ساڵح موسلیم: بڕیارە ئەنجوومەنێکی کاتی لە رۆژئاوای کوردستان پێکبھێندرێت
رۆژئاوای کوردستان – KDP.info/ بەمەبەستی ئامادەکاری بۆ ئەنجامدانی ھەڵبژاردنێکی پەرلەمانی لە رۆژئاوای کوردستاندا بڕیارە ئەنجوومەنێکی کاتیی پێکبھێندرێت. ساڵح موسلیم ھاوسەرۆکی پارتی یەکێتی دیموکراتی پەیەدە کە پێری شەو لە رێگای فرۆکەخانەی هەوڵیرەوە سەردانی تورکیای کردووە رایگەیاند: وتوویژەکان لەبارەی ئەنجوومەنێکی کاتیی لە رۆژئاوای کوردستاندا دەستیپێکردووە و بۆ ئەو مەبەستە گفتوگۆ و راوێژ لەگەڵ لایەنە کوردییەکاندا دەکرێت. ھاوسەرۆکی پارتی یەکێتی دیموکراتی پەیەدە بۆ رۆژنامەی حەیات ئەوەشی خستەڕوو: کە ئەنجوومەنەکە لە 100-120 ئەندام پێکدێت و ھەر لایەنێکیش بە پێنج ئەندام بەشداردەبێ. ساڵح موسلیم ئەوەشی راگەیاند کە کاری ئەنجومەنە کاتییەکە بریتی دەبێت لە بەڕێوەبردنی کاروباری ھاووڵاتیان و دانانی یاسایەک بۆ ئەنجامدانی ھەڵبژاردنێکی پارلەمانی لە خۆرئاوای کوردستاندا. ھاوسەرۆکی پەیەدە جەختیشیکردەوە کە دوای ئەنجامدانی ھەڵبژاردن، ئەنجوومەنە کاتییەکە ھەڵدەوەشێندرێتەوە. پێشتریش زۆربەی لایەنەکانی کوردستانی لە رۆژائاوای کوردستان ئەوەیان رەتکردبۆوە کە لەلایەن پەیەدەوە راوێژیان پیکرابێت لەبارەی پیکهێنانی حکومەتێکی نێوەخۆی لە بەشەی کوردستاندا.
