دهۆک -KDP.info- رێڤەبەرێ گەشتوگۆزارێ ل ئیدارا سەربەخۆ یا زاخۆ دیار کر کو پتری 486 هزار گەشتیاران د ئەڤ سالە دا سەرەدانا هاڤینگەهـ و بنگەهێن گەشتیاری یێن ل سنوورێ ئیدارا سەربەخۆ یا زاخۆ کریە و د هەمان دەم دا ژمارەکا باش یا پرۆژێن وی یێن گەشتیاری ل سنوورێ هەمان ئیدارە هاتینە ڤەکرن و هندەک بنگەهێندی ژی نوکە د قووناغا بجهئینانێ دانە.

چیا ئەمین، رێڤەبەرێ رێڤەبەریا گشتی یا گەشتوگۆزارێ ل ئیدارا سەربەخۆ یا زاخۆ د کۆنگرەکێ رۆژنامەڤانی دا ئاشکرا کر کو ژ رۆژا 1/1/2022 هەتا رۆژا 24/12/2022 ژمارا گەشتیارێن سەرەدانا هاڤینگەهـ و بنگەهێن گەشتیاری یێن ل سنوورێ ئیدارا سەربەخۆ یا زاخۆ کرین گەهشتیە 486 هزار و 152 گەشتیارا، ژ ڤی سەرجەمی 198 هزار و 938 گەشتیاران ژ پارێزگەهێن ناڤەڕاست و ژێریا عیراقێ و 287 هزار و 214 گەشتیاران ب رێیا خالا سنووری یا ئیبراهیم خەلیل سەرەدانا زاخۆ کریە و گۆت: "پێشبینیا هاتنا پتری 50 هزار گەشتیاران دهێتەکرن ب هەلکەفتا سەرێ سالا نوی یا زایینی 2023 سەرەدانا ئیدارا سەربەخۆ یا زاخۆ بکەن و هەمی بەرهەڤی ژی بۆ ڤێ مەرەمێ هاتینەکرن".

ناڤهاتی ئاماژە دا وێ چەندێ کو 20 ملیار دینار ل سەردەمێ کابینا نەهێ یا حکومەتا هەرێما کوردستانێ دا ل سالا 2022 بۆ پرۆژێن گەشتیاری یێن ئیدارا سەربەخۆ یا زاخۆ هاتینە مەزاختن، د پلان دایە ل سالا 2023 ژی ژمارەکا مەزن یا پرۆژێن گەشتیاری ل زاخۆ بکەڤنە د بوارێ بجهئینانێ دا و گۆت: "بەرهەڤی هاتینەکرن بۆ دانانا دەڤەرا گەشتیاری ل شەرانشێ کو 40 ملیۆن دینار بۆ ڤێ مەرەمێ ژی هاتینە دابینکرن ئەڤە د دەمەکی دایە کو د ئەڤ سالە دا 193 ملیۆن و 651 هزار دینار داهاتێ گەشتیاری بووینە".

ل دووماهیێ رێڤەبەرێ گەشتوگۆزارا زاخۆ خویا کر کو پشتی زاخۆ بوویە ئیدارا سەربەخۆ 76 مۆلەتێن گەشتیاری ل سالا 2021 و 163 مۆلەتێن گەشتیاری ل سالا 2022 هاتینەدان، هەروەسا بەرێ بنیاتی بۆ دوو ئۆتێلێن پێنج ستێر هاتیە دانان و د پلاندایە بەرێ بنیاتی بۆ سێ ئۆتێلێن دی ژی یێن پێنج ستێر و چەندین پرۆژێن دی یێن گەشتیاری بهێتە دانان.

رێوار محەمەد رەشید