شەش مەه بورین هیشتا زیانڤیكەتیێن لەهیان نەهاتینە قەربوكرن
دێرەلوك-KDP.info/پشتی دروستبوونا لافا و له‌هییان ل مه‌ها ئێكا ڤێ سالێ و ده‌ربازبوونا نێزیكی 5 مه‌هان بسه‌ر دروستبوونا ئه‌ڤان روودانان، كو زیانێن ماددی یێن مه‌زن گه‌هاندبوونه،نێزیكی 100 وه‌لاتیێن ناوچه‌یا دێره‌لۆك، تا نها زیانڤێكه‌فتیێن ڤان له‌هییان لڤێ ناوچه‌یێ نه‌هاتینه قه‌ربووكرن، وه‌لاتیێن هان ژی داخوازا قه‌ره‌بووكرنێ ژ حوكمه‌تێ دكه‌ن، بۆ ڤێ مه‌ره‌مێ رۆژنامه‌یا وار بۆچوونا چه‌ند ژ ڤان وه‌لاتییان و لایه‌نێ په‌یوه‌دیدار ل حوكمه‌تێ وه‌رگرتییه.
(ئیسماعیل حه‌سه‌ن) یه‌ك ژ زیانڤێكه‌فتیێان، كو ئاكنجیێ سه‌نته‌رێ ناوچه‌یا دێره‌لۆكێ یه خۆیاكر، ل ده‌مێ چێبوونا له‌هییان، بیستانێ وی ب ئه‌گه‌رێ ڤان له‌هییان هه‌موو ژناڤچوویه و پیچ بوویه و زێده‌تر بۆ وار گۆت: پشتی ڤێ روودانێ ژی، وان هه‌ر ئێكسه‌ر سه‌ره‌دانا رێڤه‌به‌رییا ناحیا دێره‌لۆكێ كریه و پاشان ژی داخوازه‌ك بۆ مه‌ره‌ما قه‌ره‌بووكرنێ پێشكێشكریه، ب ژڤان بووین حكومه‌تا هه‌رێمێ قه‌ره‌بوویا زیانێن مه بكه‌ت، لێ مخابن تا نها چ به‌رسڤ لسه‌ر ڤێ داخوازێ نینه.
هه‌ر لدۆر نه قه‌ره‌بووكرنا زیانڤێكه‌فتیێن له‌هییان ل سنۆرێ ناوچه‌یا دێره‌لۆك، (به‌همه‌ن ئه‌حمه‌د)رێڤه‌به‌رێ ناحیا دێۆه‌لۆك خۆیاكر، پشتی چێبوونا له‌هییان و گه‌هاندنا زیانان ب هژماره‌كا وه‌لاتیێن سنۆرێ ناوچه‌یا دێره‌لۆكێ، ژ ئالیێ وان ڤه ڤه‌دیتن بۆ هه‌موو ڤان زیانان هاتینه كرن و زێده‌تر بۆ واردبێژیت: ژ ئه‌نجامێ دروستبوونا ڤان له‌هییان 95 وه‌لاتی ل ڤێ ناوچه‌یێ زیاندار بووینه و دیار ژی كر، كو ب كۆژمه‌یێ 259 ملیۆن 550 هزار دیناران زیان بڤان وه‌لاتییان كه‌فتیه و ئاشكرا ژی كر، ب ئارمانجا قه‌ره‌بووكرنا ڤان وه‌لاتییان، وان وه‌ك رێڤه‌به‌رییا ناحیا دێره‌لۆكێ، ناڤێن وه‌لاتیێن زیاندار دگه‌ل قه‌باره‌یێ زیانێن وان دایه ئالیێن په‌یوه‌ندیدار و ته‌كه‌ز ژی كر، تا نها چ به‌رسڤ لسه‌ر قه‌ره‌بووكرنا زیانێن ڤان وه‌لاتییان نه‌گه‌هشتینه به‌ر ده‌ستێ وان.
