خۆلا دەرچوونا زمانێ ئینگلیزی ل ئامێدیێ ب داوی هات
ئامیدیی تایبەت ب KDP.info/ پشتی بو ماوێ (6) مەهان خولا فێربوونا زمانێ ئینگلیزی ئەوا کو ل رێکەفتی 2012/12/1 ل ئامێدیێ بۆ هەژمارەکا قوتابی و فەرمانبەرێن دەڤەرا ئامێدیێ ڤەکری ب داوی هات .
پەیمانگەها (هایدوای) ل دهوکێ ب هەڤکاری دگەل قونسلخانا ئەمریکی ل هەڤلێرێ ل رێکەفتی 2012/12/1 خۆلەکا فێربوونا زمانێ ئینگلیزی ل ئامێدیێ ڤەکر بوو و بۆ ماوێ (6) مەهان ڤەکێشا، ل روژا سێ شەمبی رێکەفتی 2013/5/28 خولا ناڤهاتی ب داوی هات .
ب بەرهەڤبوونا خانم "کیمبرلی رۆنک" جێگرا قونسلێ گشتی یا ئەمریکی ل هەڤلێرێ و "محمد محسن" سەرۆکێ جڤاتا پێشڤەبرنا ئامێدیێ و "لقمان عمر" رێڤەبەرێ پەروەردا قەزا ئامێدیێ و "کاوە محمد رشید" بەرپرسێ رێکخراوا وەرار یا ڤەکولین و گەشەپێدانێ ل ئامێدیێ و "سەلام عمر علی" بەرپرسێ پەیمانگەها "هایدوای" یا ئەمریکی ل دهوکێ و گشت بەشداربویێن خۆلا فێربوونا زمانێ ئینگلیزی، رێ و رەسمێن بەلاڤکرنا باوەرنامێن دەرچوونێ ب رێڤەچوو .
ل بەراهیێ ماموستا "ئەلستەر" ماموستایێ خولێ پەیڤەک پێشکێش کر و خوشحالیا خو دەربری ژبو بەشداریا وی د خولا ناڤهاتی دا کو ب سەرکەفتیانە ب رێڤەچوو .
پاشان دەرفەت دا ماموستا "سەلام عەلی عمر" بەرپرسێ پەیمانگەها (هایدوای) یا ئەمریکی ل دهوکێ پەیڤەک پێشکێش کر .
ل دویڤدا خانم "کیمبرلی رۆنک" جێگرا قونسلێ گشتی یا ئەمریکی ل هەڤلێرێ پەیڤەک پێشکێش کر و خوشحالیا خوە دیار کر ژبو ڤەکرنا ڤێ خولێ و دیسان گوت ژی بو جارا یەکەمە سەرەدانا باژێرێ ئامێدیێ دکەت و باژارەکی دیروکی و جوان دا نیاسین، و هەڤکاریا خوە یا بەردەوام دا دیارکرن .
"محمد محسن" سەرۆکێ جڤاتا پێشڤەبرنا ئامێدیێ د پەیڤەکێ دا ب ناڤێ خەلکێ ئامێدیێ سۆپاسیێن بێ پایان ئاراستەی ماموستا "سەلام عمر " بەرپرسێ پەیمانگەها (هایدوای) یا ئەمریکی ل دهوکێ کر ژبو ڤەکرنا ڤێ خولێ و داخوازیا بەردەوامیێ ژێ را کرن، و دیسان سۆپاسیا قونسلخانەیا گشتی یا ئەمریکی ل هەڤلێرێ ژی کرن ژبو هەڤکاریا وان دگەل پەیمانگەهێ، و دیسان سۆپاسی ئاراستەی ماموستایێ خولێ ژی کر ژبو ماندیبوونا وی دگەل بەشداربویێن خولێ .
ل دویڤدا چوار بەشداربویێن خولێ ب زمانێ ئینگلیزی پەیڤەک پێشکێش کرن و تێدا سۆپاسی ل پەیمانگەها هایدوای یا ئەمریکی ل دهوکێ و قونسلخانەیا ئەمریکی ل هەڤلێرێ و ماموستایێ خولێ کرن ژبو ڤەکرنا ڤێ خولێ کو مفایەکێ زور ژێ دیتیە .
پشتی بداوی هاتنا پەیڤان، ســێ دیاری ب ناڤێ جڤاتا پێشڤەبرنا ئامێدیێ کو ژلایێ "محمد محسن" سەروکێ جڤاتێ بو قونسلخانەیا ئەمریکی ل هەڤلێرێ و پەیمانگەها هایدوای یا ئەمریکی ل دهوکێ و ماموستایێ خولێ هاتنە پێشکێشکرن .
هەر دیسان ســێ دیاریێن دن ژلایێ رێکخراوا وەرار یا ڤەکولین و گەشەپێدانێ ل ئامێدیێ بو قونسلخانەیا ئەمریکی ل هەڤلێرێ و پەیمانگەها هایدوای یا ئەمریکی ل دهوکێ و ماموستایێ خولێ هاتنە پێشکێشکرن .
ب داوی هاتنا ڤان رێ و رەسمان نان خوارنەک هاتبوو حازرکرن ل هاڤینگەها سیلاڤێ، و پشتی نانخوارنێ بەشداربویێن خولێ وێنێن گشتی ب هەڤرا گرتن و خاترا خوە ژ ماموستایێ خولێ و جێگرا قونسلێ ئەمریکی و بەرپرسێ پەیمانگەها هایدوای خواستن .
تێت زانین کو خولا ناڤهاتی بو ماوێ (6) مەهان یا بەردەوام بوو و هەر حەفتیێ چوار روژ بوون و هەر روژێ (2) دەمژمێر بوون، و (40) قوتابی و فەرمانبەر و ماموستایان بەشداری تێدا کربوون و یا بێ بەرامبەر بوو .
