عەلاوی: لە یەكەم دانیشتنی داهاتووی ئەنجوومەنی نوێنەران متمانە لە مالیكی وەردەگیرێتەوە

سەرۆكی لیستی ئەلعێراقییە دووپاتیكردەوە، ئەو ڕاگەیەندراوەی كە سەرۆك كۆماری عێراق بەرێز جەلال تالەبانی  لەبارەی تەواونەبوونی ژمارەی ئیمزاكانی ئەو پەرلەمانتارانەی كە دەیانەوێت متمانە لە نوری مالیكی سەرۆك وەزیران بسەننەوە، ناتەواوە و هەڵەی تێدایە و بڕیاریشە لە یەكەم دانیشتنی داهاتووی ئەنجوومەنی نوێنەراندا متمانە لە مالیكی وەربگیرێتەوە.

ئەیادعەللاوی سەرۆكی لیستی ئەلعێراقیە سەبارەت بەو بڕگەیەی لە ڕاگەیەنراوەكەی سەرۆك كۆماركە دەڵێ: 11 پەرلەمانتار ئیمزاكانیان كشاندۆتەوە، ئاشكرای كرد: ئەو مەسەلەیە هەڵەی تێدایە و ئێمە دڵنیاین كە ژمارەی پێویست لە دەنگی پەرلەمانتاران هەیە بۆ وەرگرتنەوەی متمانە لە نوری مالیكی ،  لە یەكەم دانیشتنی ئەنجوومەنی نوێنەرانیش كە بڕیارە لە 21ی ئەم مانگەدا ببەسترێت متمانە لەمالكی وەردەگیرێتەوە.

عەلاوی گوتیشی: ئێمە گەیشتووینەتە قەناعەتی تەواو كە 167 دەنگی مسۆگەری ئەندامانی ئەنجومەنی نوێنەرانمان هەیە بۆ وەرگرتنەوەی متمانە لەمالكی و ڕەنگە لە دانیشتنی پەرلەماندا ئەو دەنگانە زیاتریش ببن.