هەولێر-KDP.info- بەرپرسی لقی دووی پارتی دیموکراتی کوردستان ڕایگەیاند، ھیچ بەربەستێکی ئەوتۆ لە بەردەم پێکھێنانی کابینەی تازەی حکوومەتی ھەرێمی کوردستاندا نەماوە و دەشڵێ، ئومێد دەکەین دوای جەژن چەند کۆبوونەوەیەکی دیکە بکرێن و کابینەی تازە پێک بێت و ساڵی  ٢٠٢٥ ببێتە مایەی ئارامی و ئاسوودەیی بۆ خەڵکی ھەرێمی کوردستان، چونکە ھەردوولا جددیین بۆ ئەوەی پێکەوە کار بکەین و حکوومەتی تازە دابمەزرێنین.

بڵند ئیسماعیل، بەرپرسی لقی دوو، لە لێدوانێكی تایبه‌تدا بۆ ماڵپەڕی فەرمیی پارتی دیموکراتی کوردستان ڕایگەیاند، پارتی دیموکراتی کوردستان و یەکێتیی نیشتیمانیی کوردستان، بۆ پێکھێنانی کابینەی دەیەمی حکوومەتی ھەرێمی کوردستان ھەنگاوی باشیان بڕیوە، ھیوادارین دوای جەژن چەند کۆبوونەوەیەکی دیکەش بکرێن و کۆتایی بە پرسی دابەشکردنی پۆستەکانیش بێت و لە ئاییندەیەکی نزیکدا کابینەی تازە پێک بێت.

بەرپرسی لقی دووی پارتی، هەروەها ئەوەشی نەشاردەوە كە نیەتێکی باش ھەیە بۆ ئەوەی پارتی و یەکێتی پێکەوە کابینەی نوێ دابمەزرێنن و ھیچ بەربەستێکی ئەوتۆ نابینین و ھەردوولاش داواکاریی خۆیان ھەیە، بەڵام دڵنیام بەسەریدا زاڵ دەبین و بەرژه‌وەندیی ھەرێمی کوردستان و دروستکردنی کابینەی تازە، گرنگترە لەوەی کام پۆست بەر کام لایەن دەکەوێت.

بڵند ئیسماعیل دەشڵێت، كابینەی دەیەمی حکوومەتی ھەرێمی کوردستان، دەستکەوتێکی زۆر باش و گەورەیە بۆ خەڵکی ھەرێمی کوردستان، بۆیە ئومێدەوارین بە زووترین کات پەلەی لێ بکرێت و دابمەزرێت و ئەو گرفتانەی ھەن چارەسەر بکرێن، بۆیە ئاواتەخوازین ساڵی ٢٠٢٥ ساڵێکی ئارامی و دڵخۆشی و دوور بێت لە گرفت و کوردستانیان بە ئاسوودەیی بژین، چونکە جددیەت لە ھەردوولا ھەیە و مادام بڕیاری گفتوگۆ درا و لەسەر ئەو بنەمایە رێککەوتن پێکەوە کار بکەن و لە حکوومەتدا بەشدار بن، ئەگەر بەربەستیش ھەبێت بەسەریدا زاڵ دەبن.

بڵند ئیبراھیم