سەرۆكی هەرێمی كوردستان پێشوازی لە سەرۆكی شارەوانیی گەورەیی ئامەد دەكات
پێشنیوەڕۆی ئەمڕۆ پێنجشەممە 30ـی 5ـی 2013 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە بەڕێز عوسمان بایدەمیر سەرۆكی شارەوانیی گەورەیی ئامەد و شاندەێكی یاوەری كرد.
لە دیدارێكدا سەرەتا سەرۆكی شارەوانیی گەورەیی ئامەد خۆشحاڵیی خۆی بۆ سەردانی كوردستان و دیدار لەگەڵ سەرۆك بارزانی دەربڕی و سوپاسی ئەو پێشوازییەشی كرد كە لە كوردستاندا لێی كراوە و سەرەخۆشی خۆی و پارتەكەشی بە سەرۆك بارزانی ڕاگەیاند بە بۆنەی كۆچی دوایی خۆشكی بەڕێزیانەوە. دواتر عوسمان بایدەمیر دەستخۆشی لەو پێشكەوتننانە كرد كە لە هەرێمی كوردستان لە بوارەكانی ئاوەدانكردنەوە و ئازادیی سیاسیی هاتوونەتە ئاراوە و ئاماژەشی بەوەدا كە ئێستا هەموو جیهان سەیری ڕۆژهەڵاتی ناوەڕاست دەكات و كێشەی كورد سەرنجی هەموو لایەكی ڕاكێشاوە. هەروەها گەلی كورد لە باكووری كوردستانیش ئومێد و هیوایان لەسەر باشوور هەڵچنیوە و بەردەوام چاو و گوێیان لە بارودۆخی سیاسی و هەڵوێستی ڕەسمیی سەركردایەتیی سیاسیی هەرێمی كوردستانە لەمەڕ كێشەی كورد لە توركیا.
لای خۆیەوە سەرۆك بارزانی بەخێرهاتنی شاندی میوان و سوپاسی سەرۆكی شارەوانیی گەورەیی ئامەدی كرد و هەرێمی كوردستانی بە ماڵی هەموو كوردێك زانی و یارمەتیدانی كوردانی پارچەكانی دیكەی بە ئەركێكی نیشتیمانی لەقەڵەم دا. لەبەشێكی دیكەی قسەكانیدا سەرۆك بارزانی هێمای بەوەدا كە كێشەی كورد لەتوركیا هەنگاوی باشی بڕیوە و بەهۆی پڕۆسەی ئاشتی هیوای چارەسەریی كێشەی كورد زیاتر دەبێت. سەرۆك بارزانی لەبارەی كێشەی كورد لە ڕۆژهەڵاتی ناوەڕاستدا گوتی: "ئێستا سەردەمی زێڕینە بۆ گەلی كورد چونكە نەیارانی لە هەڵوێستێكی لاواز دان و باشترین دەرفەتە بۆ ئەوەی ئاواتەكانی بهێتە دی بەڵام پێویستە گەلی كورد خۆی لە هزری توندوتیژیی دوور بكات و لەنێوخۆشیدا وتار و ستراتیژییەكی یەكگرتووی هەبێت و دەبێ پێداگری لە پەیامی ئاشتی و پێكەوەژیانی بۆ گەلانی ناوچەكە بكات.
قسەكردن لەسەر پڕۆسەی ئاشتی لە توركیا و بارودۆخی ڕۆژئاوای كوردستان تەوەرێكی دیكەی دیداری نێوان سەرۆك بارزانی و سەرۆكی شارەوانیی گەورەیی ئامەد بوو.
