ئەڤرۆ جهەك بو پێشوازیكرنا پەنابەرێن ژ نوی دهێنە كوردستانێ دهێتەڤەكرن

دهوك- KDP.info/ رێڤەبەرێ كەمپا دومیز دیاركر گەلەك جاران پەنابەرێن روژئاڤایێ كوردستانێ دەمێ دهاتنە هەرێما كوردستانێ لێ دبو شەڤ نەدگەهشتن بهێنە كەمپا دومیز، دەمێ دگەهشتن ژی ژبەر نەبونا جهێ حازر مانە سەرجادا، ب دەهان جاران ماینە تا روژا پاشتر ب رێكا هندەك خێرخوازا دگەشتینە كەمپێ، هەتا جه بو دهاتە دیتن گەلەك ماندیبون و نەخوشی ددیتن، ژبوێ چارەسەركرنا ڤێ كێشێ دوهی ئێڤاری رێڤەبەریا كەمپا دومیز دگەل دەزگەهێن یوئێنێ كومبونەك سازكر.

ئەندازیار خالد قاسم رێڤەبەرێ كەمپا دومیز تایبەت بو kdp.infoگوت دڤێ كومبونێ دا بریار هاتەدان كو ئەڤرۆ 22/4 جهەكێ تایبەت كو ژ 15 خیڤەتان پێكدهێت بهێتە ڤەكرن بو پێشوازیكرنا ئەو پەنابەرێن ژنوی ل روژئاڤایێ كوردستانێ دهێنە هەرێمێ و لێ بهێنە ئاكنجیكرن تا كو خیڤەت و جه بو دهێتە دابینكرن. گوت ئەڤ جهە دكەڤیتە پشتا خیڤەتگەها دومیز ب دوراتیا 200 میترا، ژ هەمی لایانڤە هاتیە سیرمەكرن بتنێ دەرگەهەك دێ هەبیت و ستافەكێ برێڤەبرن و پێشوازیكرنا پەنابەران هاتیە دانان، هەر پەنابەرەكێ ژنو بهێتن دێ دو تا سێ روژا لێ هێتە ئاكنجیكرن و هەمێ پێداوستێ دێ بو هێنەدابینكرن، بو هندێ هەتا كو خیفەتەك بو دهێتە دانان، بهێتە ڤەگوهاستن.