ھەولێر-KDP.info- سەرۆک بارزانی پێشوازی لە فەرماندەی گشتیی ھێزەکانی سووریای دیموکرات لە ھەولێر کردوو بارودۆخی تازەی سووریا و چۆنیەتیی گرتنەبەری ھەڵوێستێکی ھاوبەشی لایەنە کوردییەکانی سووریا تاوتوێ کرا.
ئێوارەی ڕۆژی پێنجشەممە ١٦ی کانوونی دووەمی ٢٠٢٥ لە سەلاحەددین سەرۆک مەسعود بارزانی پێشوازی لە بەڕێز مەزلووم عەبدی فەرماندەی گشتیی ھێزەکانی سووریای دیموکرات کرد.
لەم دیدارەدا بارودۆخی سووریا و دوا پێشھاتە ئەمنی و سیاسییەکانی سووریا و ھەروەھا چوارچێوەی گشتیی مامەڵەکردنی لایەنە کوردییەکان لەگەڵ بارودۆخی تازەی سووریا و چۆنیەتیی گرتنەبەری ھەڵوێستێکی ھاوبەشی لایەنە کوردییەکانی سووریا تاوتوێ کرا.
ھەر لەم دیدارەدا جەخت لەوە کرایەوە کە پێویستە لایەنە کوردیەکانی سووریا بەبێ دەستوەردانی ھیچ لایەنەک و بە ڕێکاری ئاشتیانە بڕیار لە چارەنووسی خۆیان بدەن و لەپێناو زامنکردنی مافەکانیان بە یەکڕێزی و یەکھەڵوێستیی ھاوبەش لەگەڵ حکومڕانانی تازەی سووریا بگەنە لێک تێگەیشتن و ڕێککەوتن، و فاکتەری ئاشتی و سەقامگیری بن و ڕێگری بکەن لە دووبارەبوونەوەی ئەو نەھامەتیانەی بەسەر گەلی کورد و پێکھاتەکانی تری سووریادا ھاتوونە.