لە سلێمان بەگ 14شوفێری بارھەڵگر لەلایەن گروپێکی تیرۆرستی دەکوژرێن
دوزخورماتوو- تایبەت بەKDP.info/ شەوی رابردوو لەنزیک ناحیەی سلێمان بەگ گروپێکی تیرۆرستی کەمینێک لە سەر رێگا دادەنێن وچواردە شوفێری بارھەڵگر دەستگیر دەکەن و دەیانکوژن.
لەمبارەیەوە محەمەد مەلا ئیسماعیل بەرپرسی ناوچەی پارتی دیموکراتی کوردستان لە دوزخورماتوو بەkdp.infoراگەیاند: شەوی رابردوو گروپێکی تیرۆرستی ھێرشیان بۆ سەر ناحیەی سلێمان بەگ کرودوە و توانیویانە ئەو ناحیە کۆنترۆڵ بکەن و لە ئەنجامی ئەو شەرەش تەنھا کەسێک برینداربووە.
محەمەد مەلا ئیسماعیل گوتیشی: ھەر شەوی رابردوو لەسەر رێگای کەرکووک_بەغدا و لەنزیک ناحیەی سلێمان بەگ ئەو گروپە تیرۆرستە کەمینێکیان داناوە و 14شوفێری بارھەڵگریان دەستگیرکردووە و کوشتویانە.
مەلا ئیسماعیل رونیشیکردەوە، ئەو شوفێرانە زۆرینەیان شیعە مەزھەبن و خەڵکی پارێزگاکانی بەغدا و ناسریەن.
بەرپرسی ناوچەی پارتی دیموکراتی کوردستان لە دوزخورماتوو ئاماژەی بەوەشکرد، ناحیەی سلێمان بەگ دانیشتوانەکەی سونەیە و کەم شەو ھەیە ئەم ناحیەیە لە دەست ھێزە ئەمنییەکان دابێت و بەردەوام لەدەست تیرۆرستان دایە و خەڵکەکەشی بێدەنگی دەنوێنن و ھێزە ئەمنییەکانیش ناتوانن ھاتوو چۆ بکەن.
ناوبراو ئاماژەی بەوەشکرد، ئێستە سلێمان بەگ کەوتۆتەوە دەست ھێزە ئەمنییەکان و شەرەکە کۆتایی پێھاتووە و رەوشەکە ئارام بۆتەوە.
