مەسرور بارزانی مزگینیێ ددەتە خەلكێ پارێزگەها دهۆكێ
دهۆک - تایبەت ب KDP.info/درۆژا دووێ یا سەرەدانا خودا بو پارێزگەها دهۆكێ، رێزدار (مەسرو بارزانی) ئەندامێ مەكتەبا سیاسی یا پارتی دیمكراتی كوردستان دگەل زانایێن ئولی و ماموستایێن زانكویێ وكادرێن رێكخراوێن جەماوەری ل سنۆرێ هەر (5) پێنج لقێن دەڤەرا بەهدینان ل هولا كونگرەیان ل دۆر رەوشا ئەڤرو یا هەرێما كوردستانێ سێمینارەك پێشكێشكر.
دسێمینارێ دا رێزدار مەسرو بارزانی خوشحالیا خو بسەرەدانا ڤێ دەڤەرا كورد پەروەر نیشاندا وچەندین تەوەرێن گرنگ ل سەر رەوشا نافخویا كوردستانێ ودەڤەرێ بەحسكرن .
دەربارەی پرۆژی دەستورێ هەرێما كوردستانێ، رێزدار مەسرو بارزانی خویاكر كو پارتی هەقە شانازیێ ب هەلویستێ خو بكەت چونكی بەرەڤانیكرنا پارتی ژ ئێخستنا پرۆژێ دەستورێ هەرێمێ بو ڕیفراندومێ بەرەڤانیكرنە ژ پرنسیپێن یاسایی وپاراستنا مافێن تاكەكەسی یێن تەڤایا خەلكێ كوردستانێ بێ گوهدانا ڕاو بوچونێن َ ئالیەكێ یان بیروبوچونەكا سیاسی یا تایبەت .
دلایەكێ دی دا رێزدار مەسرو بارزانی ل سەر شێوازێ سیستەمێ حوكمرانیێ كوردستانێ ئاخفت و گوت ئەو كەسێن ڤی سیستەمێ هەرێمێ ب سەروكاتی ل قەلەم ددەن یا پروژێ دەستورێ هەرێمێ نەخاندیە یان ژی وەكو دیار هندەك مەرەمێن سیاسی یێن ڤەشارتی ل پاش ڤان داخویانیێن وان دا هەنە وجۆرێ سیستەمێ هەرێمێ هەر وەكو ب روونی دپروژێ دەستوری دا هاتی ب سیستەمەكێ پەرلەمانی كوماری دیموكراسی دا زانین .
دیسان هن تەوەرێن دی یێن گرنگ ژی بەحسكرن ژوانا زاراڤێ (سازانا نیشتیمانی) كو ل ڤێ دوماهیێ هندەك ئالیێن سیاسی رۆژانە بازاری پێدكەن وئەڤ چەندە بتنێ وەك رێكەك بو بجهئینانا مەرەمێن وان یێن سیاسی ل قەلەم دا .
هەروەسا وەك مزگینیەك گرنگ بو خەلكێ پارێزگەها دهۆكێ رێزدار مەسرو بارزانی راگەهاند كو رەزامەندیێن پێدڤی هاتینە وەرگرتن بو دامەزراندنا زانكویەكا گرنگ ب ناڤێ زانكویا ئەمریكی ل دهۆكێ و هێڤی خواست كو ئەڤ زانكویە ببیتە دەرگەهەك گرنگ بو پێشخستنا ئاستێ زانست و زانینی ل كوردستانێ و ئیراقێ بگشتی و ل دەڤەرا دهۆكێ ب تایبەتی .
ل داویێ دەرگەهێ دان و ستاندنا بو بەشداربویێن سێمینارێ هاتە ڤەكرن وچەندین كەسا ب راو بوچونێن خو بەشداری د دەولەمەندكرنا بابەتێن وێ دا كر .
