پتر ژ 100 سەرپێچكارێن راڤا ماسیا ل سەر سكرێ موسل هاتینە دەستەسەركرن
دهۆک- تایبەت ب kdp.info فەرماندێ هێزا پێشمەرگێ پاراستنا ژینگەهێ ل دهۆكێ دیاركر دماوێ قەدەغەكری دا یێ راڤا ماسیا ل 15/3 تا نوكە پتر ژ سەد سەرپێچكارێن راڤا ماسیان ل سەر سكرێ موسل ژلایێ پێشمەرگێن هێزا وان ڤە هاتینە دەستەسەركرن و دەست ب سەر پتر ژ سیه ماتور و تورێن راڤا ماسیان دا هاتیەگرتن.
كەریم هێتوتی فەرماندێ هێزا پێشمەرگێ پاراستنا ژینگەها دهۆكێ بو : kdp.infoخویاكر ئەڤ سالە رێژا سەرپێچكارێن راڤا ماسیان گەلەك كێمبویە، ل سالا بوریدا ددەمێ قەدەغەكرنێ دا سەرپێچیا رێنمایێن پاراستنا ژینگەهێ گەلەك دهاتەكرن رێژەكا مەزن یا راڤچیان هاتبونە دەستەسەركرن.
بەلێ ئەڤ سالە سەرپێچیكرنا ژینگەهێ گەلەك كێمبویە، هێتوتی ئەگەر ژی بو رەوشەنبیریا وەلاتیان زڤراند گوت ل دەستپێكا قەدەغەكرنا راڤا ماسیان ئەم دگەل پتر ژ 200 راڤچیێن دەڤەرا سكرێ موسل رونشتبون بەحسێ چاوانیا پاراستنا ژینگەهێ و زێدەبونا ماسیان دڤێ دەمێ دا هاتبونەكرن ئەڤێ چەندێ ژی گەلەك كارتێكرن ل راڤچیان كریە كو سەرپێچیێ نەكەن.
ناڤبری خویاكر بتنێ هندەك كەسێَن نەفس نزم و بچوك و نەزان رابونە ب گرتنا ماسیا، مەفرەزێن وان شیاینە بەری دو شەڤان ل سەر سكرێ موسل دەه راڤچیا دگەل دەه ماتورێن كارەبێ و نەه پەلەم دەستەسەربكەن.
هێتوتی گوت ژی ئەو كەسە هاتینە رەوانەكرن بو دادگەهێ ل دوڤ یاسایێ سەرەدەری دگەل دا دهێتەكرن.
