لەیلا زانا: دەبێت سوود لەم قۆناغە وەربگرین
دیاربەكر- KDP.info/ سیاسەتمەدار و پەرلەمانتاری سەربەخۆی كورد خاتوو لەیلا زانا بۆ یەكەمینجار بێدەنگی خۆی لە بەرانبەر قۆناغی چارەسەری پرسی كورددا شكاند و رایگەیاند: ئەم قۆناغە هەر سەد ساڵ یەكجار بە دەست دەكەوێت، بۆیە پێویستە زۆر بە هۆشیارییەوە هەڵسوكەوت بكەین و سوود لەم قۆناغە وەربگرین.
لەیلا زانا لە دیمانەیەكدا لە گەڵ رۆژنامەی نیویورك تایمزدا ئاماژەی بەوە كردووە كە زەمینە لەبارە بۆ ئەوەی كە بە یەكجارەكی و بە شێوەیەكی ئاشتییانە پرسی كورد لە توركیا چارەسەر بكرێت.
ناوبراو لە بەشێكی دیكەی ئەم دیمانەیەدا گەشبینی خۆی لە بەرامبەر پێشهاتەكانی ئەم قۆناغە دەربڕیوە و جەختی لە سەر ئەوە كردووەتەوە كە لەم دواییەدا هەم كورد و هەم لایەنی توركی ئیرادەیەكیان بۆ چارەسەر كردنی ئاشتیانەی پرسی كورد نیشان داوە و بەمجۆرە دەرفەتێكی زۆر باش بۆ چارەسەركردنی پرسی كورد رەخساوە، بۆیە پێویستە هەر دوو لا زۆر بە باش سوود لەم دەرفەتە وەربگرن و ئەم پرسە چارەسەر بكەن.
