دهۆک-KDP.info- نەوروز، هێمایێ نوی بوون و دیتنێن گەشبین و دەسپێکرنا ئاشتیێ یە، خەلکێ دهۆکێ ژی، وەکو هەر ساڵ، دناڤا سروشتێ جوانێ کوردستانێ دا گەشت کرینە، و نەوروزا خۆ ب ئومێدێن نوی دبورینن، ماڵپەرێ فەرمی یێ پارتی دیموکراتی کوردستان دڤێ نەوروزێ دا، وەکو هەر خێزانەکا کورد دناڤا خێزانان دا بوو، گوه ددا ئومێد و هیڤیێن خەلکێ بۆ ڤێ رۆژێ، بابێ ئازادی، دان عەمرەکێ دهۆکی بوو، و ٦٠ ساڵێن تەمەنی دەربازکرینە، ب دێمەکێ گەش بۆ مالپەری دبێژیت: نەوروزا هەمی کوردان پیروزە، ئەڤە جەژنا مەیە ئەم خۆ پێ نیشا هەمی جیهانێ ددەین، دەهان ساڵان ل ژێر فشارا شەر و شورەشان ژبۆ کوردینیێ، مە ژبۆ رۆژەکا هۆسا بوو، ب ئازادی و ل بەرەدەم هەمی جیهانێ ئاگرێ ئازادییا خۆ هەڵ بکەین”.
ل وێڤەی بابێ ئازادی، هاولاتییەکێ گەنج ل سەر چوکێن خۆ روینشتبوو، ئەوی ئاگرەکێ گەلەک جوان و گەرم و گور هەڵ دکر، دیارە ئەو یێ شارەزابوو دڤی کاری دا، بەرسڤا وی بۆ مالپەری ئەڤە بوو دەمێ پسیار ژێ کری: ئەڤە چ ئاگرێ جوانە تە هەلکری؟ ئەوی ژی ب گرنژین بەرسڤ دا “ئەڤە خۆشترین نەوروزا منە، ئەز نوکە خودان پرۆژەمە، خوارن و ڤەخوارنێن سەر پەلان دفروشم ل چیایێ زاوا، ژلەوما دزانم جوان ئاگری هەڵ بکەم، پارێزگەها دهۆکێ رۆژ بۆ رۆژێ پێشدکەڤیت و پرۆژێن باش لێ ڤەدبن، ئەڤە ژی هاری مە دکەت ئەم گەنج سەربکەڤین و ژیارا خۆ ب باشترین شێوە ببورینین”.
گەلەک خێزانێن دی ل وێرێ هەبوون، ژوانا ژی ئافرەتەک ب جل و بەرگێن کوردی خۆ داپوشی بوو، چوار کچێن دی ژی یێن گەنج ب هەمان جل دگەل دا بوون، ئەوێ گەلەک جوان ب خێرهاتنا مالپەری کر و گوت: “ستافێ مالپەری ب خێر بهێت بۆ ڤێرێ، پەیاما مە یا کەیف خۆشیێ یە، ئەڤرۆ دهۆک هند پێشکەفتییە و ئازادە، ئەز و کچێن خۆ شیاین ب تنێ و ب بێ زەلام بەژداری گەشتێن نەوروزێ ببین، گەلەک خەلک یێن بیانی ژی ئامادەنە، هەمی خەلک ل ڤێرێ خۆیشک و برانە، ئەڤە ژی پێشکەفتن و ئارامییا دهۆکێ بۆ هەمی جیهانێ دسەلمینیت”.
کچەکا وێ ژی ب ناڤێ گولیک بوو، سوحبەتا مە بری و گوت، “ئەم دونیایەکێ کەیف خۆشین دڤان هەلبژارتنێن دویماهیێ دا ژی پارتی دیموکراتی کوردستان ب سەرکەفت، دگەل ڤێ کابینێ و ل ڤێ نەوروزێ مە هیڤییەک مەزن ب پاشەرۆژا کوردستانێ هەیە، ئەم گەنج ب هەبوونا سەروکێ خۆ پشت راستین”.
کەیف خۆشی و گرنژین ل سەر دێمێ هەمی وان هاوڵاتییان دیاربوو، هندەکان گۆڤه‌ند و دیلان دکر، و هندەکێن دی ژی ئاگر هەڵ دکر و هەبوون ژی سفرێن خۆ ژبۆ خوارنا فتارێ ئامادە دکرن، هەمییان ئێک ئومێد و ئێک هیڤی هەیە، ئەو ژی، ل ژێر سیبەرا حکومەتا هەرێما کوردستانێ ب ئامارامی بمینن و کوردستانەکا بهێز ئاڤا بکەن.
سەجا شێرزاد