ژ ئەگەرێ هرووبا 160 خیڤەتێن پەنابەرێن كەمپا دومیز كەفتن و 15 كەس برینداربوون

دهوك – KDP.info/ مەغرەبیا دوهی هرووبایەكێ مەزن و بهێز ل دهۆكێ هات و هندەك تەرگ و باران ژی دگەل دابوو، بویە ئەگەر كو پتر 160 خیڤەتێن پەنابەرێن روژئاڤایێ كوردستانێ ل كەمپا دومیز ل پارێزگەها دهۆكێ ژناڤ بچن و ب سەر وەلاتیان دا كەفتن و 15 كەس ژی برینداربوون.
نیوار فەریق ژ یەكا بەرەڤانیا باژێرێ دهۆكێ بو kdp.info گوت مەغرەبیا دوهی هەوایەكی ئێكجار بهێز ل دهۆكێ هات سەنتەرێ وی هرووبا ل خیڤەتگەها پەنابەرانێن سوری دروستبوو، بو یە ئەگەر كو پتر ژ 160 خیفەتێن ئاوارەیان ل سەر بكەڤن و رەوشا وان گەلەك ئالوز بوو، ئێكسەر تێمێن بەرەڤانیا باژێرێ ل وێ رێ ئامادەبون بو پاراستنا سەرو سامانێ وەلاتیان.
دیاركر ژی هەر ژ ئەگەرێ وی هرووبا 15 كەس ژی بریندار بوون بەلێ خوشبەختانە برینێن وان سفك بوون هیچ زیانەكا گیانی پەیدانەبون.
نیوار فەریق زێدەتر ئاشكراكر كو هەر ژ ئەنجامێ وی هرووبا ل دەڤەرا سێمێلێ ژی هژمارەكا مەزن یا كولێن بەز و بزنا هەرفاندن و 70 بزنێن وەلاتیان ژی مرن، دیاركر تیمێن وان بەردەوام د خزمەتا وەلاتیان دابوون بو پاراستنا وان.
عەبدولا نهێلی