دهۆک -KDP.info- ب هەلکەفتا هاتنا سەرێ سالا نوی یا زایینی 2023 دێ ئاهەنگێن گشتی ل باژێڕێ دهۆکێ و باژێڕێ زاخۆ هێنە گێڕان، د هەمان دەم دا ژمارەکا ئاهەنگێن تایبەت ژی دێ ب هەمان هەلکەفت ل پارێزگەها دهۆکێ هێنە گێڕان و هەمی بەرهەڤی ژی بۆ ڤێ مەرەمێ ژ لایێ جهێن پەیوەندیدار ڤە هاتینەکرن.
حەسەن فەتاح، پەیڤدارێ رێڤەبەریا گشتی یا رەوشەنبیری و هونەری ل پارێزگەها دهۆکێ بۆ ماڵپەرێ فەرمیێ پارتی دیموکراتی کوردستان دیار کر کو بۆ سەرێ سالا نوی یا 2023 دێ ئاهەنگەکا گشتی ژ لایێ ئیدارا پارێزگەها دهۆکێ و رێڤەبەریا گشتی یا رەوشەنبیری و هونەری ل پارێزگەها دهۆکێ و رێڤەبەریا گشتی یا گەشتوگۆزارێ ل پارێزگەها دهۆکێ و لقێ دهۆک یێ سەندیکا هونەرمەندێن کوردستانێ ل پارکا نەورۆز یا د ناڤ سەنتەرێ باژێڕێ دهۆکێ دا هێتە گێڕان و گۆت: "چەندین هونەرمەند دێ پشکداریێ د ڤێ ئاهەنگێ دا کەن، سەرەرایی ڤێ چەندێ چەندین کار و چالاکی ژی دێ د ناڤ ڤێ ئاهەنگێ دا هێنە ئەنجامدان، ب شێوەیەکێ گشتی بەرهەڤیێن گەلەک باش بۆ گێڕانا ڤێ ئاهەنگێ یێن دهێنەکرن".
ژ ئالیێ خوە ڤە دلخاز موسا، رێڤەبەرێ رەوشەنبیری و هونەری ل سنوورێ ئیدارا سەربەخۆ یا زاخۆ بۆ ماڵپەرێ فەرمیێ پارتی دیموکراتی کوردستان ئاشکرا کر کو ل دووڤ ڕاسپاردێن سەرپەرشتێ ئیدارا سەربەخۆ یا زاخۆ لیژنەک بۆ بەرهەڤیێن گێڕانا ئاهەنگێن شەڤا سەرێ سالا نوی هاتیە پێکئینان و بڕیار هاتیەدان ب ڤێ هەلکەفتێ ئاهەنگ ل شەڤا 25/12/2022 دەست پێ بکەن و هەتا شەڤا 31/12/2022 ل پرا دەلال ل زاخۆ ب پشکداریا چەندین هونەرمەندان بەردەوام بهێنەگێڕان و گۆت: "ئەڤ ئاهەنگە دێ د گشتی و بێ بەرامبەر بن و هەمی خەلکێ دەڤەرێ و گەشتیاران ماف یێ هەیی د ڤان ئاهەنگان دا د پشکدار بن".
ناڤهاتی ئاماژە دا وێ چەندێ کونوکە کار بۆ خەملاندنا پرا دەلال دهێتەکرن، سەرەرایی ڤێ چەندێ دێ چەندین دکانێن فرۆتنا کەلوپەلان ل نێزیک پرا دەلال هێنە ڤەکرن.
هەژی گۆتنێ یە کو ژ بلی گێڕانا ڤان ئاهەنگێن گشتی ل باژێڕێ دهۆکێ و ئیدارا سەربەخۆ یا زاخۆ دێ چەندین ئاهەنگێن تایبەت ژی ل کافێ و خوارنگەهـ و ئۆتێلێن پارێزگەها دهۆکێ هێنە گێڕان.
رێوار محەمەد رەشید