حەیدەر مولا: لێپرسینەوە لە عەلی ئەدیب تا ئێستاش كراوەیە

پاش ئەوەی لە نیسانی رابردوو لیستی عێراقییە داوایەكی رەسمی بە ئیمزای 80 پەرلەمانتار دایە سەرۆكایەتی ئەنجومەنی نوێنەرانی عێراق بۆ دیاریكردنی وادەیەك بۆ لێپرسینەوە لە عەلی ئەدیبی وەزیری خوێندنی بالا، دوێنی شەممە 23/6/2012 گوتەبێژی لیستی عێراقیە دووپاتی كردەوە كە لێپرسینەوە لە عەلی ئەدیب وەزیری خوێندنی باڵای عێراق تا ئێستاش لە ئارادایە.

حەیدەر مولا گوتەبێژی لیستی عێراقییە رایگەیاند: پرسی لێپرسینەوە لە عەلی ئەدیب وەزیری خوێندنی باڵا تا ئێستاش كراوەیە، بەتایبەتی دوای ئەوەی دادگای فیدراڵ بۆ بەرژەوەندیی ئێمە لە دژی داوای تێهەڵچوونەوە بە بڕیارەكە لەلایەن ئەدیبەوە، بڕیاری دا.

گوتیشی، ئەوەی ئەدیبی لە لێپرسینەوە رزگار كردووە پشووی وەرزی یاسادانانە و ئاماژەی كرد، لە ماوەی ئەم وەرزەی یاسادانان وادەی لێپرسینەوەی بۆ دادەنرێ.