ھەولێر-KDP.info- بەڕێوەبەری کوشتارگەی ھاوچەرخی ھەولێر دەڵێ، بڕیاری حکوومەت بۆ دابەزاندنی نرخی گۆشت، کاریگەریی لەسەر بازاڕ ھەبووە و نرخی گۆشت بە ھۆی بڕیاری سەرۆکی حکوومەتەوە، سێ تا چوار ھەزار دینار دابەزیوە.
ھەڵمەت ھەمزە سلێمان، بەڕێوەبەری سەربڕخانەی ھاوچەرخی ھەولێر، تایبەت بە ماڵپەڕی فەرمیی پارتی دیموکراتی کوردستانی ڕاگەیاند: دوای ئەوەی نرخی گۆشتی سوور بە شێوەیەکی بەرچاو لە ھەرێمی کوردستان بەرز بووەوە، لە مانگی ئاداری ساڵی ڕابردوودا حکوومەتی ھەرێمی کوردستان ژمارەیەک بڕیار و ڕێنمایی دەرکرد بۆ بەرژەوەندیی گشتی و دابەزاندنی نرخی گۆشت لە بازاڕدا، بڕیارەکە سەدا سەد چووەتە بواری جێبەجێکردنەوە و لە ئێستادا بەپێی ڕێنمایی نوێ ئاژەڵ ھاوردەی ھەرێمی کوردستان دەکرێت.
بەڕێوەبەری کوشتارگەی ھاوچەرخی ھەولێر گوتیشی: ساڵی ڕابردوو نرخی یەک کیلۆ گۆشتی سوور گەیشتبووە زیاتر لە ٢٠ ھەزار دیناری عێراقی، بەڵام بە ھۆی بڕیاری حکوومەتی ھەرێمی کوردستانەوە، نرخی ھەر کیلۆیەک گۆشت سێ تا چوار ھەزار دینار دابەزیوە و پێشبینی دەکەین ھێشتا نرخەکەی دابەزێت.
ھەڵمەت ھەمزە ئاماژەی بۆ ئەوەش کرد: لە کوشتارگەی ھاوچەرخی ھەولێر لە ژێر چاودێریی تەندروستی و بەپێی ستاندارد ئاژەڵ سەردەبڕین و ڕۆژانە ٤٥ تا ٥٠ تۆن بەرھەمی گۆشت ڕەوانەی بازاڕ دەکرێت.
قائید میرۆ