فەرەنسا-KDP.info- نوێنەری حکوومەتی ھەرێمی کوردستان لە فەرەنسا گوتی: ھەڵبژاردنی خولی شەشەمی پەرلەمانی کوردستان جێگەی خۆشحاڵی وڵاتانە، چونکە ھەرێمی کوردستان فاکتەرێکی گرینگی ئارامی ناوچەکەیە، ئەمەش پێگەی ھەرێمی کوردستان لەسەر ئاستی نێودەوڵەتی بەھێزتر دەکات.

دکتۆر عەلی دۆڵەمەری، نوێنەری  حکوومەتی ھەرێمی کوردستان لە فەڕەنسا، بە ماڵپەڕی فەرمیی پارتی دیموکراتی کوردستانی ڕاگەیاند: ھەڵبژاردنی پەرلەمانی کوردستان ھەنگاوێکی زۆر گرینگ بوو، حکوومەتێکی تازە پێکدێت و پەرلەمانی کوردستانیش لەلایەن خەڵکی ھەرێمی کوردستان ھەڵبژێردرا.
ھەرێمی کوردستان لە ناوچەکە فاکتەرێکی سەرەکییە ئەمەش وا دەکات ھەرێمی کوردستان زیاتر بچێتە پێشەوە و پەیوەندییەکانیشی لەگەڵ عێراق و دەرەوەش بەھێزتر بکات، بۆیە زۆر گرینگ بوو ئەم ھەڵبژاردنە بەسەرکەوتوویی و بێگرفت ئەنجامدرا، ڕێژەی بەشداریکردنی خەڵکیش لەو ھەڵبژاردنە زۆر بەرز بوو.

د.عەلی دۆڵەمەری گوتیشی: وڵاتی فەرەنسا یەکەم وڵات بوو، دوای ھەڵبژاردن پیرۆزبایی سەرکەوتنی لە ھەرێمی کوردستان کرد، ھەمیشەش ھاوکار بووە و ھاوکار دەبن بۆ ھەرێمی کوردستان، ئەوان بەردەوام پەیوەندییان لەگەڵ حکوومەتی ھەرێمی کوردستان دەبێت، بۆ پارتیش باشە پەیوەندییەکان لەگەڵ فەرەنسا بەھێزتر بکات، چونکە فەرەنسا ئامانجی ئەوەیە بەزووترین کات کابینەی ١٠یەمی حکوومەتی ھەرێمی کوردستان پێکبێت، بۆ ئەوەی بتوانێت مافەکانی خۆی لە عێڕاق وەربگرێت.

دۆڵەمەری ڕوونیکردەوە: بۆ ئێمەش وەکو نوێنەرایەتییەکان لە دەرەوە پێکھێنانی کابینەی تازە زۆر باشە، تا بتوانین زیاتر پەیوەندییەکان لەگەڵ وڵاتان بەهێز بکەین، چونکە ھەرێمی کوردستان تاکە ناوچەیە گرینگی بە دیموکراسییەت و مافی مرۆڤ دەدات، ئەگەر ھەڵبژاردن نەبێت دەبێتە گرفت، چونکە ھەرێمی کوردستان زۆر گرینگە بۆ وڵاتان، لە هەموویشی گرینگتر: "ڕێگە نەدرا ئەو پێکەوەژیانەی ھەیە تێکبدرێت"، بۆیە ئەم ھەڵبژاردنە ھەنگاوێکی گرینگ بوو بۆ ھەرێمی کوردستان بۆ ئەوەی لە ئاستی نێودەوڵەتی زیاتر بچێتە پێشەوە.
بڵند ئیبراھیم