نێچیرڤان بارزانى به‌ردى بناغه‌ى نه‌خۆشخانه‌یه‌كى سه‌د قه‌ڕه‌وێڵه‌یى له به‌رده‌ڕه‌ش دانا
بەردەرەش - KRG- KDP.info / دواى نیوه‌ڕۆى سێشه‌ممه 11ى حوزه‌یرانى 2013، نێچیرڤان بارزانى سه‌رۆك وه‌زیرانى هه‌رێمى كوردستان به یاوه‌ریى عیماد ئه‌حمه‌د جێگرى سه‌رۆك وه‌زیران و ئاماده‌بوونى ژماره‌یه‌ك له وه‌زیران و پارێزگارى دهۆك و به‌رپرسانى كارگێرى و ژماره‌یه‌ك له په‌رله‌مانته‌ران و خه‌ڵكى ناوچه‌كه، له ڕێوڕه‌سمێكدا به‌ردى بناغه‌ى نه‌خۆشخانه‌یه‌كى سه‌د قه‌ڕه‌وێڵه‌یى له شارۆچكه‌ى به‌رده‌ڕه‌ش دانا كه بڕى زیاتر له سى و پێنج ملیۆن دۆلارى بۆ ته‌رخان كراوه.
له وته‌یه‌كیشدا كه به‌م بۆنه‌یه‌وه پێشكه‌شى كرد، سه‌رۆك وه‌زیران خۆشحاڵیى خۆى ده‌ڕبرى كه پاش دوایین سه‌ردانى بۆ ناوچه‌كه و كۆبوونه‌وه‌ى له‌گه‌ڵ داموده‌زگاكان، یه‌كێك له‌و پڕۆژانه‌ى خرایه پلانه‌وه ئه‌م نه‌خۆشخانه‌یه بوو، كه ئه‌مڕۆ به‌ردى بناغه‌ى داده‌نێن. هه‌روه‌ها سوپاسى وه‌زیر و وه‌زاره‌تى ته‌ندروستى و وه‌زیرى پلاندانانى كرد بۆ ئاماده‌كاریه‌كان و به‌دواداچوون و گه‌یاندنى ئه‌م پرۆژه‌یه به قۆناغى ئه‌مڕۆى ده‌ستكردن به جێبه‌جێكردنى. هیواشى خواست نه‌خۆشخانه‌كه خزمه‌تێكى باشى ته‌ندروستى به ده‌ڤه‌ره‌كه بگه‌یه‌نێت و وه‌ڵامى پێداویستیه‌كانى ناوچه‌كه له بوارى ته‌ندروستى و پێداویستیى پزیشكییه‌وه بداته‌وه.
دواى ئه‌وه له قه‌زاى ئاكرێ سه‌رۆك وه‌زیران و شاندى یاوه‌رى؛ له‌گه‌ڵ به‌رپرس و به‌ڕێوه‌به‌رانى فه‌رمانگه میرییه‌كان و ژماره‌یه‌ك له په‌رله‌مانته‌رانى ناوچه‌كه و نوێنه‌رانى چین و توێژه‌كانى ئاكرێ كۆ بووه‌وه.
له كۆبوونه‌كه‌دا نێچیرڤان بارزانى خۆشحاڵیى خۆى به سه‌ردانیكردنى ده‌ڤه‌ره‌كه و دیدارى له‌گه‌ڵ یه‌كه ئیدارییه‌كان ده‌ربڕى و ڕایگه‌یاند: سه‌ردانه‌كه‌یان به مه‌به‌ستى له نزیكه‌وه ئاگاداربوونه له كێشه و گرفت و پێداویستیه‌كانى ناوچه‌كه. ئاماژه‌ى به‌وه‌ش كرد كه سه‌ردانى خۆى و جێگرى سه‌رۆك وه‌زیران و ژماره‌یه‌ك له وه‌زیران بۆ قه‌زاى ئاكرێ؛ نیشانه‌ى خه‌مخۆرى و سووربوونى حكوومه‌ته بۆ به‌ده‌نگه‌وه‌هاتنى داواكارى و به داوداچوونى ووردى كێشه و گرفته‌كانى ناوچه‌كه و چاره‌سه‌ركردینان.
نێچیرڤان بارزانى هه‌روه‌ها ڕایگه‌یاند كه ئه‌و وه‌ك سه‌رۆك وه‌زیران خۆشحاڵه به‌وه‌ى له ئاكرێ پێشڤه‌چوونى باش له بوارى خزمه‌تگوزاریدا وه‌ده‌ست هاتووه و ئاماژه‌ى به‌وه دا كه بێگومان كێشه و كه‌موكوڕى و گیروگرفتیش هه‌ن، به‌ڵام دووپاتى كرده‌وه حكوومه‌ت هه‌وڵ ده‌دات پێداویستیه‌كانى ناوچه‌كه دابین بكات و ئه‌وه‌شى خسته‌ڕوو تا ژیان به‌رده‌وام بێت داواكارى و پێداویستیش به‌رده‌وام ده‌بن، ئه‌مه‌ش نیشانه‌ى پێشڤه‌چوونه. هه‌روه‌ها تیشكى خسته سه‌ر ئه‌وه‌ى كه جاران داواكاریى هاووڵاتیان ته‌نها دابینكردنى ئاسایش بوو، به‌ڵام ئێستا داواى خزمه‌تگوزاری و پێشكه‌وتن له گشت بواره‌كاندا ده‌كه‌ن، ئه‌مه‌ش خۆى له خۆى دا نیشانه‌ى پێشڤه‌چوونى به‌رده‌وامه له هه‌رێمى كوردستان.
پاشان قائیمقامى ئاكرێ ڕاپۆرتێكى سه‌باره‌ت به داواكارى و كێشه و ئاریشه‌كانى قه‌زاكه خسته ڕوو كه ژماره‌یه‌ك داواكارى له خۆ گرتبوو وه‌ك؛ كردنه‌وه‌ى زانكۆ و دابینكردنى پێدوایستیى ئه‌و كۆلێژ و په‌یمانگایانه‌ى ئێستا له ئاكرێ هه‌ن، چاككردنه‌وه‌ى ئه‌و ڕێگاوبان و پردانه‌ى به هۆى بارانى ئه‌مساڵه‌وه زیانیان پێگه‌یشتووه، چاككردنى شه‌قام و كۆڵانه‌كان و ئه‌و گوندانه‌ى كه‌وتونه‌ته نێو سنوورى شار، دانانى كارگه‌یه‌كى قیڕ بۆ پڕكردنه‌وه‌ى پێداویستیه‌كانى ناوچه‌كه، چاككردنى تۆڕه‌كانى ئاو له ئاكرێ و ده‌وروبه‌رى.
هه‌روه‌ها دامه‌زراندنى ژماره‌یه‌كى پێویست له كارمه‌ندان و پێدانى ده‌سه‌ڵاتى زیاتر به دام و ده‌زگاكان بۆ ڕاییكردنى كاروبارى ڕۆژانه‌ى هاووڵاتیان، دروستكردنى یاریگایه‌كى داخراو، نۆژه‌نكردنه‌وه‌ى خانووه كۆنه‌كانى ئاكرێ كه به‌شێكن له شوێنه‌وارى ناوچه‌كه و بۆ ئه‌م مه‌به‌سته بودجه‌یه‌ك ته‌رخان بكرێت، گرنگیدان به كه‌رتى گه‌شتیارى، به تایبه‌تی كه ئاكرێ ژماره‌یه‌كى زۆرى شوێنى گه‌شتیارى تێدا هه‌یه و گه‌شتیارانى ناوه‌ڕاست و خوارووى عیراق ڕووى تێده‌كه‌ن، چاره‌سه‌ركردنى كێشه‌ى زه‌وى و زار، دروستكردنى تونێلێك له چیاى پیرس، پڕۆژى ئاوى دینارتێ بخرێته بوارى پلانى حكوومه‌ته‌وه، دابینكردنى پێدوایستیه‌كانى نه‌خۆشخانه و به‌رگرى شارستانى؛ له‌گه‌ڵ ئه‌و ڕاپۆرته‌شدا، ڕاپۆرتێكى دیكه سه‌باره‌ت به بڕى تێچووى پڕۆژه‌كان پێشكه‌ش به سه‌رۆك وه‌زیران كرا.
لاى خۆیه‌وه نێچیرڤان بارزانى دووپاتى كرده‌وه كه هه‌رچى له تواناى حكوومه‌تدایه بۆ جێبه‌جێكردنى ئه‌و پڕۆژانه ده‌یكات. سه‌باره‌ت به پرسى نۆژه‌نكردنه‌وه‌ى شوێنه‌واره‌كانیش جه‌ختى له‌سه‌ر ئه‌وه كرده‌وه كه پێویسته له‌گه‌ڵ زانكۆ لێكۆڵینه‌وه‌یه‌كى زانستى بكرێت بۆ ئه‌وه‌ى به شێوه‌یه‌كى زانستیانه ئه‌و شوێنه‌وارانه نۆژه‌ن بكرێنه‌وه. داكۆكیشى له‌سه‌ر نه‌مانى ڕۆتین له فه‌رمانگاكان كرده‌وه و رایگه‌یاند ئه‌ركى حكوومه‌ته خزمه‌تى خه‌ڵك بكات و به‌پیر داواكاریه‌كانیانه‌وه بچێت.
دواتر عیماد ئه‌حمه‌د جێگرى سه‌رۆك وه‌زیران له وته‌یه‌كدا وێڕاى ده‌ڕبرینى خۆشحاڵى به‌م سه‌ردانه، ڕایگه‌یاند ئاكرێ شارێكى كۆن و ناسراو و شایانى هه‌موو خزمه‌تێكه، حكوومه‌ت هه‌وڵ ده‌دات داواكاریه‌كانى به شێوه‌یه‌كى ته‌دریجى و به‌پێى تواناكان جێبه‌جێ بكات. جه‌ختیشى له‌وه كرده‌وه كه فه‌رمانگاكانى حكوومه‌ت به‌رده‌وام به‌پیر كێشه و داواكاریى هاووڵاتیانه‌وه بچن و هه‌وڵى چاره‌سه‌ركردنیان بده‌ن.
دەقی وتارەکەی سەرۆک وەزیران
خوشك و برایانی خۆشه‌ویست..
ئاماده‌بووانی به‌ڕێز
خۆشحاڵم له‌م ڕێوڕه‌سمه‌دا له‌گه‌ڵتان به‌شدارم بۆ دانانی به‌ردی بناغه‌ی نه‌خۆشخانه‌یه‌كی سه‌د قه‌ڕه‌وێڵه‌یی له‌م ناوچه‌یه. له ده‌سپێكی قسه‌كانمدا وێڕای ده‌ستخۆشی و پیرۆزبایی، سوپاسی وه‌زیر و وه‌زاره‌تی ته‌ندروستی و هه‌ر هه‌موو كارمه‌ندانی وه‌زاره‌ت ده‌كه‌م بۆ كاری به‌رده‌وامیان، هه‌روه‌ها جێی خۆیه‌تی سوپاسێكی تایبه‌تی وه‌زیری پلاندان بكه‌م بۆ ئه‌و كاره‌ی كه كردوویانه و ئه‌مڕۆ له‌م ڕێوڕه‌سمه‌دا لێره‌ین بۆ دانانی به‌ردی بناغه‌ی ئه‌م پرۆژه‌یه له به‌رده‌ڕه‌ش.
بێگومان یه‌كێك له ئه‌وله‌ویاتی كاره‌كانی حكوومه‌تی هه‌رێمی كوردستان هه‌ر لە کابینەکانی پێشترەوە هەتا ئێستاش؛ مه‌سه‌له‌ی خزمەتگوزاریی تەندروستی بووە لە هەموو دەڤەرەکان. هیچ گومانێك له‌وه دا نیه كه له‌مڕووه‌وه پێشکەوتنی بەرچاومان بە دەست هێناوە، نكۆڵی لەوەش ناکەین کە کەموکوڕی هەیە، به‌ڵام هه‌وڵی بێوچانی حكوومه‌تی هه‌رێمی كوردستان ئه‌وه‌یه له هه‌موو ڕوویه‌كه‌وه لە سەرتاسەری کوردستان خزمەتگوزاریی تەندروستی پەرە پێبدات.
ده‌بینن ڕۆژ بە ڕۆژ كردنه‌وه‌ی نه‌خۆشخانه زیاتر ده‌بێت، کاری خزمەتگوزاری باشتر ده‌بێت و وەزارەتی تەندروستی له هه‌موو ڕوویه‌كه‌وه كاری به‌رده‌وام ده‌كات بۆ ئه‌وه‌ی سیستمی تەندروستی له هه‌رێمی كوردستان بە شێوەیەک بگۆڕدرێت کە لەگەڵ ستانداردی جیهانی بگونجێت. پرۆسەیەکە دەستی پێکردووە، بێگومان ناتوانین بڵێین ئەو پڕۆسەیە بە شەو و ڕۆژێک تەواو دەبێ، پرۆسەیەکی بەردەوامە و له‌وانه‌یه چەندین ساڵی پێویست بێت، به‌ڵام ئه‌وه‌ی گرنگە دەمەوێ بیڵێم ئێمە لە هەرێمی کوردستان هەموو هەوڵێک دەدەین بۆ ئەوەی ژینگەیەکی تەندروست بۆ میلله‌ته‌كه‌مان فه‌راهه‌م بکەین. بەراوەردکردنی ئەمڕۆی کوردستان لەگەڵ چەند ساڵێک لەمەوبەر، له هه‌موو ڕوویه‌كه‌وه، لە ڕووی ئاوەدانکردنەوە و خزمەتگوزاریی تەندروستییه‌وه، پێشکەوتنی زۆر باشی بەخۆیەوە بینیوە، بەڵام گومان لەوەدا نییە کە وه‌ك پێشتریش گوتوومانه و دووباره‌ی ده‌كه‌ینه‌وه؛ ووڵاتێکی وێرانمان وەرگرتووە، بودجەیەکی سنووردارمان هەیە، ناتوانین بە شەو و ڕۆژێک شایەتی ئەوە بین کە هەموو کێشەکان چارەسەر بکرێن.
گرنگ ئەوەیە خەڵکی ئێمە ئه‌وه بزانێت کە حکوومەتی هەرێمی کوردستان وه‌ك خه‌مخۆرێكی ڕاسته‌قینه‌ی میلله‌تی خۆی، لەسەر ئەوە جدییە هه‌موو هەوڵێك بدات کەموکوڕییەکان لە هەر بوارێکدا له هه‌رێمی كوردستان هه‌ن، چارەسەر بکات. دروستکردنی ئەم نەخۆشخانەش هەوڵێکی دیکەی حکوومەتە بۆ خزمەتکردنی زیاتری خەڵک لە هەموو دەڤەرە جیا جیاکانی هەرێمی کوردستان.
ئەم خەستەخانەی ئەمڕۆ بەردی بناغەمان بۆ دانا نزیکەی ٤٣ ملیار دیناری تێ دەچێت و پڕۆژەکە بە هاوبەشیی کۆمپانیایەکی خۆماڵی و تورکی جێبەجێ دەکرێت. هیوادارم ئەم خەستەخانەیە بتوانێ ببێتە شوێنێک کە خزمەتگوزاریی تەندروستی بۆ ئەم دەڤەرە بە شێوەیەکی ڕێکوپێک پێشكه‌ش بکات.
دووباره به ناوی خۆم و به ناوی به‌ڕێز عیماد ئه‌حمه‌د جێگری سه‌رۆك وه‌زیرانه‌وه، گه‌رمترین پیرۆزبایی له خه‌ڵكی ده‌ڤه‌ری به‌رده‌ڕه‌ش ده‌كه‌م، هیوادارم ئه‌م نه‌خۆشخانه‌یه خزمه‌تگوزاریی باش پێشكه‌ش بكات. هه‌روه‌ها دووباره ده‌ستخۆشی له هه‌موو ستافی وه‌زاره‌تی ته‌ندروستی و به‌ڕێوه‌به‌ری گشتی و قایمقام ده‌كه‌ین. لە سەردانی پێشووماندا بۆ ئه‌م ده‌ڤه‌ره، بەڵێنی کۆمەڵێک پڕۆژەمان به‌م ده‌ڤه‌ره داوە و ئەو پڕۆژانە لە داهاتوویەکی نزیکدا ده‌كه‌ونه بواری جێبه‌جێكردنه‌وه. هیوادارین كۆی ئه‌و پڕۆژانه ببنه هۆكاری خزمه‌تگوزاریی زیاتر بۆ ئه‌م ده‌ڤه‌ره.
هیوادارم هه‌موو لایه‌كتان ته‌ندروستیتان باش بێت، پێویستیتان به نه‌خۆشخانه نه‌بێت و ئه‌وه‌یشی پێویستی پێ ده‌بێت، هیوادارم ئه‌م نه‌خۆشخانه‌یه به شێوه‌یه‌كی وا ستاندارد دروست بكرێت كه وه‌ڵامی هه‌موو پێویستییه‌كان بداته‌وه. دیسانه‌وه پیرۆزبایتان لێ ده‌كه‌م و به‌خێر بێن به‌سه‌ر چاو، زۆر سوپاس
