هه‌ولێر-KDP.info- سه‌رۆكوه‌زیرانی كوردستان پێشوازی له كه‌سایه‌تیی دیاری نێوده‌وڵه‌تی و یه‌كه‌مین داواكاری گشتیی دادگای تاوانی نێوده‌وڵه‌تی (لویس مۆرێنۆ ئۆكامپۆ) كرد و، له دیداره‌كه‌دا (ئۆكامپۆ) دووپاتى كرده‌وه كه، به هه‌موو شێوه‌یه‌ك پشتگیرى له هه‌وڵه‌كانى حكوومه‌تى هه‌رێمى كوردستان ده‌كات بۆ ئه‌وه‌ى ئه‌و كه‌یسه (ئه‌و تاوانانه‌ى ده‌رهه‌رق به ئێزدییه‌كان كراون) وه‌ك جینۆساید بناسرێت.
پاشنیوه‌ڕۆى ئه‌مڕۆ دووشه‌ممه 31_8_2015، (نێچیرڤان بارزانى) سه‌رۆكوه‌زیرانى هه‌رێمى كوردستان، پێشوازى له كه‌سایه‌تیى دیارى نێوده‌وڵه‌تى و یه‌كه‌مین داواكارى گشتیى دادگاى تاوانى نێوده‌وڵه‌تى، (لویس مۆرێنۆ ئۆكامپۆ) و شاندیكى یاوه‌رى كرد، كه له ژماره‌یه‌ك له به‌رپرسان و تیمى چه‌ند ڕێكخراوێكى تایبه‌ت به بوارى خزمه‌تكردنى لێقه‌وماوان پێكهاتبوو.
له دیدارێكدا تیشك خرایه سه‌ر ڕه‌وشى لێقه‌وماوانى ده‌ستى تیرۆر و به‌تایبه‌تیش لێقه‌وماوانى ئێزدى كه هاوینى ساڵى ڕابردوو كه‌وتنه به‌ر دڕه‌نده‌ترین هێرشى تیرۆرستانه‌ى ڕێكخراوى تیرۆرستیى داعش و به هه‌موو پێوانه‌یه‌ك ڕووبه‌رى جینۆساید بوونه‌وه. هه‌روه‌ها باس له هه‌وڵه‌كانى حكوومه‌تى هه‌رێمى كوردستان كرا كه له كۆششێكى به‌رده‌وامدایه بۆ ئه‌وه‌ى له‌سه‌ر ئاستى نێوده‌وڵه‌تى ئه‌و كاره‌ساته‌ى به‌سه‌ر ئێزدییه‌كان هات، وه‌ك جینۆساید بناسرێت.
له دیداره‌كه‌دا (نێچیرڤان بارزانى) وێڕاى ده‌ربڕینى خۆشحاڵیى خۆى به سه‌ردانى (ئۆكامپۆ)، كورته‌یه‌كى ده‌رباره‌ى هه‌وڵ و كاره‌كانى ئه‌و لیژنه‌یه‌ى حكوومه‌تى هه‌رێمى كوردستان پێشكه‌ش كرد كه به سه‌رۆكایه‌تیى وه‌زیرى كاروبارى شه‌هیدان و ئه‌نفالكراوان دامه‌زراوه و به هاوكاریى پسپۆڕان و شارازه‌یانى تایبه‌ت به‌و بواره، كار بۆ ئه‌وه ده‌كات تا له ناوه‌نده نێوده‌وڵه‌تییه‌كاندا ئه‌و كه‌یسه وه‌ك جینۆساید بناسرێت و كۆمه‌ڵگه‌ى نێوده‌وڵه‌تى ئه‌و تاوانانه‌ى ده‌رهه‌رق به ئێزدییه‌كان كراون، وه‌ك جینۆساید له قه‌ڵه‌م بدات و دانى پیادا بنێت.
لاى خۆیه‌وه (ئۆكامپۆ)، وێڕاى ده‌ربڕینى هاوسۆزیى خۆى له‌گه‌ڵ كوردانى ئێزدى به‌تابیه‌تى و ته‌واوى گه‌ل و حكوومه‌تى هه‌رێمى كوردستان به‌گشتى، دووپاتى كرده‌وه كه به هه‌موو شێوه‌یه‌ك پشتگیرى له هه‌وڵه‌كانى حكوومه‌تى هه‌رێمى كوردستان ده‌كات بۆ ئه‌وه‌ى ئه‌و كه‌یسه وه‌ك جینۆساید بناسرێت، هه‌روه‌ها هه‌موو ئاماده‌ییه‌كى نیشان دا كه ته‌واوى پسپۆڕى و شاره‌زاییى خۆى له‌و بواره‌دا بخاته خزمه‌تى سه‌رخستنى ئه‌و كه‌یسه‌وه، چونكه بابه‌تێكى مرۆییه و په‌یوه‌ندیى به ته‌واوى مرۆڤایه‌تییه‌وه هه‌یه.
له به‌رانبه‌ردا سه‌رۆكوه‌زیران سوپاس و پێزانینى خۆى و حكوومه‌تى هه‌رێمى كوردستانى بۆ هاوسۆزى و هه‌وڵه‌كانى (ئۆكامپۆ) ده‌ربڕى و دووپاتى كرده‌وه كه حكوومه‌تى هه‌رێمى كوردستان هه‌موو پشتگیرییه‌كى پێویست بۆ سه‌رخستنى ئه‌و كه‌یسه ده‌كات، هه‌روه‌ها جه‌ختى له‌وه كرده‌وه كه به هه‌مان شێوه هه‌موو هه‌وڵێك ده‌دات بۆ ئه‌وه‌ى ته‌واوى ئه‌و خوشك و برا ئێزدییانه‌ى هێشتا له ده‌ستى تیرۆرستاندا ماون، ڕزگار بكرێن. هه‌روه‌ها سوپاس و پێزانینى پێشكه‌ش به‌و ڕێكخراو و ئێن جى ئۆیانه‌ش كرد له‌م بواره‌دا هاوكار و یارمه‌تیده‌رن.
له دیداره‌كه‌دا ژماره‌یه‌ك له وه‌زیرانى حكوومه‌تى هه‌رێمى كوردستان و به‌ر‌پرسانى تایبه‌ت به‌م كه‌یسه، ئاماده بوون.