خۆپیشاندانەكانی لیجە هیچ جۆرە پەیوەندییەكیان بە ئۆپەراسیونی دژی مادە هۆشبەرەكانەوە نەبووە
دیاربەكر- KDP.info / دوای روودانی رووداوەكەی لیجە لە دیاربەكر و لێدوانەكانی حكوومەتی توركیا سەبارەت بە هۆكاری خۆپیشاندانەكانی بەردەم قەرەقووڵەكەی لیجە، رێكخراوە مەدەنییەكانی شاری دیاربەكر پێكەوە دەستیان بە لێكۆڵینەوەیەك لە سەر چۆنیەتی خۆپێشاندانەكان و هۆكاری تەقە كردنەكە كردووە.
ماڵپەڕی دیاربەكر خەبەر بڵاویكردەوە كە رێكخراوە مەدەنییەكانی شاری دیاربەكر دوای یەك هەفتە لێكۆڵینەوە لە سەر ئەم رووداوە راپۆرتی خۆیانیان ئامادە كردووە و لەو راپۆرتەدا ئاماژە بەوە كراوە كە خۆپیشاندانەكانی ناوچەی لیجە هیچ جۆرە پەیوەندییەكیان بە ئۆپەراسیونەكانی دژی مادە هۆشبەرەكانەوە نەبووە و خۆپیشاندەرەكان تەنیا بە مەبەستی ئیدانەكردنی قەرەقووڵ و بنكەی نوێ سەربازی دەستیان بە خۆپیشاندان كردووە.
لە بەشێكی دیكەی راپۆرتی رێكخراوە مەدەنییەكاندا جەخت لە سەر ئەوە كراوەتەوە كە حكوومەتی توركیا بۆ ئەوەی لێكۆڵینەوە لە گەڵ هێزەكانی ژاندارمە نەكات و خۆپیشاندەرەكان تاوانبار بكات، رایگەیاندووە كە ئارمانجی خۆپیشاندەرەكان راگرتنی ئۆپەراسیونەكانی دژی مادە هۆشبەرەكان بووە، بەڵام ئەم ئیدیعایە دوورە لە راستی و چونكە خەڵك تەنیا بە مەبەستی ئیدانەكردنی دامەزراندنی قەرەقووڵ و بنكەی نوێی سەربازی دەستی بە خۆپیشاندان كردووە.
