ژبه‌ركو ل ساڵا بورى و ل ئه‌ڤ ساڵه‌ ژى به‌رهه‌مێ خومالی یێ زاخۆ دگه‌ل به‌رهه‌مێن ده‌ڤه‌رێن دى یێن هه‌رێما كوردستانێ بۆ ژده‌رڤه‌ى وه‌ڵاتى هاتییه‌ هنارتن, دئه‌ڤ ساڵه‌ دا ئێكه‌م ڤیسته‌ڤاڵا هنار و هنگڤینى ل زاخۆ هاته‌ ڤه‌كرن, كو دئه‌ڤ ساڵه‌ دا نێزیك 14 هزار تۆنێن هناران دگه‌ل 16 تۆنێن هنگڤینى ل سنوورێ ئیدارەیا زاخۆ هاتینه‌ به‌رهه‌م ئینان.

ل رێكه‌فتى 18ى هه‌یڤا 10 ساڵا 2023ێ ڤیسته‌ڤاڵا ئێكێ یا هنار و هنگڤینى ل ئیدارا سه‌ربه‌خۆ یا زاخۆ بۆ 15 جوتیارێن هناران و 15 هنگه‌ڤانان ل ژێر چاڤدێرییا سه‌رپه‌رشتێ ئیدارێ “گۆهدار شێخۆ” هاتییه‌ ڤه‌كرن, تێدا كه‌ریم سه‌لمان بریكارێ وه‌زاره‌تا چاندنێ و سه‌لمان موحه‌مه‌د رێڤه‌به‌رێ گشتى یێ چاندنا زاخۆ و هژماره‌كا زور یا رێڤه‌به‌ر و به‌رپرسێن حكومى و حزبى, و جه‌ماوه‌ره‌كێ مه‌زن ژخه‌لكێ ده‌ڤه‌رێ و بیانییان ئاماده‌بوون.

سه‌لمان موحه‌مه‌د رێڤه‌به‌رێ گشتى یێ چاندنا ئیدارا سه‌به‌خۆ یا زاخۆ بۆ مالپه‌رێ فه‌رمى یێ پارتى دیموكراتى كوردستان سەبارەت ب ڤیستەڤاڵێ دبێژیت: "ل زاخۆ ئه‌نجامدانا ڤان جوره‌ ڤیسته‌ڤاڵان گرنگییه‌كا مه‌زن هه‌یه‌ ژبه‌ركو زاخۆ ده‌ڤه‌ره‌كا چاندنێ یه‌ و ئه‌رده‌كێ به‌رفره‌ه هه‌یه‌, و مه‌ره‌م ژڤه‌كرنا ڤان جورە ڤیسته‌ڤاڵان نیشاندانا به‌رهه‌مێ خومالى یێ جوتیارانه‌ بۆ هندێ كه‌رتێ چاندنێ ل زاخۆ خورت تر ببیت و به‌رهه‌مێ جوتیارێن مه‌ به‌رده‌وام دقوناغێن بازاركرنێ دابن دگه‌ل هه‌مى جیهانێ".

ب پشته‌ڤانییا حكومه‌تا هه‌رێما كوردستانێ بۆ كه‌رتێ چاندنێ, نوكه‌ به‌رهه‌مێ خومالى یێ هه‌رێما کوردستانێ بۆ ژده‌رڤه‌ى وه‌ڵاتى دهێته‌ هنارتن و به‌رهه‌مێ زاخۆ ژى دناڤدا هه‌یه‌ چونکە ل سنوورێ ئیدارا سه‌ربه‌خۆ یا زاخۆ 300 جوتیارێن خۆدان چنینكێن فێقى هه‌نه‌ هه‌روه‌سا 450 جوتیارێن چاندنا گه‌نمى, و 400 جوتیارێن خودان ئاژه‌ل, و 250 مێشڤان هه‌نه‌.

و ژبەر کو هنار و هنگڤین ژبەرهمێن زاخۆ یێن بناڤ ودەنگن، 2 هزار و 825 دونه‌مێن ئه‌ردى ل سنورێ ئیدارا سه‌ربه‌خۆ یا زاخۆ ژبۆ 339 هزار دارێن هناران هاتینه‌ ته‌رخانكرن هه‌روه‌سا 6 هزار و 439 ماڵه‌ مێشێن هنگڤینى ل زاخۆ دهێنه‌ ب خۆدان كرن و ساڵانه‌ دناڤ به‌را 12 هزار هه‌تا 14 هزار تۆنێن هناران, و 16 تۆنێن هنگڤینى دهێنه‌ به‌رهه‌م ئینان زێده‌بارى هزاره‌هان تۆنێن به‌رهه‌مێن فێقى و زه‌رزه‌وات و گه‌نمى.

سه‌جا شێرزاد-دهۆك