هەولێر-KDP.info-  پێشمەرگە، لە زۆرێک میدیای جیهانیدا، ناوونیشانی ئازایەتییە، ئێستا بەرامبەر بەهێزترین دەوڵەتی تیرۆر لە جیهان وەستاوەتەوە و دووچاری شکستی کردووە و لە سەرکەوتنی یەکجارییش نزیکە، بریکاری وەزارەتی پێشمەرگەیش دەڵێ: "بۆ ئەمەریکا و هاوپەیمانانی دەرکەوت، پێشمەرگە لە رۆژهەڵاتی ناوین تاکە هێزی شایستەیە پڕچەک بکرێت و بکرێتە سوپایەکی بەهێز".  لەم راپۆرتەدا شیکارییەدا پێویستییەکانی پێشمەرگە دەخەینە ڕوو، لە بەرامبەردا ئەو جیاوازیانەیش شیی دەکەینەوە کە، پێشمەرگە لەگەڵ سوپای عێراق، هەیەتی.

پێشمەرگە، چییە؟
پێشمەرگە، سەربازێکە کە بەر لە چوونی بۆ جەنگ، بڕیاری داوە بە گیانی خۆی، بەرگری لە خاکی کوردستان دەکات، ئەمەش مەدالیای شانازیەتی. (سەرۆک بارزانی) باڵاترین فەرماندەی گشتیی هێزەکانی پێشمەرگەیە و، وەزارەتی پێشمەرگەیش، لە ڕووی کاری حکوومییەوە سەرپەرشتیی پێشمەرگە، دەکات. لە ئێستادا، هەرێمی کوردستان، بە درێژایی سنوورەکەی کە جاران پێی دەگوترا ناوچە کوردستانییەکانی دەرەوەی هەرێمی کوردستان، لەگەڵ تیرۆریستانی داعش، لە جەنگە و، لە تێکڕای سەنگەرەکانیشدا لە سەرکەوتنی بەردەوامدایە. بە پێچەوانەوە، سوپای عێراق کە زۆرێک لە رۆژنامە جیهانییەکان دەڵێن "ورەی سوپای عێراق، رووخاوە و ئەگەر ئەمەریکا بەهانایەوە نەچێت، ئەوا ناتوانێ لە جەنگی دژ بە تیرۆریستانی داعش بەردەوام بێت."

کورد، بە ئاواتە، پێشمەرگە لە رووی هێزی سەربازییەوە، توانست و چالاکی، راهێنان و تەکنۆلۆژیای زانستی سەربازی، ببێتە پێشکەوتووترین هێزی سەردەم، ئامانجی ئەو راپۆرتەی ئێمەیش پێشاندانی چەند خاڵێکە بۆ کارکردن لە سەری، تا پێشمەرگە، لە داهاتوویەکی نزیکدا وەک چۆن بە ئازاترین جەنگاوەر پێناسە دەکرێت، وەهایش لە رووی تەکنۆلۆژیای سەربازی و زانستی سەربازییەوە، ئامادە بکرێت و ببێتە سوپایەکی گەورەی مۆدێرن.

چیی بۆ سوپای عێراق کراوە؟
جگە لە بودجەیەکی گەورە کە دەوڵەتی عێراق، بۆ بواری ئەمنی دابینی کردووە و خەرجی دەکات، بەپێی ئامارە نافەرمییەکان، سوپای عێراق، 276600 سەربازی هەیە، سوپاکە لە 17 فیرقە پێک دێت و هەر فیرقەیەکیش 4 لیوایە و ژمارەی سەربازەکانیشی 14 هەزارە. سوپای عێراق بەر لەشەڕی داعش  700 تانک و 2695 زریپۆش و 266 هەلیکۆپتەری هەبووە، لەگەڵ تاکە فڕۆکەیەکی ئێف 16ـی ئەمەریکایی. زیاتر لە 5 هەزار، مووشەکی لەلایەن ئەمەریکا پێ دراوە کە بەهاکەی 10 ملیار دۆلار بووە. جگە لە چەندان جۆری چەکی بەرگریی ئاسمانی و جۆری باجەڕ و هەمەری گولـلەنەبڕ و مووشەکی دوورهاوێژیشی لە رووسیا و ئەمثریکا، کڕیووە. لەگەڵ هەموو جۆرە راهێنانێکی  سەربازی و بوونی هێزی ئاسمانی، وشکانیی، ئاویی و هەواڵگری، لەگەڵ پاڵپشتی راستەوخۆی هێزی ئێران و خۆبەخشانی شیعە. لەگەڵ ئەم هەموو توانا سەربازییەدا، کاتێ رووبەڕووی داعش بوویەوە لە ماوەی 15 رۆژدا بەپێی سەرچاوەکانی سەربازی، نزیکەی 20 ملیار دۆلار زیانی ماددیی سەربازی، بە سوپای عێراق گەییشت و مووسڵ گیراو، ئێستایش بەپێی زانیاریی ناوەندی هەواڵگری عێراقی، داعش تەنیا 26 کیلۆمەتر لە بەغداوە، دوورە. بەرپرسانی ئەمەریکایش بە ئاشکرا رایانگەیاند کە وڵاتەکەیان لە بێتوانایی سوپای عێراق نیگەرانە، چونکە توانای سەربازی نییە و لە نوێترین لێدوانی بەرپرسانی ئەمەریکایش لەو بارەیەوە، دەگوترێت کە تا چەند مانگێکی دی، سوپای عێراق ناتوانێ بەرگەی جەنگی داعش بگرێت.
هەڵبەت پێشمەرگە، وەک ئەوەی زانراوە و بەپێی ئامارە نافەرمییەکان، ژمارەی لە سەرووی سەدهەزار سەربازەوەیە. ئەم هێزە لە لایەن سوپای عێراقەوە بە هیچ شێوەیەک کۆمەک نەکراوە و ئەو چەکەی کە هەیشی بووە، لە کاتی پرۆسەی ئازادیی عێراقدا لە جەنگ، بە دەستی هێناوە و ئەوەی تریش بەم دواییە لەلایەن ئەمەریکا و وڵاتانی هاوپەیمانانەوە کۆمەکی سەربازی پێشکەش کراوە، بەڵام هێشتا وەک پێویست چەکی قورسی پێ نەدراوە.
بریکاری وەزارەتی پێشمەرگەی حکوومەتی هەرێمی کوردستان (ئەنوەر حاجی عوسمان)، بۆ KDP.info، دەڵێت: "ئەمەریکا لە 2003 کاتێ رووبەرووی رژێمی پێشووی عێراق وەستا، پشتی بە پێشمەرگە بەست، بەڵام لەوکاتەی سوپای عێراقی پێشوو سەردەمی (سەددام)، هەڵوەشایەوە و سوپای نوێی عێراق پێک هات و تیرۆر گەشەی کرد، پێشمەرگە لە سەنگەری شەڕدا مایەوە و دژی تیرۆر وەستایەوە. بە داخەوە کە سوپای عێراق پێک هاتەوە و ئەو سوپایە پڕچەک کرا و زیاتر لە 30 ملیار دۆلار چەکی قورسی پێ درا، لەو چەکانەی کە ئەمەریکا دژی رژێمی پێشوو شەڕی پێ دەکرد، بەڵام سوپای عێراق، نەک بەرگری پێ نەکرا، بەڵکو شکستی برد و لە بەرەنجامی ئەو شکستەیشی داعش پڕچەک بوو".
لەگەڵ نەبوونی جۆری چەکی قورس، بەڵام ورەی پێشمەرگە لەوپەڕی بەرزی بووە و توانیویەتی بە درێژایی زیاتر لە 1050 کیلۆمەتر دژی دەوڵەتی ئیسلامی داعش بجەنگێت و رۆژ دوای رۆژ تیرۆریستان لەو شوێنانە وەدەربنێت، کە پێشتر دەستی بەسەردا گرتبوون. دەبوو لەو کۆمەک و چەکەی کە عێراق لە وڵاتانی دەرەوە دەیکڕێ، پشکی هەرێمی کوردستانی ڕەوانە کردبا، چونکە پێشمەرگە، هێزێکی یاساییە لە چوارچێوەیی یاساکانی هەرێم و وەزارەتێکی هەیە بەنێوی پێشمەرگە و، پەرلەمانی کوردستان شەرعیەتی یاسایی پێی داوە و، دەستووری عێراقیش، شەرعیەتی پێی داوە و ناوی بردووە بە پاسەوانانی هەرێمی کوردستان.

چیی بۆ پێشمەرگە بکرێت؟
وەک ئەمەریکا و هاوپەیمانەکانی باسی دەکەن، کە پێشمەرگە هێزێکە بەرەوڕووی بەهێزترین دەوڵەتی تیرۆر لە جیهاندا وەستاوە، چیی بۆ ئەو هێزە بکرێت، شایەنیەتی. بە پشتبەستن بە توێژینەوەیەکی پەیمانگای واشنتن بۆ کاروباری رۆژهەڵاتی ناوەڕاست و راوبۆچوونی ناوخۆیی و بۆچوونی بەرپرسە باڵاکانی سەربازی و دیمەنەکانی جەنگ، بە پێویست زانراوە کار لەسەر ئەم خاڵانە بکرێت، تا پێشمەرگە، ببێتە هێزێکی مۆدێرن و لە سەرجەم بوارەکانی هونەری نوێی جەنگدا شارەزاتر و  پڕچەک بکرێت.
یەکەم: بەهێزکردنی توانایی سەربازی.
بەرزکردنەوەی توانای سەربازی زەروریەتێکی سەردەمییە و زۆربەی سوپای وڵاتانی جیهان لەبەر مەترسیی تیرۆر سەرقاڵی رێکخستنەوەی سوپاکانیانن. بەرزکردنەوەی توانای سەربازی، هەریەک لە راهێنانی سەربازی، کەلوپەلی پێویست، چەک و تەقەمەنی، ئەزموون و هونەری جەنگ، تەکنۆلۆژیای سەربازی، دەگرێتەوە. بۆیە، پێویستە پێشمەرگە، بایەخی پێ بدرێت کە بە جلی قەڵغان و چەکی پێشکەوتوو و راهێنانی سەربازی تەواوەوە رێک بخرێتەوە. ئەمەیش بە پاڵپشتیی ئەمەریکا و هاوپەیمانەکانی دەکرێت، لە ئێستادا هەوڵێک دەبینرێ کە وڵاتانی وەک ئەڵمانیا و ئەمەریکا، تیمی پسپۆر بۆ ئەو بوارە رەوانەی هەرێم بکەن و، تیمی ئەمەریکایش لە کوردستان بۆ راهێنانی سەربازی هەن، بەڵام پێویستە زیاتر بکرێت.
دووەم: رێکخستن و ئامادەکردنی هێز.
چەند لیوایەکی هێزی پێشمەرگە، لە ماوەی چەند ساڵی رابردوو رێکخراوەتەوە، وەک یەکەی 70 و 80. بە لای سیاسەتمەداری ئەمەریکایی و شارەزا لە کاروباری رۆژهەڵاتی ناوەڕاست (مارک نایتس) پێویستە سەرجەم هێزەکانی پێشمەرگە، بە تەواوی یەک بخرێنەوە و لەسەر ئەمەریکایش بە پێویستی دەزانێت، پێشمەرگە لەسەر چەکە قورسەکان رابهێنێت و هاوکار بێت. هەروەها پێویستە ژمارەی ئەو پێشمەرگانە دیاری بکرێت کە لە رووی سەربازییەوە تەواو راهێنراون، ئەوکات بۆ هەر حاڵەتێکی جەنگ بە شێوازی سەردەمیانە بخرێنە حاڵەتی جەنگەوە.
سێیەم: سەرنجڕاکێشانی دانیشتوانی ئەو شوێنانەی کە پێشمەرگە دەیەوێ کۆنتڕۆڵیان بکات.
بەپێی توێژینەوەیەکی ئەمەریکایی، یەکێک لەو خاڵە لاوازانەی کە، پێشمەرگە لە جەنگی دژ بە داعش هەیبووە، نەبوونی سەرنجڕاکێشانی دانیشتووانە سوننەکەی ئەو ناوچانە بووە کە جەنگ تێیدا بەرپا بووە، چونکە هەندێ جار دانیشتوانی ژێر دەستی داعش و نزیک لە سنوورەکانی نێوانیانەوە، وەک هێزی میلیشیا هێرشیان کردووەتەوە سەر پێشمەرگە، بۆیە بە پێویستی دەزانێ کە لە تەکنیکی نوێی سەربازی، پێشمەرگە، هەوڵ بۆ بەدەستهێنانی ئینتیمای ئەو شوێنەی کە جەنگی لێیە بدات و، لە رووی هەواڵگری یان بواری دیکەی سەربازییەوە، بتوانێ لێی سوودمەندبێ، یان بە لانی کەمەوە دانیشتوانی ناوچەکە نەبێتە بەربەست و مەترسی بۆ سەر پێشمەرگە. بەڵام جیاواز لەگەڵ ئەم بۆچوونە بریکاری وەزارەتی پێشمەرگە، (ئەنوەر حاجی عوسمان)، ئاماژە بۆ دۆستایەتی و هەماهەنگیی باش لە نێوان پێشمەرگە و ناوچە سوننەنشیینەکانی نزیک پێشمەرگە دەکات و دەڵێت، "لە ئێستادا ئێمە هەماهەنگی و دۆستایەتیی باشمان لەگەڵ سوننەنیشینەکانی نزیک پێشمەرگە هەیە و لەو خاڵەدا لە ناوچەی ڕەشاد و تەل وەرد و ناوچەکانی دی، هەمووی وەک کەسی ئێمە وان و ئەو دێهات و ناحیانەی لە نیزک ئێمەوەن، هەمووی لە ئاساییشی تەواودا دەژین و لەگەڵیاندا بە شێوەیەکی دادپەروەرانە، مامەڵە دەکەین".
چوارەم: ستراتیژیەتی تەکنیکی و ئامادەکاری بۆ بەرپەرچدانەوەی لە ناکاو.
پێناسەی ستراتیژیەت، خاڵی تەکنیکی و ئامادەکاری و بەرپەچدانەوەی لە ناکاویش لەخۆ دەگرێت. ستراتیژیەتی سەربازی بەپێی پێناسەکانی، بریتییە لە چۆنیەتیی بەکارهێنانی بەرنامەی سەربازی بۆ بەدەستهێنانی ئەو ئامانجەی کە پێویستە بە دی بهێنریت، بە مانایەکی دی، چۆنیەتیی خستنە ئامادەباشیی سەربازەوە بۆ جەنگ، بەپێی دانانی ئەو پلانەی کە بۆ بەدەستهێنانی ئامانجی سەربازی دیاری کراوە. لە رووی ستراتیژیەتی تەکنیکی و سەربازییەوە، پێشمەرگە تا زۆر لە سوپای عێراق سەرکەوتووترە، ئەمە بەپێی توێژینەوەی پەیمانگای واشنتنە، کە قسەی لەسەر کراوە، بەڵام بە پێویست زانراوە کە زیاتر پێشمەرگە، لە رووی ستراتیژیەتی جەنگ و سەربازییەوە شارەزا بکرێت. بۆ ئەم مەبەستەیش بەرپرسانی وەزارەتی پێشمەرگە، رایانگەیاندووە کە بەپێی هەر وەرزێک پێشمەرگە پلان و بەرنامەی دەبێت، هەروەها لە رووی جۆری بەرگری و هێرشبردنەوە، پێشمەرگە بەرنامەی تایبەتی خۆی هەیە و هەیبووە.
پێنجەم: ئەزموونی زیاتر.
ئەگەرچی رۆحیەتی بەرگری لە پێشمەرگەدا، بەراورد ناکرێ بە سوپای هیچ وڵاتێک کە، پێشمەرگە پێناسەی ئازایەتی و مەردایەتی و وەرە بەرزییە، بەڵام لە رووی سەربازی و بەهێزکردنی ئەزموونی جەنگ، پێویستە لەسەر چەکی پێشکەوتوو و چۆنیەتیی هێرشبردن و بەرگریکردن رابهێنرێت. پەیمانگای واشنتن دەڵێ "ئەو پێشمەرگانەی کە تەمەنیان بچووکە و تازە هاتوونەتە نێو بواری سەربازییەوە، پێویستە راهێنانی تەواویان پێ بکرێت و شارەزا بکرێن."
شەشەم: لە رووی لۆجستیی سەربازیی:
بەپێی پێناسەی ئەکادیمی بۆ لۆجیستی سەربازی، بریتییە لە دابینکردن و گوازتنەوەی کەرەستەی سەربازیی، خواردن، بۆ ئەو شوێنەیی کە سوپا پێویستی پێیەتی بە سیستەمێکی رێکوپێک و ئامادەکراو. هەروەها بەپێی هەندێ پێناسەی نوێ بۆ لۆجیستیک بواری گوازتنەوەی چەکیش دەگرێتەوە بەتایبەت چەکی قورس و مامناوەند لە چۆنیەتیی گواستنەوە و رێککخستن و دانانی لە شوێنی پێویست، بۆیە لەم روانگەیەوە پێویستە لەلایەن ناتۆ و ئەمەریکا و وڵاتانی پێشکەوتووەوە راهێنانی تەواو بە پێشمەرگە بکرێت. لە توێژینەوەکەی پەیمانگایی واشنتن، هاتووە کە، ئەم خاڵە پێویستییەکی سەرەکییە کە وڵاتانی ئەمەریکا و هاوپەیمانانی بیری لێ بکەنەوە و یارمەتیی پێشمەرگە بدەن، بەتایبەت لە رووی گوازتنەوەی چەکی قورس و تەکنیکی فێربوونی دانانی ئەو چەکانە لە کاتی جەنگدا.

حەوتەم: دانانی ژووری (دیزاستەر (disaster -رووداو.
راوێژکاری ئەنجوومەنی ئاساییشی هەرێمی کوردستان (مەسروور بارزانی)، لە ماوەی رابردوودا کاتێ پێشوازی لە باڵیۆزی کەنەدا لە ئوردن و عێراق (برونۆ ساکۆمانی) کرد، جەختی لە گرینگیی دابینکردنی چەکی قورس و ئامێری پووچەڵکردنەوەی مین، بۆ هێزی پێشمەرگە کردەوە. ئەم داواییەی راوێژکاری ئەنجوومەنی ئاساییش زۆر گرینگە بۆ پێشخستنی بواری سەربازی لە هەرێمی کوردستان. بۆیە، لە کاتی هاتنی چەکی پێشکەوتوو و تەکنۆلۆژیایی سەربازی بە دڵنیاییەوە پێشمەرگە، پێویستی بە ژووری دیزاستەر دەبێت، چونکە بۆ کۆنترۆڵکردنی روودای پێشهاتوو و بەرنامەدان زەروریەتی سەرەکییە کە وەزارەتی پێشمەرگە بیر لە دانان و پێشخستنی ئەو ژوورە بکاتەوە. ئەم ژوورە کاری کۆکردنەوەی زانیاری و وردبینیکردن و بەکارهێنانی سیستەمیGPSـە، بۆ پشکنینی خاڵەکان و چەندین کاری دیکەی سەربازی. هەروەها ئەم ژوورە لەگەڵ ئەندازیاری سەربازی بۆ هەڵگرتنەوەی مین و هێنانی رۆبۆتی سەربازی و تەکنۆلۆژیای دی، وەک وێنەگرتنی شوێنی جەنگ و بەکارهێنانی کامیرای ئاسمانی، خزمەتی زۆر پێشکەشی پێشمەرگە دەکات.
دەربارەی ئەو ژوورە (ئەنوەر حاجی عوسمان) دەڵێت، "پێشنیاز بۆ ئەمەریکا و هاوپەیمانەکانی دەکەم کە بایەخ بە دانانی ئەو ژوورە بدرێت و بە هەند وەربگیرێ کە، بە شێوەی تەکنۆلۆژیای سەردەم، پشتیوانیی پێشمەرگە بکرێت و کادیری پێشمەرگە، راهێنانی لەو بوارە پێ بکرێت، تا پێشمەرگەیش بە شێوەی تەکنۆلۆژیای سەردەمیانە و نەخشەی سەربازی توانایی خوێندنەوەی سەنگەری دووژمنی هەبێت و شارەزایی زیاتر بکرێت".
بە بۆچوونی (ئەنوەر حاجی عوسمان) پێشمەرگە، تەنیا بۆ هەرێمی کوردستان بەرگری ناکات، بەڵکو لەجیاتی هەموو جیهان شەڕی تیرۆر دەکات و لەو سۆنگەیەوە بە پێویستی دەزانێت لە بواری سەربازی و لە رووی پێدانی چەکی پێشکەوتوو و بواری تەکنۆنۆلۆژیای پێشکەوتووی سەربازییەوە، پێشمەرگە، دەوڵەمەند بکرێت، چونکە پێشمەرگە بۆ ئەمەریکا و ئەورووپا و هەموو جیهان گرینگە، کە بەرگری لە دیموکراسیەت و دادپەرەوەی و مرۆڤایەتی دەکات.

هەشتەم: پاڵپشتیی ئەمەریکا لە رووی راهێنانەوە.
پەیمانگای واشنتن، بۆ کاروباری سیاسی باس لەوە دەکات کە بەم دواییە واتە لەگەڵ دەرکەوتنی داعش لە عێراق، ئەمەریکا ئەولەویەتی داوە بە کورد و پاڵپشتی بۆ هێزی پێشمەرگە راگەیاند و چەکی پێداون. بەڵام ئەو پەیمانگایە بە پێویستی دەزانێ کە ئەمەریکا، مووشەکی دژەتانک و چەکی پێشکەوتووتر، پێشکەشی هەرێمی کوردستان بکات، لەگەڵ راهێنانی بەردەوامی هێزەکانی پێشمەرگە. جگە لەوە داواکردنی زیاتری راهێنەری ئەوڕووپایی بەتایبەت ئەو وڵاتانەی ئەندامی ناتۆ و یەکیەتیی ئەورووپایین، بۆ ئەوەی لە رووی راهێنانەوە، پێشمەرگە بە تەواویی ئامادە بکرێت. لە بابەت راهێنانی پێشمەرگە و چەقی قورس، سەرۆکوەزیرانی کوردستان (نێچیرڤان بارزانی)، لە چەندین دیداردا ئەمەی دووپات کردووەتەوە و لە دوایەمین دیداریش لەگەڵ سەرۆکی لیژنەی پەیوەندییەکانی دەرەوەی پەرلەمانی بەریتانیا، هەفتەی رابردوو، پێی راگەیاندن بۆ نەهێشتنی مەترسیی تیرۆر، پێشمەرگە، پێویستی بە چەکی قورس و ڕاهێنان و هاوکاریی زیاتر هەیە.

نۆیەم: تۆکمەکردنی ژووری عەمەلیات .(processes )
بەپێی پێناسەی رێکخراوی USAID ئەمەریکایی، ژووری عەمەلیات بریتییە لە دانانی پلان بۆ گەییشتن بەو ئامانجەی کە پێویستە بە دەست بهێنرێت، بەپێی پێناسەی سەربازییش بۆ عەمەلیاتی سەربازی، ژوورێکی تۆکمەیە بۆ کێشانی نەخشەی سەربازی لە دانانی سەرجەم ئەو بەرنامانەی کە پێویستە بە شێوەی خێرا دابرێژرێن بە ئامانجی بەدەستهێنانی ئەنجامی سەرکەوتوو لە بەرەی جەنگدا. پەیمانگای واشنتن، بەپێویستی دەزانێ کە ئەمەریکا لەم رووەوە یارمەتیی پێشمەرگە بدات، هەروەها ئەم ژوورەیش لەو سەردەمەدا پێویستی بە تەکنۆلۆژیای سەربازی هەیە. پێویستە وەزارەتی پێشمەرگە، داوا لە وڵاتانی ئەمەریکا و ئەورووپا بکات لە رووی ستراتیژی عەمەلیاتی سەربازی بە شێوەی تەکنۆلۆژیای نوێ، راهێنان بە پێشمەرگە، بکرێت.
ئەگەرچی پێشمەرگە ژووری عەمەلیاتی هەیە و پشتی پێ بەستووە، بەڵام بەرزکردنەوەی ئاستی زانستیی سەربازیی ئەم ژوورە گرینگە، بۆ ئەوەی بەشێوەیەکی تەکنیکی سەردەمیانە بتوانرێت بەپێی پێویستی سەربازی، ژووری عەمەلیاتی درێژخایەن و مامناوەند و کاتی دروست بکرێت.

دەیەم: بەهێزکردنی توانای ئاسمانی.
پەیمانگای واشتن دەنووسێ، هێزی ئاسمانیی ئەمەریکا، لە کاتی پرۆسەی ئازادیی عێراقدا، بۆ رووبەڕووبوونەوەی رژێمی پێشووی عێراق، پشتی بە توانای سەربازیی پێشمەرگە بەست، هەروەها لە جەنگی دژ بە داعش، جارێکی دی، هێزی ئاسمانیی ئەمەریکا و هاوپەیمانانی، پشتیان بە هێزی پێشمەرگە بەست، بەڵام هەرێمی کوردستان پێویستی بە هەلیکۆپتەری جەنگی هەیە کە پێی بدرێت، هەروەها پێویستی بە چەکی دژ بە فڕۆکە و هێزی ئاسمانییش هەیە، تا ببێتە هێزێکی کاریگەر لە ناوچەکە و بە تەواویی توانای پاراستنی هەرێمی کوردستانی هەبێت. داواکاریی هەلیکۆپتەر و چەکی پێشکەوتوویش کراوە، وەک ئەندامی فەرماندەیی گشتیی هێزی چەندان جار لە زاری گەورەبەرپرسانی هەرێمەوە جەخت کراوەتەوە کە، پێشمەرگە پێویستی بە هەموو جۆرە چەکێک هەیە، بۆ ئەوەی ڕووبەڕووی داعش ببێتەوە، چەکی مامناوەند و قورس، هەمەر و دەبابە و تەنانەت زۆر پێویستە هەلیکۆپتەر بۆ پێشمەرگە دابین بکرێت. (ئەنوەر حاجی عوسمان)-یش دەڵێت، "ئەمەریکاییەکان شاهێدن کە کەمترین چەک بە دەستی پێشمەرگە بووە کە بە پارتیزانی و تێکشکانی سوپای عێراقی پێشووی سەردەمی جەنگی دژ بە سەددام بە دەستی هێناون، هێزی پێشمەرگە چەکی بە دەستەوە نەبووە. لە پڕێک کە داعش جەنگی دژ بە پێشمەرگەی راگەیاند بۆ ئەمەریکا و هاوپەیمانانی و جیهان دەرکەوت کە پێشمەرگە تاکە هێزێکی رۆژهەڵاتی ناوینە دەتوانێ دژی تیرۆر شەڕ بکات".
بریکاری وەزارەتی پێشمەرگە، وای دەبینێت کە سوپای عێراق غەدری دەرهەق بە پێشمەرگە کردووە کە چەکیان پێ نەداوە و لە ئێستایشدا داوا دەکات ئەمەریکا لە بواری ئاسمانی پێشمەرگە بەهێز بکات و وەک خۆی ئاماژە دەدات کە ئەمەریکا گەییشتووەتە ئەو باوەڕەی لە رۆژهەڵاتی ناوین تاکە هێزێک بتوانرێت پشتی پێ ببەسترێت هێزی پێشمەرگەیە و شایەنی پڕچەککردن و راهێنان پێکردنە و بۆیە ئەمەرکیا بە پێویستی زانیوە پێشمەرگە، رێک بخرێتەوە و بکرێت بە سوپایەکی بەهێز.

یازدەیەم: رۆڵی (سەرۆک) لە پشتیوانی پێشمەرگەدا.
(سەرۆک بارزانی)، کە فەرماندەی گشتیی هێزەکانی پێشمەرگەیە، بە درێژایی کاری سیاسی و ئیدارییەکەی، هەمیشە دەڵێت "من پێشمەرگەم"، (سەرۆک بارزانی)، لە ئەرزی واقیعدا لە جەنگی دژ بە داعش، هەمیشە بەرەی جەنگی بەسەر کردووەتەوە و چووتەوە جەنگەوە. ئەمەیش ورەیەکی پۆڵایینی داوە بە پێشمەرگە و هەمیشە بووەتە سەرچاوەی باوەڕێک کە پێشمەرگە، شانازیی بە کارەکانییەوە بکات.
(ئەنوەری حاجی عوسمان) بۆ KDP.info، دەڵێت "ئەگەر سەیرێکی مێژوو بکەین دەبینین کە (بارزانیی نەمر) بە درێژایی تەمەنی لە سەنگەرەکانی پێشەوەی جەنگ بووە و رەمز و مقاوەمە و سەرکەوتنی ئەم میللەتی ئێمە، بەهۆی (بارزانیی نەمر)-ەوە بووە، لە نموونەی کۆماری کوردستان و چوونی بۆ یەکێتیی سۆڤیێت و سەرجەم بەرەکانی دی جەنگ و هەر لە جەنگیشەوە و لەنێو سەنگەری پێشەوەی جەنگ (سەرۆک بارزانی) لەدایک بووە". (ئەنوەرد حاجی عومسان) ئازایەتی و خۆراگریی (سەرۆک بارزانی) دەگێڕێتەوە کە لە شۆڕشی گوڵان و لەنێو سەنگەری پێشەوە بووە و بە سەدان داستانی بۆ ئەم میللەتە تۆمار کردوون. هاوکات باسی پێشبینییەکانی (سەرۆک) دەکات کە خوێندنەوەی وردی بۆ داهاتوو هەبووە و خاوەن پێشبینییە و بە هۆی ورەی بەرز و پلان و نەخشەی بەهێزی سەربازییەکەی، هەمیشە شکستی بە داگیرکەران بردووە، هەمیشە لەگەڵ پێشمەرگە بووە و دەڵێت، "لە ساڵی 1988 ناخۆشترین رۆژی پێشمەرگە بوو، بەڵام (سەرۆک) داستانی خواکوڕکی تۆمار کرد و ورەی بە بەر پێشمەرگە دایەوە. بەرهەمی راپەرینیش نەخشە و بەرنامەی جەنابی (سەرۆک بارزانی) بوو وەک داستانی کۆڕێ و چەندین داستانی دی. لە بابەت ئێستای جەنگیشەوە (سەرۆک) هەر زوو هەستی کرد کە ئەم جەنگە مەترسیدارە، بۆیە سەنگەرەی پێشەوەی هەڵبژاردووە وەک سەنگەرەکانی مەخموور و شنگال و، ئامادەیی (سەرۆک) رۆحێکی دی بەخشیوەتە مقاوەمە و سەنگەرەکانی پێشمەرگە.

شاو کوردی