25ماڵی دیکەی کوردی شەبەک لەترسی ھەرەشەی تیرۆرستان پارێزگای موسڵیان بەجێھێشت
موسڵ-تایبەت بەKDP.info/ئەمڕۆ لەشاری موسڵ 25ماڵی دیکەی کوردی شەبەک لەترسی ھەڕەشەی تیرۆرستان ئەو شارەیان بەجێھێشت و ئاواری ئەو شوێنانە بوونە کە لەژێر دەسەڵاتی ھێزەکانی پێشمەرگەدایە.
لەمبارەیەوە سەعید مەموزینی بەرپرسی راگەیاندنی لقی چواردەی پارتی دیموکراتی کوردستان لەپارێزگای موسڵ بە kdp.infoرایگەیاند: بەیانی ئەمڕۆ 25ماڵی کوردی شەبەک لە پارێزگای موسڵ کە ماوەیەکە لەلایەن تیرۆرستان ھەرەشەیان لێدەکرێت، ئەو پارێزگایەیان بەجێھێشت و ئاوارەی ئەو گوندانەی شەبەک بوونە کە لە ژێر دەسەڵاتی ھێزەکانی پێشمەرگە دانە.
سەعید مەموزینی گوتیشی: ژمارەیەکی زۆر کورد لە پارێزگای موسڵ ھەڕەشەیان لێکراوە، بۆیە چاوەڕوان دەکرێت ئەوانەش لەترسی ژیانی خۆیان ئەو شارە بەجێبێڵن و ئاوارەی ناوچە کوردییەکان بن.
مەموزینی رونیشیکردەوە، رەوشی ئەمنی شاری موسڵ رۆژ بەرۆژ بەرەوە خراپتر دەچێت و رۆژانە تەقینەوەی لێ ئەنجام دەدرێت و ژیانی خەڵکی ئەو شارە لە مەترسیدایە و ھێزە ئەمنییەکانیش توانای کۆنترۆڵکردنیان نییە.
