ئێران: پشتگیری لە گەشتی ئاسمانی راستەوخۆی نێوان ئێران و ئەمەریكا دەكەین
تاران- KDP.info/ وەزیری دەرەوەی ئێران عەلی ئەكبەر سالحی رایگەیاند كە دەوڵەتی ئێران هیچ جۆرە كێشەیەكی لەگەڵ خەڵكی ئەمریكادا نییە و پەیوەندی لە نێوان خەڵكی ئێران و خەڵكی ئەمریكادا شتێكی ئاساییە.
لەمبارەیەوە ئاژانسی فارسی ئیرانی بڵاوی كردووەتەوە كە رۆژی چوار شەممە وەزیری دەرەوەی ئێران عەلی ئەكبەر سالحی سەبارەت بە پەیوەندییەكانی نێوان ئێران و ئەمریكا رایگەیاندووە كە دەوڵەت و خەڵكی ئێران هیچ جۆرە كێشەیەكیان لە گەڵ خەڵكی ئەمەریكادا نییە.
عەلی ئەكبەر سالحی هەروەها ئاماژەی بەوە كردووە كە ئێران پشتگیری لە گەشتی ئاسمانی راستەوخۆی نێوان ئەمەریكا و ئێران دەكات.
ناوبراو ئاماژەی بەوە كردووە كە ژمارەیەكی یەكجار زۆر هاووڵاتی ئێرانی لە ئەمەریكا دەژین، بۆیە هەبوونی گەشتی ئاسمانی نێوان ئێران و ئەمەریكا خزمەتی ئەو هاووڵاتییە ئێرانییانە دەكات بۆیە ئێران پشتگیری لە هەبوونی گەشتی ئاسمانی نێوان ئەمەریكا و ئێران دەكات.
