ئەردۆغان: ئەوەی لە دەستمان بێت جێبەجێی دەكەین
سان پترسبۆرگ-KDP.info/ لە میانەی بەشداری كردنی لە كۆبوونەوەی گرووپی G20 لە شاری سان پترسبۆرگی روسیادا سەرۆك وەزیری توركیا رەجەب تەیب ئەردۆغان بەشداری لە كۆنگرەیەكی رۆژنامەوانی كرد و باسی قۆناغی چارەسەری پرسی كورد و بارودۆخی سوریای كرد.
لەمبارەیەوە ماڵپەڕی خەبەرلەری توركی بڵاویكردەوە كە سەرۆك وەزیری توركیا رەجەب تەیب ئەردۆغان رایگەیاندووە كە لێدوانەكانی بەرپرسانی پەكەكە سەبارەت بە هەنگاو نەنانی حكوومەتی توركیا بۆ چارەسەری پرسی كورد و ئامادەكارییەكانی پەكەكە بۆ بەرگری كردن لە ئەگەری روودانی شەڕ ، هیچ جۆرە بنەمایەكیان نییە و حكوومەت بە هیچ شێوەیەك ئەو جۆرە لێدوانانە بە هەند وەرناگرێت ، چونكە ئەمجۆرە لێدوانانە بە هیچ شێوەیەك خزمەتی قۆناغی چارەسەریی ناكەن.
ئەردۆغان لە بەشێكی دیكەی وتەكانیدا ئاماژەی بەوە كردووە كە حكوومەتی توركیا بۆ چارەسەر كردنی پرسی كورددا بەرنامەكانی خۆی جێبەجێ دەكات و بۆ چارەسەری ئەو پرسە ئەوەی لە دەستی حكوومەت بێت جێبەجێی دەكات.
ئەردۆغان جەختی لە سەر ئەوە كردەوە كە هەر هەموو پێكهاتەكانی توركیا داوای ئاشتەوایی و تەبایی دەكەن و ئەوانە كە دەیانەوەێت ئەم قۆناغە تێكبدەن ناتوانن لە بەرانبەر میژوودا وەڵامیان هەبێت .
