دیبەگە-KDP.info- د. پشتیوان سادق، ئەندامی مەکتەبی سیاسیی پارتی دیموکراتی کوردستان و بەرپرسی مەکتەبی ڕێکخستنی پارێزگای هەولێر، ڕایدەگەیەنێت، ئەو بنەمایەی عێراقی نوێی لەسەر دامەزرێنرا، جێبەجێ نەکراوە و بەرپرسانی بەغدا پابەندی دەستوور نەبوونە.
ئەمڕۆ یەکشەممە، 06-04-2025، لە ناحیەی دیبەگەی سەر بە پارێزگای هەولێر، لە ڕێوڕەسمێکدا، بە ئامادەبوونی ژمارەیەک بەرپرسی حکوومەتی و حزبی، پەردە لەسەر مۆنۆمێنتی شەهیدانی 'کارەساتی 6ـی نیسانی 2003' لا درا. لەو ڕۆژەدا، لە ئەنجامی بۆمبارانی هەڵەی فڕۆکە جەنگییەکانی هاوپەیمانان، فەرماندە وەجیهـ بارزانی بە سەختی بریندار بوو و 17 پێشمەرگەی دیکەش شەهید بوون.
د. پشتیوان سادق، ئەندامی مەکتەبی سیاسیی پارتی دیموکراتی کوردستان و بەرپرسی مەکتەبی ڕێکخستنی پارێزگای هەولێر، لــە گوتاری ڕێوڕەسمەکەدا ڕایگەیاند، "هەرێمی کوردستان و پێشمەرگە ڕۆڵی گرنگیان لە ئازادکردنی عێراق و نووسینەوەی دەستوور بیینی، بەڵام ئەو بنەمایەی عێراقی نوێی لەسەر دروست کرا، جێبەجێ نەکراوە و بەرپرسانی بەغدا پابەندی دەستوور نەبوونە."
پشتیوان سادق، جەختی لەوەش کردەوە، "ڕووداوەکانی 06ـی نیسان، ئەوەیان نیشان دا، سەرۆک بارزانی و کەسە نزیکەکانی هەردەم لە ڕیزی پێشەوەی بەرگریی بوون لە کوردستان، لەم پێناوەشدا قوربانییان داوە."
بەرپرسی مەکتەبی ڕێکخستنی پارێزگای هەولێر، لــە بەشێکی دیکەی قسەکانیدا ئاماژەی بەوەش دا "حکوومەتی هەرێمی کوردستان کاری زۆر گەورەی کردووە و ئاسۆی داهاتووی خەڵکی کوردستان ڕوونە."
