ئیدریس باڵ: ئەگەری دامەزراندنی كوردستانی سەربەخۆ زۆر بەهێزە
ئەنقەرە- KDP.info/ ئەندام پەرلەمانی شاری كۆتاحیای توركیا دكتۆر ئیدریس باڵ رایگەیاند كە سەبارەت بە رووداوەكانی ئەم دوایەی توركیا راپۆرتێكی بەرفراوانی ئامادە كردووە و لە رۆژانی داهاتوودا ئەم راپۆرتە پێشكەشی سەرۆكی گشتی ئاكەپە و سەرۆك وەزیری توركیا رەجەب تەییب ئەردۆغان دەكات.
لەمبارەیەوە ماڵپەڕی خەبەر تورك بڵاویكردەوە كە پەرلەمانتاری شاری كۆتاحیای ئاكەپە سەبارەت بە قۆناغی چارەسەری پرسی كورد و پرۆسەی دیموكراتیزە كردنی توركیا و رووداوەكانی پاركی گەزی و لیجە راپۆرتێكی زۆر بەرفراوانی ئامادە كردووە و لە رۆژانی داهاتوودا ئەم راپۆرتە پێشكەشی سەرۆك وەزیری توركیا رەجەب تەییب ئەردۆغان دەكات.
ئیدریس باڵ لە بەشێك لە راپۆرتەكەی خۆیدا ئاماژەی بەوە كردووە كە ئەگەر قۆناغی چارەسەری و پرۆسەی دیموكراتیزەكردنی توركیا سەرنەكەوێت و لە چوارچێوەی توركیادا یەكسانی و هاووڵاتیی بوونی ئازاددا و دەستوورێكی نوێ ئامادە نەكرێت،ئەوا ئەگەری جیابوونەوەی كورد و دامەزراندنی كوردستانی سەربەخۆ دەبێتە ئەگەرێكی زۆر بەهێز.
