هەولێر-KDP.info- وەزارەتی سامانە سروشتییەكانی حكوومەتی هەرێمی كوردستان، لە ڕاگەیاندراوێكی فەرمیدا، زانیاریی نوێ لەبارەی بردنەوەی حكوومەتی هەرێمی كوردستان، لە دۆسیەی ناوبژیوانیی دژی کۆمپانیای (گەنێل ئینێرجی میران بینا باوی لیمیتەد - GEMBBL)، زانیاریی نوێی ئاشكرا كرد.
ئەمڕۆ یەكشەممە 6/4/2025، وەزارەتی سامانە سروشتییەكانی حكوومەتی هەرێمی كوردستان، ڕاگەیاندراوێكی بڵاو كردەوە و تێیدا هاتووە: "حکوومەتی هەرێمی کوردستان لە دۆسیەی ناوبژیوانیی دژی کۆمپانیای (گەنێل ئینێرجی میران بینا باوی لیمیتەد - GEMBBL) قەرەبووی بەرچاوی تێچووی یاسایی دەکرێت."
ئەوەش خراوەتە ڕوو: "بڕیارەکە دوای بڕیاری دادگای ناوبژیوانی دێت کە لە کانوونی دووەمی 2024دا کە تێیدا دادگاکە بڕیاری دا حکوومەت بەشێوەیەکی ڕەوا PSCی بینا باوی و میرانی هەڵوەشاندەوە و هەموو داواکارییەکانی کۆمپانیای (گەنێل ئینێرجی میران بینا باوی لیمیتەد)ی لە دژی حکوومەت ڕەت کردەوە."
وەزارەتی سامانە سروشتییەكان ڕوونیشی كردووەتەوە، لە 4ی نیسانی 2025، دادگای ناوبژیوانی بڕیاری کۆتایی خۆی سەبارەت بە تێچوونەکان دەرکرد کە تێیدا بڕیاری دا، کۆمپانیای (گەنێل ئینێرجی میران بینا باوی لیمیتەد) بڕی 26 ملیۆن و 868 هەزار و 905.29 دۆلاری ئەمریكی بە حكوومەت بدات، لەگەڵ سوودی دوای بڕیارەكە."