی حكوومەت هەڵوەشێتەوە پێویستی بە واژووی 120 پەرلەمانتار هەیە.