سەرۆكی هەرێمی كوردستان پێشوازی لە قوتابییە یەكەمەكانی پۆلی دوانزدەی ئامادەیی هەرێمی كوردستان دەكات
ئەمڕۆ چوارشەممە 24ـی 7ـی 2013 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە قوتابییە یەكەمەكانی سەر ئاستی هەرێمی كوردستان و پارێزگاكانی هەرێم لە ئەزموونە گشتییەكانی قۆناغی دوانزدەی بەشەكانی زانستی و وێژەیی و پیشەیی كرد.
لە دیدارێكدا بەڕێز سەرۆكی هەرێمی كوردستان وێڕای بەخێرهێنانی قوتابیانی پیرۆزبایی گەرمی لە قوتابییە یەكەمەكان و خانەوادەكانیان و گەلی كوردستان كرد و هیوای سەركەوتنی لە گشت قۆناغەكانی ژیانیاندا بۆ خواستن. سەرۆك بارزانی خۆشحاڵیی خۆشی نیشان دا بەوەی كە ئەمساڵ زۆربەی قوتابییە دەرچووە یەكەمەكانی قۆناغی دوانزدە كچن و بە بابەتێكی زۆر ئەرێنی وەسف كرد.
لە بەشێكی دیكەی قسەكانیدا سەرۆك بارزانی ئاماژەی بە قۆناغی خەبات و كۆڵنەدانی گەلی كوردستان لە ڕابردوودا كرد و هێمای بەوەدا كە ئەو بارودۆخە تازەیە و ئەو سەقامگیرییەی لە كوردستاندا هەیە بە زەحمەتێكی زۆرەوە هاتووەتە دی و قۆناغی ئاییندەش لەسەر شانی قوتابییە خۆشەویستەكانە كە دەبێ بە چەكی سەردەمیانەی زانست و فێربوون خزمەتی وڵاتەكەیان بكەن و بیپارێزن. سەرۆك بارزانی ئاماژەی بەوەشدا كە نابێ قوتابیان و گەنجەكان لە وڵاتی خۆیان داببڕن و ئینتیمایان بۆ خاك و نیشتیمان لاواز ببێت چونكە مرۆڤی بێ وڵات و بێ خاك كەسێكی بێ ناسنامەیە. سەرۆك بارزانی لە بەشێكی دیكەی وتەكانیدا باسی ئەوەی كرد كە ئێستاكە لە زۆر لاوە هەوڵ هەیە كە گەنجانی ئێمە لە وڵات و مێژوو و بەهاكانی داببڕێنن و ئینتیمای لاواز بكەن و ئەوە ئەركی قوتابیانە كە بە هۆشیاری و چەكی زانست و فێربوون ڕووبەڕووی ببنەوە. سەرۆك بارزانی ئامۆژگاریی حكوومەتیشی دا كە بە دەم هەموو داواكاری و پێداویستییەكانی قوتابیان بڕوات و پاڵپشتیی تەواوی خۆشی بۆ ئەو چینە زیندووەی كۆمەڵگە ڕاگەیاند.
لە بەشێكی دیكەی دیدارەكەدا دەرگەی گفتوگۆ و پرسیاری قوتابییە یەكەمەكانی هەرێمی كوردستان كرایەوە و قوتابیان تێبینی و سەرنجەكانیان بە سەرۆك بارزانی ڕاگەیاند و سوپاسی سەرۆك بارزانیان كرد بۆ ئەو پێشوازییە گەرمە و هەروەها ڕۆڵی بەڕێزیان لە بەرەو پێشبردنی هەرێم و دابینكردنی ئەو ئارامی و سەقامگیرییەی لە كوردستان هەیە و بووەتە مایەی سەركەوتنیان لە خوێندن. لە كۆتایی كۆبوونەوەكەدا قوتابییە یەكەمەكانی سەر ئاستی هەرێمی كوردستان و پارێزگاكانی هەرێم لە لایەن سەرۆك بارزانییەوە خەڵات كران.
