كریكارێن دەڤەرا ئامێدیێ دسەیرانا بەری سیلی دا هاتنە خەلاتكرن
ئامێدیێ- تایبەت ب KDP.info / وه‌کو داب و نه‌ریته‌کێ سالانه و لسه‌ر ده‌مێ میر و پاشایێن که‌لها ئامێدیێ د ناڤبه‌را چیایێن ئه‌لهو و بشێش و بالولکی و دناڤ سروشتێ ره‌نگینێ کوردستانێ سه‌یرانا (به‌رێ سیلێ) هه‌ر سال ل 5/1 برێڤه دچیت .
لیژنا بلندا سه‌رپه‌رشتیا سه‌یرانا به‌رێ سیلێ یا سالانه یا کو ژلایێ جڤاتا پێشڤه‌برنا ئامێدیی ڤه هاتیه دانان راببو ب سازدانا سه‌یرانا به‌رێ سیلێ یا ئه‌ف ساله (2013) .... وه‌کو هه‌ر سال لشه‌ڤا 30/4 سه‌ر 1/5 و د سه‌قایه‌کێ خوه‌ش دا خه‌لکێ ئامێدیێ ب خێزان ڤه قه‌ستا به‌رێ سیلێ کرن و ئاهه‌نگه‌کا خوش و قه‌شه‌نگ ژلایێ تیپا موزیکێ یا ئامێدیێ ب دیلان و سه‌ما حه‌تا دره‌نگی شه‌ڤ ئاهه‌نگ شاراندبوون، لدویڤدا حه‌تا سپێدێ سه‌یرانیا هه‌ر یه‌ک ل جهێ خوه سه‌یرانا خوه خوه‌شتر لێ کر ، تێت زانین کو د بو دەمێ شەڤێ ژنیشکه‌کێ ڤه قونسلێ دەولەتا ئەلمانی ل هه‌رێما کوردستانێ و شاندێ دگه‌لدا د سه‌ره‌دانه‌کێ دا هاتبوو سه‌یرانا به‌رێ سیلێ و ژلایێ "محمد محسن" و هه‌ڤالێن سه‌رپه‌رشتیا ئاهه‌نگێ ڤه هاتنه پێشوازیکرن و شاندێ ناڤهاتی داخبار بوون ب ڤان جورە سەیرانان و سوپاسیا سه‌روکێ جڤاتێ و گشت خه‌لکێ باژێری ژبو وێ مێڤانداریێ، و پاشان ب ناڤێ جڤاتا پێشڤەبرنا ئامێدیێ دیاریەک ئاراستەی قونسلێ دەولەتا ئەلمانی کر .
دیسان روژا چوار شەمبی 1/5 هه‌ر سپێدێ زوی خه‌لکێ که‌لها ئامێدیێ و ده‌ور و به‌ران و ژ گشت پارێزگه‌هـ و قه‌زایێن کوردستانێ و هه‌ر چوار پارچێن کوردستانێ د سه‌قایه‌کێ ئارام و خوه‌شی دا به‌ره‌ف سەیرانگەها (به‌رێ سیلێ) رێکه‌تن،و قەستا جهێن خوە کرن کو تێت زانین خەلکێ ئامێدیێ حەفتیەکێ بەری ڤێ سەیرانا 1 ی ئەیارێ دچن و ل ڤێ سەیرانگەها بەرێ سیلێ جهی بو خوە دەستە سەر دکەن ژبەرکو دەما دبیتە ئەو روژا سەیرانێ جهـ تەژی دبن، ئەڤ سالە ژی وەکو پشتەڤانیەک بو خەلکێ روژئاڤایێ کوردستانێ ئەوێن نها ل کەمپا دومیز ئاکنجی جڤاتا پێشڤەبرنا ئامێدیێ (150) کەچ و کور مێڤانکربوونە ڤێ سەیرانێ و وان ژی ب کەیف و خوەشی و ب دیلان و سەما روژەکا خوەش دگەل خەلکێ ئامێدیێ و مێهڤانێن ئامادەبووی بوراندن.
ل دەمێ سپێدێ حەتا پشتی خوارنا نیڤرۆ کو ل دەمژمێر 4 ئاهەنگا سەیرانا بەرێ سیلێ دەست ب برگێن خوە کرن کو تێدا چەندین برگێن دلڤەکەر و خوەش هاتبونە ئەنجامدان ئەوژی ئەڤە بوون :-
وه‌کو وه‌فاداریه‌ک بو گشت شه‌هیدێن کورد و کوردستانێ ئاماده‌بووی ده‌قه‌یه‌ک رێزگرتن بو گیانێ وان راوه‌ستیان وپه‌یڤا بخێرهاتنێ و رونکرنه‌ک لدور ڤێ سه‌یرانێ ژلایێ به‌رێز "محمد محسن" ڤه هاته پێشکێش کرن دیسان چه‌ند رێنمایه‌ک ژلایێ "سالح محسن" ڤه هاتنه گوتن ژبو پاراستنا پاقژیێ و سروشتێ به‌رێ سیلێ وتیپا موزیکێ یا ئامێدیێ ب چه‌ندین سترانێن دلڤه‌که‌ر ڤه به‌شداری تێدا کرن کو ژلایێ هونەرمەند "ئەنەس حەسەن" ڤە هاتنە پێشکێشکرن .
ولدویفدا تیپا موزیکێ یا ئامێدیێ سترانبێژا زارۆکا "رۆکەن" یا کو بەرنیاس ب خودانا سترانا "قد قدا مریشکێ" چەندین ستران بو زارۆیان گوتن و ب دەهان زارۆ ل دەور و بەرێن وێ خرڤە ببون و چبوونە جیهانەکا دن وکوما پەیاما دەڤەرا ئامێدیێ پارچە تەمسیلیەک ب ناڤێ (ژینگەهـ) پێشکێش کرن خو ژ نڤیسینا بەرێز "محمد محسن" بوونوهەژمارەکا کارکەرێن ئامێدیێ و دەڤەرێ ژلایێ جڤاتا پێشڤەبرنا ئامێدیێ ڤە هاتنە خەلاتکرن و هونەرمەندێن باکور بەشداری دڤێ سەیرانێ دا کرن هونەرمەندان "محەمەد سەرحەدی" و " یونس ئاگری" کو دگەلدا هونەرمەندێ موزیکژەن "فاروق سۆرانی" تێدا بەشدار بوو و کوما ئاگری ژیان/مەروان تان و دیسان کوما پەیاما دەڤەرا ئامێدیێ پارچە تەمسیلیەکا دن ب ناڤێ (توفک) پێشکێش کر کو دیسان هەر ژ نڤیسینا بەرێز "محمد محسن" بوو .
ل داویا ئاهەنگێ ب دەنگێ هونەرمەندێ دهوکا داسنیا "فەرسەد حسێن" ب گوتنا چەندین سترانا ئاهەنگ ب داوی هات .
