هەولێر_KDP.info_ بەڕێوبەری سوتەمەنی هەولێر گوتی، لەگەڵ بەغدا لە گفتوگۆداین بۆ ئەوەی بەنزین بە هەمان نرخی پارێزگاکانی عێراق بۆ هەرێمی کوردستان دابین بکرێت، چونکە تا ئێستا بەنزین بەنرخێکی گرانتر دەدەنە هەرێمی کوردستان، بەڵام بەهۆی ئەو ڕێککەوتنەی لە نێوان حکوومەتی هەرێم و حکوومەتی ناوەندیدا کراوە پێویستە بەنزین بە هەمان نرخ بۆ هەرێمی کوردستانیش دابین بکرێت.

بەڕێوبەری سوتەمەنی هەولێر، ئاری کاکەشین، بۆ ماڵپەڕی فەرمیی پارتی دیموکراتی کوردستان گوتی: دوای ئەوەی حکوومەتی هەرێمی کوردستان و حکوومەتی عێراق رێککەوتن و بودجەش پەسەندکرا، پێویستە نرخی بەنزین نرخەکەی لە پارێزگاکانی عێراق چەندە لە هەرێمی کوردستانیش هەمان نرخ بێت، بۆیە جارێ لە گفتوگۆ داین بۆ ئەوەی بگەینە رێککەوتن، بۆ ئەو مەبەستەش وەزارەت نووسراوی فەرمیی ئاراستەی بەغدا کردووە بۆ ئەوەی بڕیارەکە جێبەجێ بکرێت.
ئاری کاکەشین گوتیشی: تا ئێستا هەر بەنرخی گران بەنزینمان پێدەدەن کە نرخی هەر لیترێک بەکەمتر لە 700دینار پێمان دەدەن، تا دەگاتە لای خۆمان بە کرێوە دەگاتە 750 دینار، ئێمەش بەو نرخە بە هاوڵاتیانی دەفرۆشین، چونکە لیتری بە 430 دینار دەدەنە پارێزگاکانی خۆیان، لە پارێزگاکانیش بە 450 دینار دەفرۆشرێت، بەڵام ئێمە لە هەوڵەکان بەردەوام دەبین تا بەهەمان نرخی خۆیان بەنزین بۆ ئێمەش دابین بکەن.

بڵند ئیبراهیم