پیرمام-KDP.info- ئه‌مڕۆ سێشه‌ممه 17ی 12ی 2024، له باره‌گای مه‌كته‌بی سیاسیی پارتی دیموكراتی كوردستان له پیرمام، هه‌ردوو شاندی دانوستانكاری پارتی و یه‌كێتی كۆ بوونه‌وه.
دوای كۆبوونه‌وه‌كه ڕاگه‌یاندراوێكی هاوبه‌شیان بڵاوكرده‌وه و تیایدا هاتووه، له كۆبوونه‌وه‌كه‌دا بارودۆخی ناوچه‌كه و ئه‌و گۆڕانكاریانه‌ی كه هاتوونه‌ته ئاراوه و كاریگه‌رییان له‌سه‌ر عێراق و هه‌رێمی كوردستان خرانه به‌ر باس، هه‌ردوولا كۆك بوون له‌سه‌ر ته‌بایی و هاوهه‌ڵوێستی له پارێزگاریكردنی به‌رژه‌وه‌ندییه باڵاكانی هه‌رێمی كوردستان له‌م قۆناغه هه‌ستیاره‌دا.
هه‌ر له ڕاگه‌یاندراوه‌كه‌دا ئه‌وه‌ش خراوه‌ته ڕوو، ته‌وەرێكی كۆبوونه‌وه‌كه باس له هه‌نگاوه‌كانی پێكهێنانی كابینه‌ی تازه‌ی حكوومه‌تی هه‌رێمی كوردستان و هه‌نگاوه‌كانی پێویست بۆ سه‌رخستنی ئه‌و پرۆسه‌یه كرا، هه‌ردوولا هاوڕابوون كه به زووترین كات له‌سه‌ر ئاماده‌كردنی به‌رنامه‌یه‌كی هاوبه‌ش بۆ ئه‌و بنه‌مایانه‌ی كه حوكمڕانیی كوردستانیان بۆ قۆناغی ئاینده له‌سه‌ر به‌ڕێوه‌ده‌چێت بكه‌ن، به‌شێوه‌یه‌ك كه پارێزگاری له پێگه و سه‌قامگیریی هه‌رێمی كوردستان و ماف و به‌رژه‌وه‌ندییه‌كانی هاووڵاتیان و سه‌رجه‌م پێكهاته‌كانی بكات.
له كۆتاییدا ئه‌وه‌ش هاتووه، له‌م ڕووه‌وه بڕیاردرا لێژنه‌یه‌كی هاوبه‌ش كار له‌سه‌ر ئاماده‌كردنی ڕه‌شنووسی ئه‌و به‌رنامه‌یه بكات، بۆ كۆبوونه‌وه‌ی ئاینده.