ڤەكرنا خیڤەتگەهەكێ ل هەولێرێ هیچ مفایەك بو دهۆكێ تێدانینە

رێڤەبەرێ كەمپا دومیز یا مشەختێن روژئاڤایێ كوردستانێ دیاركر: ڤەكرنا خێڤەتگەها هەولێرێ یا ئاكنجیكرنا پەنابەرێن روژئاڤا هیچ مفایەك بو پارێزگەها دهۆكێ تێدا نینە، و هێچ مفایەكێ ناگەهینیتە ئەو پەنابەرێن نوی دهێنە هەرێما كوردستانێ، یان ئەوێن نوكە ل كەمپا دومێز دا ئاكنجی.

ئەندازیار خالد قاسم رێڤەبەرێ كەمپا دومیز بو kdp.infoخویاكر: رێڤەبەریا كەمپا دومیز شییان نەمانە هەمی پەنابەرێن روژئاڤایێ كوردستانێ ئەوێن روژانە دهێنە ناڤ كەمپا دومیز دا ڤەحەوینیت، ژبەر ڤێ چەندێ بەری دو هەیڤا رێڤەبەریا كەمپا دومیز و بەرپرسێن یوئێنێ ل ناڤ كەمپێ، داخاز ژ پارێزگەرێ دهۆكێ كربوو كو خێڤەتگەهەكا دی ل پارێزگەهەكا دی بو پەنابەرێن روژئاڤا دانن بو هندێ كارێ برێڤەبەرینا كەمپا دومیز پیچەك سستبیت، لێبورین ڤە پشتی دو هەیڤا ل سەر داخازا وەزیری ناڤخۆ یێ حكومەتا هەرێمێ بریار هاتیە دان خێڤەتگەهەكا دی ل پارێزگەها هەولێرێ بهێتە ڤەكرن بەلێ ئەڤ خیڤەتگەهە بتنێ بو 12 هزار پەنابەرایە ئەوێن ل باژێرو باژێركێن سنورێ هەولێرێ ئاكنجی.

ناڤبری زێدەتر خویاكر: ڤەكرنا ڤێ خیڤەتگەهێ ل هەولێرێ و نەبونا وێ بو دهۆكێ وەكی ئێكە چونكە هیچ ئاریشەكا ڤەحەواندنا پەنابەران ل دهۆكێ چارەسەرناكەت، ئەو پەنابەرێن ل كەمپا دەمیز ئاكنجی هەر دی منین و یێن نوی ژی دهێن هەر دێ هێنە دەمیز گوت ل دوڤ دوماهیك ئامار یا پەنابەران پتر 95 هزار پەنابەرێن روژئاڤایێ كوردستانێ هاتینە هەرێما كوردستانێ ل كەمپا دومێز دا هاتینە توماركرن، ژوانا 50 هزار و 422 كەس ل ناڤ كەمپێ دا ل بن خیڤەتا دا دژین، یێن دن ژی ل سەرجەم باژێرو باژێركێن هەرێمكا كوردستانێ ئاكنجی بونە ل سەر كارانە.