هەولێر-KDP.info-  سەرۆكوەزیرانی توركیا (ئەحمەد داوودئۆغڵو)، لە هەولێر چوار مەسجی راگەیاند و رۆژنامەكانی ئەو وڵاتەیش دەڵێن، توركیا بەڵێنی دا كە پاڵپشتی ئاساییشی هەرێمی كوردستان بێت.

جاری یەكەم نییە سەرۆكوەزیرانی توركیا (ئەحمەد داوودئۆغڵو) دێتە هەولێر، پێشووتریش كە وەزیری دەرەوەی وڵاتەكەی بوو، سەردانی هەولێری كردبوو. بە هۆی هەڵوێستە ئەرێنییەكانی بەرانبەر بە هەرێمی كوردستان، مێدیا توركیاییەكان بە (ئۆغڵو) دەڵێن: دۆستی كورد.
(ئۆغڵو) دوێنی كە سەردانی هەولێری كرد، 4 مەسجی پێ بوون، لە پرێسكۆنفڕانسی هاوبەشی لەگەڵ (سەرۆك بارزانی)، بە وشە، مەسجەكانی دركاند كە بواری مرۆیی، پرسی ئەمنی، هاوكاریی هەرێم و نەوت بوون.

مەسجی یەكەم: بواری مرۆیی
"بە هۆی شەڕی داعش، نزیكەی 2 ملیۆن پەنابەر لە شوێنی خۆیان رۆییشتوون و روویان لە هەرێمی كوردستان كردووە، ئێمەیش لە توركیا میوانداریی نزیكەی 2 ملیۆن كەسمان كردووە. وەك پێشتر گوتوومانە، ئێمە هەموو كات لە پشت برایانمان بووین. لە پارێزگای دهۆك چەند كەمپێكمان دروست كردوون". سەرۆكوەزیرانی توركیا وای گوت.

ئەم وشانەی سەرۆكوەزیرانی توركیا وەك دەستەواژەی "پاڵپشتی برایانمان بووین" مەسجێكە كە ئیدی توركیا دەیەوێ لە گۆڕەپانی سیاسیی ناوچەكەدا هاوكار بێت. براكانی توركیا كێن؟ ئاوارەكانی سووریا و سوننەكانی عێراقن كە لە هەرێمی كوردستان نیشتەجێن؟ یان مەبەستی هەرێمی كودستانە! ئەگەر لە وشەكانی ئەم دەستەواژەیەی (ئۆغڵو) بڕوانرێ كە دەڵێ "لە پارێزگای دهۆك چەند كەمپێكمان دروست كردن"، دوو مانای شاراوە هەن، یەكەم هەرێمی كوردستان بۆ توركیا گرینگە و دووەمیش ئەو وڵاتە سوننەی عێراقی لا گرینگە. بەڵام لە كۆتا رستەیەكی دیكەی (ئۆغڵو) مەبەستی راستەقینەی دەردەكەوێت كە دەڵێ، "لەمەودوا لەگەڵ هەرێمی كوردستان پێكەوە كار دەكەین". ئەمە واتای ئەوەیە توركیا، پێكەوەكاركردنی لەگەڵ هەرێمی كوردستان لە عێراق، بە لاوە گرینگترە. ئەم گرینگییە لای (ئۆغڵو)، تەنیا لە كاتی ئێستا دەرنەكەوتووە، لەو كاتەوە دركی پێ كراوە كە، وەزیری درەوەی وڵاتەكەی بوو و هەمیشە دەیگوت، "هەرێمی كوردستان بۆ توركیا شوێنێكی ستراتیژیی گرینگە". ئەم گرینگییەی توركیایش بۆ هەرێم پێوەست بە پرسی ئاوارەكان لە رۆژنامەكانیش دەنگی داوەتەوە، رۆژنامەی سعوودیەنیوز، بایەخی بە سەردانی (ئۆغڵو) بۆ هەولێر داوە و، نووسیویەتی توركیا بە بڕی 36 ملیۆن دۆلار كۆمەكی ئاوارەكانی نیشتەجێی هەرێمی كوردستانی كردووە.

مەسجی دووەم، پرسی ئەمنی
"لە دوای هێرشی داعش لە چەند مانگی رابردوودا كە لەشكركێشی بۆ سەر هەرێمی كوردستان كردبوو، ئێمە  سەقامگیریی عێراقمان لا گرینگە، لە هەرێمیش زۆر بۆمان گرینگە و كاریگەری هەیە لە سەر توركیا. سەبارەت بە پێداویستی لە بواری ئەمنی چی پێویست بێت ئێمە دەیكەین. لە بەغدا لەگەڵ هەموو پێكهاتەكان كۆ بوومەوە. كەشێكی ئەرێنیم لە بەغدا بینی و، لێرەیش باسی كەشوهەوای بەغدام بۆ (سەرۆك بارزانی) كرد. پێمان وایە كە، بەشداربوونی هەموو پێكهاتەكانی عێراق لە حكوومەتی تازەی عێراق پێشوەچوونی عێراقی بە دواوە دێت. عێراق نابێ بە هیچ بیانوویەك لە بەشداریی هەموو لایەك خۆی دوور بگرێ، دەبێ هەموو خۆیان بە خاوەنداریی عێراق بزانن". (ئۆغڵو) وای گوت.

سەرۆكوەزیرانی توركیا، وشەی سەقامگیری بۆ عێراق و هەرێم بە كار بردووە، دەربارەی بە عێراق دەڵێ، سەقامگیریی عێراق بۆ توركیا گرینگە، بەڵام پێوەست بە هەرێم دەڵێ، سەقامگیریی هەرێم بۆ توركیا زۆر گرینگە، كەواتە لە رووی سەقامگیریی ئاساییشەوە، توركیا هەرێمی كوردستانی لە عێراق بەلاوە گرینگترە. ئەمەیش پێوەستە بە سنووری جیۆگرافیی هەرێمی كوردستان لەگەڵ توركیا كە، دەوڵەتی عێراق بە رێگەی سنووری هەرێمی كوردستانەوە دراوسێی توركیایە.
رۆژنامەكانی توركیایش پشتڕاستی دەكەنەوە كە سەقامیگیریی هەرێم بۆ توركیا گرینگە، وڵاتەكەیشیان پاڵپشتی سەقامگیریی ئاساییشی هەرێم دەبێت. ماڵپەڕی هەواڵی جیهانی توركی (worldbulletin)، نووسیویەتی كە، توركیا پاڵپشتیی ئاساییشی هەرێمی كوردستان دەكات و بایەخی بە سەردانەكەی (ئۆغڵو) بۆ هەرێمی كوردستان داوە. رۆژنامەی تودەی زەمانی توركیایش، بە مانشێتێك نووسیویەتی، توركیا بەڵێن دەدات كە بە هەموو جۆرە هاوكارییەك پاڵپشتیی ئەمنی هەرێمی كوردستان بكات. ئاژانسی جیهانی توركیایش هاوشێوەی تودەی زەمانی توركیا، ئاماژەی بە بەڵێنی توركیا كردووە كە، پاڵپشتی ئاساییشی هەرێمی كوردستان دەبێت.

مەسجی سێیەم، هاوكاری بۆ هەرێم
"ئاستی وەبەرهێنانی توركیا لە عێراق 12 ملیار دۆلارە كە، 8 ملیاری بەر هەرێمی كوردستان كەوتووە. 1500 كۆمپانیا و 100 هەزار هاووڵاتیی توركیا لە هەرێمی كوردستان كار دەكەن. لەو بوارەیشدا بیر لە پەرەپێدانی دەكەینەوە. سەقامگیریی هەرێمی كوردستان بۆ توركیا زۆر گرینگە، بۆیەیش لە هاوكاری لەگەڵ هەرێمی كوردستان بەردەوام دەبین. توركیا بۆ ئاساییش و سەقامگیریی هەرێمی كوردستان هەموو یارمەتییەك دەدات. بۆ ئێمە لە رووی مێژوویی، ستراتیژی و داهاتوومان پێوەندیمان لەگەڵ هەرێمی كوردستان زۆر بە لاوە گرینگە و لە داهاتوویشدا ئەو پرسە زێتر دەخەینە بەرنامەكانمانەوە. لە راستیدا وەك پێشتریش گوتم سەقامگیری لە ناوچەكەدا زۆر قسەمان لەسەر كرد. ناردنی هێزی پێشمەرگە بۆ كۆبانی رەنگدانەوەی ئەو هەماهەنگییەیە كە لەنێوانماندا هەیە. چونكە ئەگەر سەیر بكەین وڵاتێكی دراوسێمان عێراقە و، لە نێویدا هەرێمی كوردستان هەیە، بۆیە پێكەوە دەجوڵێینەوە و رووبەڕووی هەر هەڕەشەیەك دەبینەوە كە، بكرێتە سەر ناوچەكە. لەمەودوایش لە هەر شوێنێك، هەر حاڵەتێك بێتە ڕێ، بەیەكەوە دەیكەین"، (ئەحمەد داود ئۆغڵو)، وای گوت.

لەو مەسجەدا، سەرۆكوەزیرانی توركیا باسی داهاتووی كردووە كە ئیدی توركیا بە بایەخەوە لە داهاتووی خۆی و هەرێم دەڕوانێ، (ئۆغڵو) مێژوو و داهاتوو و ستراتیژی هەرێمی كوردستان دەكاتە ناوەڕۆكی ئەو مەسجە و دڵنیاییەك دەدات كە، لە ئەگەری روودانی هەر حاڵەتێك لە ناوچەكە، توركیا و هەرێم پێكەوە رووبەڕووی دەبنەوە. ئەمە پەیامێكە كە ئیدی توركیا دەیەوێ زێتر لەگەڵ هەرێمی كوردستان، پێوەندی پتەوتر بكات و بە ئاشكرا پەیامێك لە ناوچەكە رابگەێنێ كە توركیا هەرێمی كوردستانی بەلاوە گرینگە و هاوكاریی ئەو هەرێمەیش دەكات.

مەسجی چوارەم، نەوت
سەرۆكوەزیرانی توركیا رایگەیاند، "ئێمە پاڵپشتی لە رێككەوتنی نێوان هەرێمی كوردستان و بەغدا دەكەین و یارمەتیدەریان دەبین. توركیا بەڵێنەكانی خۆی لەو بوارەدا بەجێ دەگەیەنێ. كەشێكی باش لە بەغدا هەیە و ئومێدەوارم ئەم كەشە بەردەوام بە ئەرێنی بمێنێتەوە". مەبەستی ئەم گوتانەی سەرۆكوەزیرانی توركیا لە رێككەوتنی نەوتی نێوان بەغدا و هەولێرە كە، لە 13-11-2014 رێككەوتنێكی سەرەتایی پێوەست بە نەوت و پێشینیەك لە پارە، لە نێوان سەرۆكوەزیرانی كوردستان (نێچیرڤان بارزانی) و وەزیری نەوتی عێراق (عادل عەبدوڵمەهدی) واژۆ كرا و، رێككەوتنەكە بەم شێوەیە بوو "حكوومەتی فیدراڵ بڕی (500) ملیۆن دۆلار دەداتە حكوومەتی هەرێم. حكوومەتی هەرێم ڕۆژانە بڕی (150) هەزار بەرمیل نەوتی خام دەخاتە ژێر ڕكێفی حكوومەتی فیدراڵەوە".

پڕۆفایل
- لە ساڵی 1959 (ئەحمەد داوودئۆغڵو) لەدایك بووە.
سەرۆكی پارتیی دا و گەشەپێدان و هاوكات سەرۆكوەزیرانی توركیایە.
ماستەری لە كارگێڕیی گشتیدا هەیە و دكتۆرایشی لە زانستە سیاسییەكان هەیە.
لە ساڵی 1993 تا 1999 لە زانكۆی مەڕمەڕە مامۆستای زانكۆ بووە.
لە ساڵی 2008 رۆڵی لە چەندین دۆسێی گرینگی توركیادا بینیوە بە تایبەت لە بواری پێوەندیی دەرەوەدا.
لە ساڵی 2009 بووەتە وەزیری دەرەوەی توركیا.
لە ساڵی 2014 بووەتە سەرۆكوەزیرانی توركیا.
لە توركیا بە دۆستی كورد ناو دەبرێت.

شاو كوردی