لەندەن-KDP.info- وەزیری ناوخۆی هەرێمی کوردستان بۆ بەشداریی لە لووتکەی ئاسایشی سنوور، لە بەریتانیایە و گوتارێک پێشکەش دەکات.
ڕێبەر ئەحمەد، وەزیری ناوخۆی حکوومەتی هەرێمی کوردستان، بە یاوەری ژمارەیەک بەرپرسی حکوومی، لەسەر بانگهێشتنامەی فەرمی وەزارەتی ناوخۆی حکوومەتی بەریتانیا، بۆ بەشداریی لە لووتکەی ئاسایشی سنوور، لە لەندەنە.
لوتکەی ئاسایشی سنوور ئەمڕۆ دووشەممە، 31-03-2025، بە فەرمی دەست بە کارەکانی دەکات و دوو ڕۆژ دەخایەنێت. وەزیرانی ناوخۆ و داد و بەرپرسانی ئاسایشی سنووری ژمارەیەکی زۆری وڵاتان تێیدا بەشدا دەبن.
لە ڕۆژی یەکەمدا، کیێر ستارمەر، سەرۆک وەزیرانی بەریتانیا گوتاری کردنەوەی لووتکەکە پێشکەش دەکات و دواتر بەرنامەکانی لووتکە دەست پێ دەکات.
بڕیارە لە پەنێڵی یەکەمدا کە وەزیری ناوخۆی بەریتانیا سەرپەرشتی دەکات، ڕێبەر ئەحمەد، وەزیری ناوخۆی حکوومەتی هەرێمی کوردستان یەکێکە لە پانێلیستەکان و گوتارێک پێشکەش بکات.
وەزیری ناوخۆی حکوومەتی هەرێمی کوردستان ئێوارەی ڕۆژی یەکشەممە، 30-03-2025، لە ڕێورەسمی پێشوازیی بۆنەکە، لەگەڵ ییڤیت کوپەر، وەزیری ناوخۆی بەریتانیا کۆبووەوە.
هەمان ڕۆژ، ڕێبەر ئەحمەد لەگەڵ وەزیری ناوخۆی حکوومەتی فیدراڵیی عێراق، وەزیری ناوخۆی ئەڵمانیا، وەزیری کۆچی هۆڵەندا، وەزیری دادی سوید، وەزیری کۆچی چین، وەزیری ناوخۆی بولگاریا، ژمارەیەک وەزیر و بەرپرسانی پایەبەرزی سنوور و ئاسایشی وڵاتانی دیکە کۆبووەوە.