یەکگرتووی ئیسلامی: ھەڵوێستی سەرۆکی ھەرێم بەھەنگاوێکی دروست دەزانین
ھەولێر- تایبەت بەKDP.info/ د.سەلاحەدین بابەکر یاریدەدەری ئەمینداری گشتی یەکگرتووی ئیسلامی بەkdp.info راگەیاند: نامەکەی سەرۆکی ھەرێمی کوردستان بۆ پەرلەمان بە ھەنگاوێکی دروست دەزانین و ھیوادارین پەرلەمانی کوردستان کار لەسەر ئەوەی لە ناو نامەکەدا ھاتووە بکات، بۆ ئەوەی بە سازان پرسی دەستور چارەسەربکرێت.
د.سەلاحەدین بابەکر گوتیشی: ئەو نامەی کە لە لایەن سەرۆکی ھەرێمی کوردستانەوە نێردراوە بۆ پەرلەمان ھاوپێچە لە گەڵ تەواوی سەرنج و تێبینی ھێزو لایەنە سیاسییەکانی کوردستان، بۆیە پەرلەمان پێویستە تاوتوێی بکات. بۆئەوەی لە کۆی ھەموو ئەو سەرنج و تێبینیانە بگەینە ئەو سازانە نیشتیمانییەی کە ھەموو لایەک داوای دەکەین لە بارەی دەستور.
بابەکر رونیشیکرده‌وە، ئەگەر پەرلەمان بەزوویی تاوتوێی ئەو سەرنج و تێبینیانە بکات و میکانیزمێکی گونجاو دابنێت بۆئەوەی بە زوویی ئەنجام بدرێت، چونکە نابێت ئەو سازانە ببێتە ھۆی ئەوەی ھەڵبژاردنەکان دوابخرێن بە تایبەت ھەڵبژاردنی پەرلەمان .
ئەمەش لە کاتێکدایە ئەمڕۆ سەرۆکی ھەرێم لە رێگەی نامەیەکی فەرمییەوە تێبینی و پێشنیارەکانی سەرجەم حزب و لایەنە سیاسییەکانی ئاراستەی سەرۆکایەتی پارلەمان کردووە بۆ ئەوەی سەرۆکایەتی پارلەمان لە گەڵ نوێنەری حزب و لایەنە سیاسییەکان و ئەندامانی لیژنەی ئامادەکردنی پڕۆژەی دەستووری ھەرێمی کوردستان دابنیشن و تاوتوێی پێشنیار و تێبینییەکان بکەن بۆ ئەوەی بە کۆدەنگی تەواوی لایەنەکان لە سەر مەسەلەی پڕۆژەی دەستوور بگەنە ئەنجامێک.
