Hewlêr-KDP.info-Kovara Forbesê ya Amerîkî raportek derbarê rola Herêma Kurdistanê û Serok Barzanî di aramiya navçeyê û şerê li dijî terorê de belav kir. Her wiha pesnê rol û bandora Serok Barzanî di yekxistina helwesta Kurd û çareserkirina pirsa Kurd li Sûriyê dike.
Di derbarê hevdîtina Serok Barzanî û Fermandarê Giştî yê Hêzên Sûriyeya Demokratîk Mezlûm Ebdî de, kovarê tekez li ser wê yekê kir ku Serok Barzanî roleke wî ya girîng di yekxistina helwesta Kurd li Sûriyê de heye. Herwiha hevdîtina wan jî ji bo destpêkirina danûstandinên di navbera partiyên kurd ên Sûriyeyê de girîng e.
Her wiha, Forbes tekezî li ser rola hêzên Pêşmerge di şerê li dijî terorê de kir, ku Pêşmerge li kêleka hêzên Amerîka û hevpeymanan di şerê DAIŞê de şer kiriye. Her dema ku metirsiya DAIŞê hebe, Serok Barzanî amadehiya hêzên Pêşmerge bo şerê li dijî terorê tekez kiriye.
Di dawiya raporê de behsa vê yekê tê kirin :ji ber van sedeman, Herêma Kurdistanê wek hevalbendeke hertimî û stratejîk a Waşîntonê û şirîkekî pêbawer ji bo Amerîkayê di vê navçeya aloz a cîhanê de dimîne.