هەولێر-KDP.info- سكرتێری مەكتەبی سیاسیی پارتیی دیموكراتی كوردستان ڕایگەیاند، "بەدەستهێنانی دەستكەوت گرینگە، بەڵام پاراستنی گرینگترە، كەوایە ئەركی گرینگتر قورستترە لە ئەركی گرینگ، ئەمە پێویستە كادیر و ئەندامانی ئێمە بیكەن بە ئامانجی خۆیان". ڕوونیشی كردەوە كە، "هیچ كاتێك وەكو ئێستا بارودۆخ بۆ ڕاگەیاندنی دەوڵەتی كوردستان لەبار نەبووە، بۆ نموونە سووریا و عێراق وەك وڵات نەماون و توركیا و ئێرانیش كێشەی خۆیان هەیە".

لە چوارچێوەی یادكردنەوەی هەڵگیرساندنی شۆڕشی پێشكەوتنخوازی گوڵان، لە هۆڵی (قازی محەممەد) لە شاری هەولێر، مەراسیمی پێشوازیكردن لە هەزار و 9 لاوی نیشتمان بەرێوە چوو كە  تازە هاتنە نێو ڕیزی پارتیی دیموكراتی كوردستانەوە.

بە ئامادەبوونی سكرتێری مەكتەبی سیاسیی پارتیی دیموكراتی كوردستان (فازڵ میرانی) و بەرپرسی لقی دووی پارتی (عەلی حوسێن) و ژمارەیەك لە هەڤاڵان و كادیرانی حزب لە پێشوازییەكی شاییستەدا  1009 لاو لە ریزەكانی نێو پارتیی دیموكراتی كوردستان دەستبەكار بوون. لە گوتارێكی شیكارییشدا سكرتێری مەكتەبی سیاسیی پارتیی كوردستا (فازڵ میرانی) گوتی: "سوپاسی لقی دووی پارتی دەكەم كە ئەم مەراسیمە گرینگەی رێك خستووە، چونكە پێشتر ئەندامبوون لەبەر چرا و بە نهێنی بوو، ئەمڕۆ كە ئەم شێوازەیش دەبینرێ، دەبێت بەراوردی دوێنێ و ئەمڕۆ بكەین، بۆیە سەری رێز بۆ ئەو ئەندامانە دادەنەوێنین كە رێگەیان خۆش كرد و ئێمەیشیان گەیاندە ئەمڕۆ".
(میرانی) ڕوونیشی كردەوە: "سوپاس بۆ خوا كە ئەم نیعمەتەی پێ بەخشیوین لە كوشتن و راماڵین و تەعریب و تەبعیس و كیمیاباران رزگارمان بوو، ئەمڕۆ لە وڵاتی خۆمان بەو شێوەیەی هەیە بە هەژاری و هەڕەشە وا بۆ 21 ساڵ دەچێت كورد خۆی بەڕێوە دەبات، خاوەنی پەرلەمان و سەرۆكی هەرێم و حكوومەت و ئاڵا و خاوەنی فڕۆكەخانەین. جاران لای زۆرێك لە سەرۆكەكان و وەزیرانی دنیا دەبڕینی وشەی كورد قەدەخە بوو، ئەمڕۆ دێن لەگەڵ سەرۆك و بەرپرسانی ئێمە لە تەك ئاڵای كوردستاندا كۆنفڕانسی ڕۆژنامەوانی ساز دەدەن".
سكرتێری مەكتەبی سیاسیی پارتیی دیموكراتی كوردستان گوتیشی: "لە كاتی سەردانەكەی (سەرۆك بارزانی)ـدا بۆ ئوردندا، ئاڵای كوردستان لە تەنیشت ئاڵای  هەموو دوونیا هەڵكرا، ئەوەیشمان بینی ئاڵای كوردستان كاتی دیداری جەنابی سەرۆك و شاعەبدوڵڵا، هاوتای ئاڵای ئەو وڵاتە هەڵكرا، ئەمە نیعمەتێكی خوایە پێشكەشی هەموو پێكهاتەكانی خەڵكی كوردستانی كردووە".
فازڵ میرانی ئاماژەیشی دا: "بەدەستهێنانی دەستكەوت گرینگە، بەڵام پاراستنی گرینگترە، كەوایە ئەركی گرینگتر قورستترە لە ئەركی گرینگ، ئەمە پێویستە كادیر و ئەندامانی ئێمە بیكەن بە ئامانجی خۆیان، كە بەڵی ئەركی ئێمە گرینگترە لە ئەركی ئەوانەی كە ئەم دەستكەوتانەیان بەدەست هێنا".
پێوەست بە شۆڕشی گوڵانیش گوتی: "شۆڕشی گوڵان گیانی شۆڕشگێری لە ناخی كورددا زیندوو كردەوە و نیشانی ناحەزانی دا، پارتییش پێویستی بە پێناسەكردن نییە، چونكە خۆی لەنێو كوردستان و جیهانیشدا ناسراوە، كە پارتی دامەزراوە لە پێناوی ناساندنی پێناسەی كورد بە دۆست و دوژمنانیش بووە، پارتی دژوەستانەوەی ستەم و زۆرداریی كردە پێناسە، بۆ ئەوەی مۆڕاڵێكی نێوخۆیی لە رێگەی رێكخستن و سیاسەتی خۆیەوە بۆ بەرەنگاربوونەوەی ئەو ستەمە پەیدا بكات، كەواتە پێناسەی كورد و پارتیی دیموكراتی كوردستان بەو شێوەیە دەستی پێكرد، پارتی بووە بەرهەڵستكار دژی ئەو ستەمە، ئەوە بوو خەباتی سیاسی و راگەیاندنی و جەماوەری دەستی پێكرد كە خۆی لە شۆڕشی ئەیلوولدا دۆزییەوە، ئێمە ویستمان میللەتی خۆمان ڕزگار بكەین، بە واتای گەییشتن بە مافە نەتەوایەتییەكەی خۆی".

(فازڵ میرانی) جەختیشی كردەوە: "بێگومان ئەمڕۆ ناوچەكە لە قەیرانی جودا جودادا دەژیێت، وەك قەیرانی ئەمنی و سیاسی و كۆمەڵایەتی و مافی مرۆڤ، قەیرانی داعشیش بۆ ئێمە نزیكترینە، داعش وەك دیاردەیەكی كتوپڕ كاتێ كە پەیدا بوو كێشەیەك نییە، بەڵام ئەم گەورەبوون و تەشەنەكردنی داعشە لە رێكخراوێكەوە بۆ دەوڵەتێك و بوون بە دراوسێی ئێمە، ئەمە پرسیار دێنێتە پێش، ئایا داعش كێیە؟ ئێمە دژی كوشتن و بڕین و دواكەوتوویین، بەڵام پرسیار ئەوەیە كێیە ئەمە دەكات؟ ئەوەی لە مۆزەخانەی مووسڵ پەیكەر دەشكێنێ ئەمە پێی گوتراوە ئەمە بكە، لە پێناوی چیدا؟ كاتێ وڵاتێكی وەكو عێراق مۆزەخانە لە دەست دەدات یاخود سووریا پاڵاوتەیەك یاخود پارێزگایەك لە دەست دەدات، ئەوان وەكو وڵات دەمێنن، بەڵام ئێمە بە بەرخودان و هیمەتیی پێشمەرگە قارەمانەكان و میللەتی خاوەن هەڵوێست و سیاسەتی (سەرۆك بارزانی) سەرفراز دەژیێن، زیانی ئێمە شتێكی گەورەتر لە پاڵاوتەیەك و مۆزەخانەیەك و شارێكە، خۆشبەختانە لەنێو میللەتی ئێمەدا خەتەر و هەڕەشەی داعش بە ئاشكرا هەستی پێ كراوە، بۆیە دەبێ ئیرادەی ئەوەمان هەبێت كە بمێنین، چونكە ئەگەر بمێنین، دەستكەوتە گەورەكە لە شوێنی خۆیەتی".

(میرانی) سەبارەت بە دۆخی عێراقیش وەهای گوت: "خراپیی ئیدارەدانی دەوڵەتی عێراق ئەم دۆخەی دروست كرد، چونكە هەموو خەڵك وایان زانی لە 2003 دوای كەوتنی (سەددام)، رژێمێكی دیموكراتی هاتووەتە كایەوە، لە گوتارەكانیاندا وایان نیشان دا كە عێراق وڵاتێكی ئەمینە، بەڵام دیارە ئەمە راستە كە گوتراوە، ئەوەی دوورە لە حوكم، حەزی بە دیموكراتییەتە، بەڵام كە حوكمی دەكەوێتە دەست دژی دەوەستێتەوە، ئەم رژێمەی دوای (سەددام) كە هات تایفییە و وای كرد عێراق بەرەو پارچەبوون بچێت".
گوتیشی: "حەمرین نە ئێمە دروستمان كردووە نە عەرەب، خوا دروستی كردووە، كورد هۆكار نییە بۆ ئەوەی كە عێراق كەوتووەتە ئەم قۆناخەوە، بەڵكە خراپیی ئیدارەی دەسەڵات وای كرد ئەم عێراقە وای لێ بێت، بۆیە هەر میللەتێكیش بۆی هەیە بیر لە چارەنووسی خۆی بكاتەوە، مافی چارەنووسیش یەكێكە لە مافەكانی مرۆڤ، ئێمە باسی مافی چارەی خۆنووسین دەكەین، نەمانگووتوە جیا دەبینەوە، بەڵكە بڕیارێك دەدەین، كە باسی ریفراندۆم دەكەین، نەمانگوتووە دەوڵەت، لێرەدا پرسیارێك دروست دەبێت، لە هیچ دەقێكی یاساییی دنیادا هەیە هەموو پێكهاتەكانی مافی سەربەخۆبوونیان هەبێت، بەڵام سەربەخۆ نەبن؟ بەحرەین بەقەدەر هەولێر نابێت و 28 كیلۆمەتر رووبەرەكەیەتی، كەچی دەوڵەتێكە، قەتەر دەوڵەتێكە و 300 هەزار كەسە، بۆچی بۆ ئەوانە ئاساییە و بۆ میللەتێكی وەكو ئێمە ناكرێت؟!".

(میرانی) هەروەها رایگەیاند: "هیچ كاتێك وەكو ئێستا بارودۆخ بۆ ڕاگەیاندنی دەوڵەتی كوردستان لەبار نەبووە، بۆ نموونە سووریا و عێراق وەك وڵات نەماون و توركیا و ئێران كێشەی خۆیان هەیە، ئەگەر بارودۆخە زاتییەكەی نێوخۆ ئامادە بێت، بۆ وێنە بژاردەیەكمان لە دەست بێت كە ئایا گەلی ئێمە رازییە بچین داوای دەوڵەت بكەین كە ئەویش ئەنجامدانی ڕیفراندۆمە؟، كاتێ ریفراندۆمیش دەكەی، مانای ئەوە نییە سبەی دەوڵەت رادەگەیەنیت، ئەمە بە گفتوگۆ دەكرێت، زۆربەی وڵاتانی ناوچەكە كاتی راگەیاندنی دەوڵەت شەڕمان لەگەڵ ناكەن، چونكە بەرژەوەندیمان پێكەوە هەیە، بۆیە ئامادەیی ئەوەیان تێدا نییە رووبەڕووی ئەم پرسە ببنەوە".

ڕاپۆرتی كەنعان بەهادین