هه‌ولێر-KDP.info- (سه‌رۆك بارزانی) له پێشوازی وه‌زیری كاروباری ئه‌نجوومه‌نی وه‌زیرانی به‌ریتانیادا رایگه‌یاند كه، كێشە سیاسییەكانی هەرێمی كوردستان لە چوارچێوەی پڕۆسەی دیموكراسی و گەشەكردنی دیموكراسییە و، ڕایگەیاند، كە پێویستە هەموو لایەك لەوە دڵنیا بن كە لەم پڕۆسەیە و لەم ململانێ دیموكراتییەدا هیچ شتێكی هەڵە ڕوو نادات؛ ئەوەیشی خستە ڕوو كە خاڵی هەرە گرینگ ئەوەیە هێزی پێشمەرگە و ئاساییش تێكەڵی ململانێی سیاسی نابێت و، ئەو قەیرانەی ئێستایش پێشانیدا كە هێزی پێشمەرگە خاوەن قەزییەیە و لە قاڵبی حزبی دەرچووە و ئەركی پاراستنی وڵات بە باشترین شێوە جێبەجێ دەكات.
ڕۆژی دووشەممە31ـی 8ـی 2015 لە سەلاحەدین (مەسعوود بارزانی) سەرۆكی هەرێمی كوردستان پێشوازی لە (ئۆلیڤێر لێتوین) وەزیری كاروباری ئەنجوومەنی وەزیرانی به‌ریتانیا و شاندێكی یاوەری كرد.
لە دیدارەكەدا وەزیری كاروباری ئەنجوومەنی وەزیرانی به‌ریتانیا سوپاسی (سەرۆك بارزانی) كرد بۆ ڕەخساندنی دیدارەكە و هێمای بە ڕۆڵ و هەوڵی هێزی پێشمەرگەی كوردستان لە شەڕی تیرۆر و پاراستنی ئاساییشی ناوچەكە و جیهان دا و ڕایگەیاند كە ئێستا جیهان پشت بە هێزی پێشمەرگە دەبەستێت. هەروەها وێڕای ئاماژەدان بە قەیرانی ئابووریی هەرێمی كوردستان و هەبوونی ژمارەیەكی زۆری ئاوارە و تێچوونەكانی شەڕی داعش، سەرسامیی خۆی بە ئیدارەدان و سەركردایەتیكردنی سەركەوتووانەی ئەم قۆناغە ئاڵۆزەی هەرێمی كوردستان نیشاندا.
لەبەرانبەردا (سەرۆك بارزانی) بەخێرهاتنی شاندی میوانی كرد و سوپاسی به‌ریتانیا و وڵاتانی دۆست و هاوپەیمان كرد كە یارمەتیی گەلی كوردستان و پێشمەرگەیان داوە و جەختی لەوە كردەوە كە هەموومان لە یەك بەرەداین لەدژی ڕێكخراوێكی تیرۆریستیی كە ئیمكانیاتی چەندین دەوڵەتی لەبەردەستە و بە هەوڵی هاوبەشی هەموو لایەك دەكرێ سەركەوتنی باش مسۆگەر بكرێت.
هەر لەم دیدارەدا بارودۆخی شاری مووسڵ و پڕۆسەی ئازادكردنی ئەم شارە تاوتوێ كرا و باس لە قۆناغەكانی دوای شكستدانی داعش كرا و پەیوەست بەم باسە (سەرۆك بارزانی) ئەوەی بۆ شاندی میوان ڕوونكردەوە كە شاری مووسڵ و پارێزگای نەینەوا تایبەتمەندیی خۆی هەیە و پێویستە لەدوای شەڕی داعش دڵنیاییەكی تەواو بدرێتە پێكهاتە جیاجیاكانی ئەم پارێزگایە كە چیتر كارەساتەكان دووبارە نابنەوە و هەر لە ئێستاوە لێكتێگەییشتنێكی سیاسیی لەنێوان لایەن و پێكهاتەكانی نەینەوا دروست ببێت.
سەبارەت بە بارودۆخی ناوخۆی هەرێمی كوردستانیش (سەرۆك بارزانی) ئەوەی دووپات كردەوە كە كێشە سیاسییەكانی هەرێمی كوردستان لە چوارچێوەی پڕۆسەی دیموكراسی و گەشەكردنی دیموكراسیە و ڕایگەیاند كە پێویستە هەموو لایەك لەوە دڵنیا بن كە لەم پڕۆسەیە و لەم ململانێ دیموكراتییەدا هیچ شتێكی هەڵە ڕوو نادات و ئەوەیشی خستە ڕوو كە خاڵی هەرە گرنگ ئەوەیە كە هێزی پێشمەرگە و ئاساییش تێكەڵی ململانێی سیاسی نابێت و ئەو قەیرانەی ئێستایش پێشانیدا كە هێزی پێشمەرگە خاوەن قەزییەیە و لە قاڵبی حزبی دەرچووە و ئەركی پاراستنی وڵات بە باشترین شێوە جێبەجێ دەكات.
هەر لەم كۆبوونەوەیەدا باس لە كێشەكانی نێوان هەرێمی كوردستان و بەغدا و بارودۆخی سیاسی و ئەمنی عێراق و داهاتووی ژیانی سیاسیی عێراق و پێكهاتەكانی كرا.