هەر قوتابیەكی پۆلی دوانزە چوار وانەش كەوتبێت دەتوانێت بەشداری لە تاقیكردنەوەكان بكات

هەولێر- تایبەت بە KDP.info / بەمەبەستی ئاسانكاری و یارمەتیدانی زیاتری قوتابیان وەزارەتی پەروەردەی حكوومەتی هەرێمی كوردستان بڕیارێك لەمەڕ بەشداریكردنی قوتابیانی پۆلی دوانزەیەم دەردەكات.

 هاجەرە داود وتەبێژی فەرمی وەزارەتی پەروەردەی حكوومەتی هەرێمی كوردستان تایبەت بۆkdp.infoگوتی: لەمیانەی كۆبوونەوەیەكی تایبەتیدا ئەنجوومەنی وەزارەتی پەروەردە بۆ ئاسانكاری و یارمەتیدانی زیاتری قوتابیان بڕیارێكی سەبارەت بە بەشداریكردنی قوتابیانی پۆلی دوانزەهەم دەركرد.

ناوبراو گوتیشی: بڕیارەكە لەدوو خاڵ پێكهاتووە ئەوانیش بریتین لە بڕیاردان بە داخیل بوونی سەرجەم ئەو قوتابیانەی كە لە پرۆگرامی خوێندنی كۆنی پۆلی دوانزەیەم دەخوێنن ئەمەش وەكو هەل و دەرفەتێكە بۆ ئەوەی دەربچن لەو قۆناغە، هەروەها خاڵی دووەم بریتییە لە ئەوەی ئەنجوومەنی وەزارەت بڕیاریدا كە قوتابی ئەگەر چوار وانەش بكەوێت ئەوا دەتوانێت بەشداری لە تاقیكردنەوەكانی سەری ساڵ بكات.