هه‌ر فەرمانبەرەكێ 10 بتلێن خوینێ ببه‌خشیت دێ خاله‌ك بۆ وه‌رگرتنا پارچه زه‌ڤێی زێده‌بیت
دهوك- تیابەت ب KDP.info / ب هه‌لكه‌فتا رۆژا جیهانی یا خوین به‌خشان، ب چاڤدێریا ته‌مه‌ر ره‌مه‌زان پارێزگه‌رێ دهۆكێ، ئه‌ڤرۆ كۆمه‌لا خوین به‌خشێن كوردستانێ لقێ دهۆك ب هه‌ڤكاریا رێڤه‌به‌ریا گشتی یا ساخله‌میا پارێزگه‌ها دهۆكێ د ئاهه‌نگه‌كا رێزلێنانێ دا، 100 خوین به‌خش خەلات كرن .
حه‌مزه ره‌زیكی، سه‌رۆكێ كۆمه‌لا خوین به‌خشێن كوردستانێ لقێ دهۆك بو kdp.infoدیاركر، ژمارا خوین به‌خشێن دهۆكێ گه‌هشتیه 2862 كه‌سان و گۆت: د پێنج هه‌یڤێن بۆری دا ئه‌م شیاینه یازده هه‌وێن خوین به‌خشینێ ئه‌نجام بده‌ین و 662 بتلێن خوینێ بۆ نه‌خۆشا دابین بكه‌ین.
سه‌رۆكێ لقی دهۆك دیاركر ژی كو بڕیاره‌ك ده‌رچوویه هه‌ر كه‌سێ 10 بتلێن خوینێ ببه‌خشیت دێ خاله‌ك بۆ وه‌رگرتنا پارچه زه‌ڤی زێده‌بیت و گۆت: ئه‌ڤ بڕیاره ب تنێ بۆ خوین به‌خشێن پارێزگه‌ها دهۆكێ یه.
ره‌زیكی دیاركر ژی كو ب هه‌لكه‌فتا رۆژا جیهانی یا خوین به‌خشان وان شیایه ب پشته‌ڤانیا پارێزگه‌ها دهۆكێ 100 خوین به‌خشان خه‌لات بكه‌ن و دیاریێن رێزگرتنێ پێشكێشی 18 كه‌سایه‌تی و لایه‌نان بكه‌ن .
