ھەولێر-KDP.info- ھیوا ئەحمەد مستەفا، ئەندامی مەکتەبی سیاسی و ‏‎بەرپرسی مەکتەبی ڕێکخستنی پارێزگای کەرکووک-گەرمیانی پارتی ئاشکرای دەکات، لە ئایندەیەکی نزیکدا پارتی دەست بە دانوستان بۆ پێکھێنانی حکوومەتی نوێ دەکات. دەشڵێ: سەرۆک مەسعوود بارزانی، لە پێنجەمین کۆڕبەندی ئاسایش و ئاشتیی ڕۆژھەڵاتی ناوەڕاست ناسراو بە 'مێپس' ڕایگەیاند: لە نێوان ھەموو لایەنەکاندا دەست بە گفتوگۆ دەکرێت، بۆ ئەوەی ھەرچی زووترە پەرلەمان دەستبەکار بێ و ھەنگاوەکانی تریشی بەدوادا بێت، ئومێدەوارین ھەمووتان پشتگیریمان بکەن بۆ ئەوەی لە داھاتوودا (یەک ھەرێم، یەک پەرلەمان، یەک حکوومەت و یەک ھێزی پێشمەرگە) لە کوردستان ھەبێت.

‏‎ھیوا ئەحمەد مستەفا، ئەندامی مەکتەبی سیاسی و ‏‎بەرپرسی مەکتەبی ڕێکخستنی پارێزگای کەرکووک-گەرمیانی پارتی دیموکراتی کوردستان، تایبەت بە ماڵپەڕی فەرمیی پارتی دیموکراتی کوردستانی ڕاگەیاند، "پارتی لیژنەی دانوستانی پێکھێناوە بۆ گفتوگۆ و دانوستان لەگەڵ لایەنەکان و بە زووترین کات دەست بە دانوستان دەکەین لەگەڵ لایەنە سیاسییەکاندا، ڕێکەوتی سەردانی لایەنەکان دیاری نەکراوە، بەڵام لە ئایندەیەکی زۆر نزیکدا ئەو دانوستانانە بەڕێوە دەچن.

ھیوا ئەحمەد مستەفا گوتیشی، "سەردان و دانوستان لەگەڵ ھەموو لایەنە سیاسییەکان دەبێت، گوێ لە لایەنەکان دەگرین بزانین ئەوان بۆچوونیان لەبارەی پێکھێنانی کابینەی نوێ چییە.

پەیوەست بە مەرجەکانی پارتیش، بەرپرسی مەکتەبی ڕێکخستنی پارێزگای کەرکووک-گەرمیان گوتی: "پارتی ھەر ئەو مەرجانەی ھەیە کە سەرۆک بارزانی ئاماژەی بۆ کردووە، "یەک حکوومەت یەک پەرلەمان، یەک ھەرێم و یەک ھێزی پێشمەرگە"، دەمانەوێ حکوومەتێک دروست بکرێت خەڵک ھەست بەوە بکات حکوومەتێک ھەیە نەک چەند حکوومەتێک، ناکرێت حکوومەت لەناو حکوومەت ھەبێت، دەبێ بڕیارەکانی سەرۆکوەزیران و وەزیرەکانی حکوومەت، بۆ ھەموو ناوچەکان بێت. 

قائید میرۆ