سالروژا مالئاڤایی کرنا تەحسین تاها و عه‌بدوڵڵا زێرین ل ئامێدیێ برێڤەچوو
ئامێدیێ-KDP.info/ سەنتەرێ ئامێدیێ یێ رەوشەنبیری ب هەڤکاری دگەل تیپا ئامێدیێ یا موزیکێ و هونەرمەند"حەسەن بیبو" راببون ب ساخکرنا 18 سالیا وەغەرکرنا هونەرمەندێ کورد پەروەر (تەحسین تاها) و دوو سالیا وەغەرکرنا هونەرمەندێ نەمر (عه‌بدوڵڵا زێرین) ل ئامێدیێ .
ب بەرهەڤبوونا "حسێن خالد" قایمقامێ قەزا ئامێدیێ و "محسن صالح" پێشمەرگێ دێرین و "محمد محسن" سەروکێ جڤاتا پێشڤەبرنا ئامێدیێ و "فەریق فاروق" بەرپرسێ لقێ هەژدە و ب ئامادەبوونا هەژمارەکا هوزانڤانێن بەرنیاس (د. بەدرخان سندی و رێکێش ئامێدی" و محفوز مایی و هشیار رێکانی) و هەژمارەکا زورا حەژێکەر و ریهـ سپی و ماقیلێن دەڤەرێ و هەمارەکا رێڤەبەر و بەرپرسێ حزبی و میری و مالباتێن هەردوو هونەرمەندێن خودێ ژێ رازی (تەحسین تاها و عبدالله زێرین)، ل روژا سێ شەمبی رێکەفتی 2013/6/4 ل بارەگایێ هولا سەنتەرێ ئامێدیێ یێ رەوشەنبیری رێ و رەسمێن سالڤەگەرا هەردوو هونەرمەندێن کورد پەروەر (تەحسین تاها و عبدالله زێرین) برێڤە چوون .
ل بەراهیێ پێشانگەهەکا وێنێن فوتوگرافی ژلایێ "حەسەن بیبو" ڤە هاتبو رێکخستن و ژ بال قایمقامێ ئامێدیێ ڤە هاتە ڤەکرن و کو تێدا ب چەندین وێنێن کەڤنار و بیرەوەریێن ڤان هونەرمەندا ب خوڤە دگرت د ڤێ پێشانگەهێ دا هاتنە نیشاندان .
ل دویڤدا وەکو وەفاداریەک بو گیانێ هەردوو هونەرمەندا بەرهەڤبووی دەقیقەک راوەستیان، پاشان پەیڤەک ژلایێ "محمد شەریف ئامێدی" بەرپرسێ سەنتەرێ ئامێدیێ یێ رەوشەنبیری ڤە هاتە پێشکێش کرن و تێدا ب خێرهاتنا ئامادەبوویان کر .
ل دویڤدا "حسێن خالد" قایمقامێ قەزا ئامێدیێ ب ڤێ هەلکەفتێ پەیڤەک پێشکێش کر و تێدا چەندین تیشک ئێخستنە سەر ژیانا هونەرمەند تەحسین تاها و عبدالله زێرین ی .
پاشان پەیڤا لقێ هەژدە هاتە خواندن ژلایێ فەریق فاروق ڤە، و دیسان پەسنا هەردو هونەرمەندێن کورد پەروەر بلند نرخاند .
ل دویڤدا پەنەلێ ئەدەبی دەستپێکر و هەر ئێک ژ "د. بەدرخان سندی" و "رێکێش ئامێدی" و "مەحفوز مایی" و "هشیار رێکانی" کورتیەک ل دور ژیانا هونەری یا هەردوو هونەرمەندا گوتن دگەل خاندنا چەند هوزانێن وان یێن داینە هەردوو هونەرمەندا و کرینە ستران، و دیسان "محمد محسن" و "صالح محسن" هەر ئێکی ژی پەخشانەک ب ڤێ بیرەوەریێ پێشکێش کرن .
برگا دویفدا ئاهەنگەکا ستران و موزیکێ ژ بال هونەرمەند "ئەنەس ئامێدی" هەڤالێ خودی ژێ رازی تەحسین تاهای و تیپا موزیکێ یا ئامێدیێ ب چەند سترانەکا هاتە پێشکێش کرن، پاشان چەندین خەلاتێن رێزلێنانێ ل سەر مالباتێن هەردوو هونەرمەندا و وان هوزانڤانا یێن هوزان داینە وان و کرینە ستران پێشکێش کرن .
و ل پشترا ئامادەبووی ب هەڤرا ب رێپیڤان و ب تاجە گولین ڤە چوونە سەر گورێ هونەرمەندێ کورد پەروەر (تەحسین تاها) ی ل گورستانا ئامێدیێ و سورەتا فاتحە خواندن .
ل سەر گورێ نەمر تەحسین تاهای ژی پەیڤەک ژ بال "محمد محسن" سەروکێ جڤاتا پێشڤەبرنا ئامێدیێ ڤە پێشکێش کر و تێدا ب ناڤێ خەلکێ ئامێدیێ سۆپاسیا وان هەمی ئامادەبویان کر ژبو ئامادەبوونا وان و دیسان ژی ژ حکومەتا هەرێما کوردستانێ و جهێن پەیوەندیدار خواست کو ئەو پەیکەرێ بچویکێ تەحسین تاها هاتیە چێکرن سەر وێنێ ویڤە ناچیت و جهێ وی ژی نە یێ گونجایە، خواست ل ناڤا پارکا بەرێ سیلێ پەیکەرەکێ وی و چەندین رەوشەنبیرێن ئامێدیێ و دەڤەرێ ل ڤێ پارکێ بهێنە چێکرن وەکو وەفاداریەک بو گیانێ وان .
