هەورامان - KDP.info - حکوومەتى هەرێمى کوردستان بە گوژمەیەکی زۆر، بۆ گرنگى دان بە ناوچە گەشت و گوزارییەکان و پاراستنى گیانى هاووڵاتییان لە هەر ڕووداوێکى هاتوچۆ، ڕێگاى (بیارە _ تەوێڵە) نۆژەن دەکاتەوە و ڕێگاى گەڕیان لە ناو تەوێڵە قیڕدەکات، بەڕێوەبەرى ناحیەى بیارەش ئاماژەی بە گیروگرفتی ڕێگاوبانەکانی سنوورەکەی کرد.
حەمید بارام بەڕێوەبەرى ناحیەى بیارە بە ماڵپەڕى فەرمیى پارتى دیموکراتى کوردستانى ڕاگەیاند: بە سێ دەرخستە نۆژەنکردنەوەى ڕێگاى (ناحیەى بیارە _ تەوێڵە) دراوە بە وەزارەتى ئاوەدانکردنەوە و نیشتەجێکردن، ڕەزامەندى لەسەر هەرسێ قۆناخەکەى کراوە، ئێستا ڕەزامەندى قۆناغى یەکەمى هاتووەتەوە بۆ قیڕکردنى نێوان بیارە و گوندى بەڵخە، بە بوودجەى ١٥٣ ملیۆن و ٥٦٠ هەزار دینارە.
حەمید بارام گوتیشی: "قۆناغى دووەم لە گوندى بەڵخە بۆ گوندى بەڵخە سۆسەکانە بە بوودجەى ٥٣ ملیۆن دینار جێبەجێ دەکرێت، هەوڵەکان چڕ بوونەتەوە بۆ ئەوەى بتواندرێت بەردەوامى بدرێت بۆ نۆژەنکردنەوە و قیڕکردنى تەواوى ڕێگاى بیارە بۆ تەوێڵە، ئەو ڕێگایە گرنگە بۆ هەورامان".
پێشتر کێشەی ڕێگاوبانمان هەبوو، ئێستا ڕێگاى گەڕیان لە تەوێڵە جێبەجێ کراوە، بوودجەکەى ٢٤٩ ملیۆن دینار بوو، پانى ڕێگاکە ١٥ مەتر دەبێت، ئێمە وەک ناحیەى بیارە بەدواداچوونمان کردووە، سوپاسی وەزارەت و بەرپرسانى ئیدارەى هەڵەبجەش دەکەین هاوکارمان بوون بۆ جێبەجێ کردنى پڕۆژەکان".
عەزیز ڕەسووڵ