دھۆک-KDP.info- ئێوارەی ئەمڕۆ پێنجشەممە ١٧-١٠-٢٠٢٤ لە دھۆک نێچیرڤان بارزانی، سەرۆکی ھەرێمی کوردستان، بەشداری لە ڕێوڕەسمی بیست و نۆیەمین خولی دەرچووانی زانکۆی دھۆک کرد کە ژمارەیەک لە بەرپرسانی حکوومەتی ھەرێمی کوردستان و مامۆستایانی زانکۆ و کەسایەتییانی ئەکادیمی و کەسوکاری قوتابیانی دەرچوو تێیدا ئامادەبوون.

لە ڕێوڕەسمەکەدا نێچیرڤان بارزانی وتەیەکی پێشکەش کرد، ئەمە دەقەکەیەتی:

مامۆستا و مالباتێت دەرچوویا یێت ڕێزدار،

مێھڤان و ئامادەبوویێت ھێژا..

ئێڤارا وە ب خۆشی،

ھوین ھەمی گەلەک بخێر ھاتن..

جھێ خۆشحالییەکا زۆرە کو ئەڤرۆ پێکڤە دگەل خۆشی و شادییا (٥,٠٥١) گەنجێت مە یێت خۆشتڤی، یێت (١٩) بەشێت کۆلێژێت جدا، دەرچوویێت دەورا (٢٩)ێ یا زانکۆیا دھۆکێ، یێ بەشدارم.

دەرچوویێت ھێژا،

ژدل، ئو بگەرمی، پیرۆزباھیێ ل ھەوە، ل مالبات و مامۆستایێت ھەوە یێت ڕێزدار دکەم. ھیڤیا سەرکەفتنێ بۆ وە ھەمیا دخازم. ئەڤ ئێڤارییە نە بتنێ ئاھەنگا دەرچوونێ، بۆ وە بەلکی قۆناغ و دەسپێکەکا نوییە بۆ کاروانێ ھەوە د ژیانێدا.

ھەوە چەندین سالێت کارەکێ جددی و خویندن و وەستیانێ ل زانکۆیێ ئەڤرۆ دەرباز کرن. ھەوە گەلەک زەحمەتی کێشان، داکو سەرکەڤن، داکو خەونێت خۆ بکەنە ڕاستی و بگەھنە ئارمانجێت خۆ.

وەرگرتنا باوەڕنامێ ل زانکۆیا دھۆکێ، دەسکەفتەکێ جھی شانازی و سەربلندیێیە. بەلێ ژبیر نەکەن، باوەڕنامە نە بتنێ نیشانا سەرکەفتنا ھەوە یا پیشەیی و ئەکادیمییە، ئەڤ باوەڕنامەیە بەرپرسیارییەکا مەزنە دکەڤیتە سەر ملێ ھەوە، داکو زانست و زانینا ھەوە ھون فێر بووی، بۆ خزمەتا جڤاکێ و ئاڤاکرنا پاشەڕۆژەکا باشتر و گەشتر، بۆ ولاتێ خۆ بکار بینن.

ھەوە د گەلەک وارێت جدادا، خویندنەکا باش یا کری. ھوین گەلەک زانین و زانستێت نوی یێت فێر بووی، وەکی زانستێت مرۆڤی، سروشتی، ئەندازیاری، پزیشکی، ئای تی، بڕێڤەبرن و گەلەک وارێت دی یێت کو ئەڤرۆ لێرەدا ھون ئامادە بووی.

ئەڤە ڕێیەکە بۆ ھندێ بشێن بەرامبەر تەحەدیا ئەوێت ل پێشییا مە، ئەوێت ل پێشییا ھەوە ڕاوەستن، چاوانییا چارەسەرکرنا وان کێشە و ئاریشا ڤەبینن یێت کو تێنە سەر ڕێکا وەلاتێ مە، تێنە سەر ڕێکا جڤاکێ مە.

قوتابی یێت خۆشتڤی..

دنیا گەلەک بلەز یا دھێتە گھۆڕین، دڤێت ھون د ئاستێ پێویست و تەحەددی یێت ئەڤرۆدا بن.

دەرچوویێت خۆشتڤی،

د جیھانا ئەڤرۆ یا تژی ئاڵۆزی و تەحەدیدا، وەلات و جڤاک، گەلەک پێدڤی وان کەسایە یێت زیرەک ‌و ژێھاتی و دەسپێشخەر، یێت کو بشێن ھزرەکا ڕەخنەگرانە و بنیاتنەر بکەن بۆ چارەسەرێت نوی یێت زانستی و داھێنەرانە، یێت سەرکەفتی و سەردەمیانە، بۆ کێشە و ئاریشێت جدا، ڕێکا چارەسەریێ ڤەبینن. نۆکە ھوین، یێ د وی پێگەھیدا کو بشێن جداھییەکێ چێکەن.

نە بتنێ د وارێ خویندنێدا یا پیشەیی و ئەکادیمی، بەلکی دڤێت ھوین بشێن د وارێ ژیانا جڤاکی، کولتووری، ئابووری، کارگێڕی و سیاسی یا کوردستانێدا ژی، جداھیێ چێکەن.

ل کوردستانێ و عێراقێ د چەندین وارادا، گەلەک تەحەدی یێت جدا یێن جڤاکی و ئابووری ھەنە. دڤێت ھوین بزانن کو دەرچوویێت زانکۆیێ، دشێن ڕۆلەکێ گرنگ بۆ چارەسەرکرنا وان بگێڕن. ئەڤە ژی بڕێکا داھێنانێ د وارێ کار و بزنسێدا، ھەروەسا ب بەشداریا ھەوە بۆ پێشئێخستنا بەرنامە و ستراتیژ و سیاسەتا گشتی.

قوتابی یێت خۆشتڤی ژبیر نەکەن:

ھوین ھیڤیا ڤی مللەتینە بۆ پاشەڕۆژەکا گەشتر، ژبەر ھندێ ژی ئەرکێ ھەوە، یێ بساناھی نییە، ئەرکێ ھەوە یێ گرانە بۆ خزمەتکرنا پاشەڕۆژا مللەتێ مە.

وەلاتێ مە، گەلەک نەخۆشی و کارەسات و کێشە و قەیرانێت دیتی. گەلەک گرنگە ئەم ھەمی پێکڤە کار بکەین بۆ ئاڤاکرنا جڤاکەکێ تژی ڕێزگرتن و دادپەروەر و وەکھەڤ.

ھوین دێ بەرەڤ ئاسۆیەکا نوی چن، ژبەر ھندێ خۆ ئامادە بکەن بۆ پێکئینانا ئارمانجێت خۆ یێت مەزن ئو یێت بلند. ھەرگاڤ شانازیێ ب خزمەتا خۆ بۆ مللەتێ خۆ، شانازیێ ب خزمەتا خۆ بۆ وەلاتێ خۆ بکەن. بەرپرسیارییا کو دکەڤیتە سەر ملێ ھەوە، گەلەکا مەزنە. مە ژی ھەمی باوەرییا ب ھەوە ھەی، کو دێ د ئەرکێ خۆ بەرامبەر ئەو تەحەددیاتێت کو دھێنە پێش مللەتێ مە و وەلاتێ مە، دێ ب سەرکەفتی و سەرفەرازی جیبجی کەن.

ئامادەبوویێت ھێژا،

مامۆستا و دەرچوویێت خۆشتڤی،

پەروەردە و فێرکرن، بناغێ سەرەکی یێ پێشکەفتنا ھەر جڤاکەکێ یە، ھەر جڤاکەکا ساخلەمی بڤێت، پێشکەفتن بڤێت، کلیلا وێ ل پەروەردێ دەستپێدکەت. زانست و زانین، شەرتێ ئێکێ یێ سەرکەفتنا ھەر مللەتەکی یە، بەرێ خۆ بدەنە دونیایێ، ئەو مللەتێت ڕێکا پەروەردێ ھەلبژاردبیت بۆ پێشکەفتنا جڤاکا خۆ، گەلەک ب سەرکەفتی یێت ھاتییە پێش، وەلات یێ ھەبووی یێ د ھەژاریێدا بووی، یێ د زەحمەتیێدا بووی، بەلێ وەختێ پەروەردە کرییە ئەولەویەتا کارێ خۆ، وەلاتێ خۆ ل ھەژاریێ ئینا دەر و ئەڤرۆ ئەم دبینین ئێکن ل پێشکەفتیترین وەلاتێت دونیایێ.

دڤێت بەردەوام دگەل نووترین پێشکەفتنێت زانستی یێت جیھانێ خۆ نووڤەکەن، دڤێت بھا و گرنگییەکا دروست بدەنە ھەمی وان بابەت و وارێت کو ئەڤرۆ ل جیھانێ جھێ گرنگی و سەرنجێنە. دڤێت ئەم ھەمی ھەولا بدەین کو ڤێڕا بگەھین و ژ کاروانێ ئەڤرۆ یێ پێشکەفتنێ یێ د جیھانێدا ئەم ل پاشڤە نەمینین.

لەوما پێدڤییە زانکۆیێت مە، گرنگییەکا دروست بدەنە تەکنەلۆژیایێ و بکارئینانا وێ د ھەمی وارێت ژیانێدا. گرنگییەکا پێویست بدەنە زیرەکییا دەستکرد و گەلەک باش لسەر دەرفەت و مەترسیێت وێ یێت نۆکە و پاشەڕۆژێ ڕاوەستن. دڤێت بابەتێ گھۆڕینا ئاڤوھەوای و چاوانییا چارەسەری و کێمکرنا مەترسیێت وێ، گەلەک ب جددی بێنە وەرگرتن و کار بۆ بێتە کرن. ژبیر نەکەن عێراق ب شکلەکێ گشتی ئێک ژ وان دەولەتایە کو پرسا ئاڤوھەوای باندۆرەکا گەلەک یا مەزن لێکریە.

پێویستە گرنگییەکا بەردەوام و تایبەت بدەنە ناڤەندێت لێکۆلینا زانستی و، ھاریکاری د ناڤبەرا زانکۆیێت کوردستانێ و عێراقێ و جیھانێدا زێدەتر بکەن. زانکۆێت مە پێدڤیە بەشەکێ دانەبڕیای بن ل زانکۆ و ناڤەندێت زانستی یێت جیھانێ.

ھەروەسا گرنگییەکا جددی بدەنە زانستێت مرۆڤی، ئاڤاکرن و پێشڤەبرنا شیانێت مرۆڤی و خورتکرنا ڤیان و ئینتیمایا گەنج و لاوێت مە، بۆ وەلات و مللەتێ خۆ، ئەڤە بنگەھا پێشکەتنا ھەر مللەتەکی یە.

لدویماھیێ،

دیسا پیرۆزباھیێ ل دەرچوویا و سپاس و پێزانینەکا تایبەت پێشکەشی سەرۆکاتی و دەستەیا مامۆستایێت زانکۆیا دھۆکێ دکەم. ھەوە خزمەتەکا زۆرا کری، زەحمەت و ئەرکەکێ زۆرێ کێشای بۆ پێگەھاندنا ڤان دەرچوویێت خۆشتڤی یێت ئەڤرۆ، ئەز ب گەرمی ب ناڤێ خۆ و ب ناڤێ ھەمیا پیرۆزباھی و دەستخۆشییەکا گەرم ل وە ھەمیا دکەم. ھەروەسا پشتەڤانی و دەستخۆشیێ ل ھەولێت زانکۆیا دھۆکێ دکەم بۆ دامەزراوەییکرنا زانکۆیێ و بلندکرنا کوالیتییا خویندنێ ل زانکۆیا دھۆکێ، بێ شک ئەڤرۆ سال ب سال جیێ دەستێ وە دیارە، ئەز پیرۆزباھیێ ل وە دکەم و ھیڤیا سەرکەفتنێ ژی د ڤی بواریدا بۆ ھەوە داخواز دکەم ب ئانەھیا خودێ.

قوتابی یێت خۆشتڤی ب ناڤێ وە و ب ناڤێ خۆ و ب ناڤێ ھەمیا سوپاس و دەستخۆشییەکا گەرم بۆ دایکوباب و مالبات و کەسوکارێت ھەوە، یێت ھەوە دەرچۆییا کو گاڤ ب گاڤ، بەردەوام پشتەڤان و ھاریکارێت ھنگۆ بووینە،‌ داکو کچ و کوڕێت وان، بشێن خویندنا خۆ یا زانکۆیی بدویماھی بینن، ئەز ب ناڤێ وە سپاسییەکا گەرما وان دکەم. وەستیانا مالباتێت وە دگەل ھنگۆ و قوربانیدان و پشتگیرییا وان، جھێ ڕێز و پێزانینەکا زۆرە.

دەرچوویێت خۆشتڤی،

گەنجێت ھێژا و دەلال،

ژبیر نەکەن، ھوین ئومێد و پاشەڕۆژا کوردستانێنە. باب و باپیرێت ھەوە، ب گیان و خوینا خۆ، ب خەبات و قوربانییا خۆ، کوردستان پاراست، ئەڤرۆ ژی ئەو ئەمانەت کو وەلاتە، ئەڤ مللەتەیە، یێ د دەستێ ھەوەدا، کوردستان ئەمانەتی ھەوەیە. ھیڤییا سەرکەفتن و پێشکەفتنا بەردەوام بۆ ھەوە ھەمیا دخازم.

بۆ ئاڤاکرنا جڤاکەکا سەرکەفتی، جڤاکەکا پێشکەفتی یا تژی ھیڤی و شکۆمەندی. یێ کو ب ئومێدەکا مەزن بەرێ خۆ ددەتە پاشەڕۆژەکا گەشتر، ھیڤیا من ئەوە ھون ئەو بن وی ئالای ھەلگرن و کوردستانێ ل ڤێ قۆناغێ بەرەڤ قۆناغەکا گەشتر ببەن، مە ئومێد یا ب ھەوە ھەی و ھیڤیدارین ھون بزانن ئەڤ ئەمانەتە یێ لسەر ملێ ھەوە و ھیڤیدارم بەردەوام د سەرکەفتنێ و پێشکەفتنێدا بن.

سلاڤ ل گیانێ پاقژێ شەھیدێت کوردستانێ، کو ئەڤرۆ ب سایا سەرێ وان و خوینا وان شەھیدا، کوردستان یا ئازاد و یا سەفەرازە و دێ یا سەرفەراز مینیت.

ھەر ھەبن، ھەر شاد بن.

گەلەک سپاس بۆ وە ھەمیا، ھیڤییا ئێڤارییەکا خۆش بۆ ھەوە داخاز دکەم. دیسا پیرۆزبیت ل وە ھەمیا و سەرکەفتی بن، تەمەندرێژ بن د ژیانێدا.

ب خێر بێن سەر چاڤا.