سحێلا-KDP.info- سكرتێری مەكتەبی سیاسیی پارتیی دیموكراتی كوردستان (فازڵ میرانی)، كە وەك خۆی دەڵێ وەك خۆبەخشێك لە میحوەری سحێلا وەك پێشمەرگە ماوەتەوە، دەربارەی دۆخی شەڕ لە سنووری میحوەری شنگال، رایگەیاند، "ئێمە هەموو ئەو گوندانەی لە ناو خاكی هەرێمی كوردستاندان، لە سنووری زوممار ئازادمان كردوون ‌و خەڵكەكەی گەڕاونەتەوە شوێنەكانی خۆیان وەك ڕێخۆشكردنێك بۆ ڕزگاركردنی زوممار، چەند گوندێكی عەرەبیشمان ئازاد كردوون، هەروەها بەنداوی مووسڵیش ئازاد كراوە، ئەمە خۆی لە خۆیدا پێشكەوتنێكە لە بواری سەربازی و بەرەی شەڕی ئەم دەڤەرە."

لە دیمانەیەكیدا كە ڕۆژنامەی هەولێر لەگەڵیدا سازی داوە، (میرانی) زیاتر گوتی، "پاش ئەوەی لە سەرەتای شەڕەكە بە هۆی نەشارەزاییەوە لە شێوەی شەڕەكە و ئاڕاستەی هێرشی دوژمن، بە خراپ بە سەر میللەتەكەماندا شكایەوە، دواتر ئاڕاستە و هاوكێشەی شەڕەكە گۆڕدرا، پێشمەرگەی ئێمە بینی داعش ئەو هێزەی نییە، لێرە و لەوێ‌ بە هۆی خۆكوژێك و هەمەرێك و شەڕی دەروونییەوە، ناتوانن سەنگەرەكان بە پێشمەرگە چۆڵ بكەن، بینیمان پێشمەرگە بە تۆپی سەدوشەش و ئاڕبیجی و دۆشكا، هەمەرەكانیان تێك دەشكێنن، ئەوان ڕادەكەن و پێشمەرگە بەدوایان دەكەوێت، بۆیە لە یەك ڕۆژدا ئێمە بە پانتایی چلوهەشت كیلۆمەتر داعشمان ڕاو نا، بڕیاریشمان داوە ناوچەكە لە داعش پاك دەكەینەوە."
دەربارەی چاوەڕوانیی خەڵكی لە بەدەستهێنانەوەی
زوممار و شنگال، (میرانی) وەهای گوت، "لە ڕووی سەربازییەوە ناكرێت نە بۆ خۆت و میللەتەكەت و نە بۆ دوژمنەكەیشت سەعاتی سفر دیاری بكەیت، بەڵام ئێمە بڕیارمان داوە، یەكەم، كوردستان لە داعش پاك دەكەینەوە، دووەم، هەوڵ دەدەین عێراقیش لە داعش پاك بكەینەوە، بە ڕای ئێمە هەر بە ڕاماڵینی داعش ئەو مەترسییە لەسەر ناوچەكەمان كۆتایی نایەت، بەڵكو دەبێ پێكهاتەكانی عێراق و حكوومەتی نوێ بە پشتیوانیی نێودەوڵەتی بە كورد و سوننە و شیعەوە هاوكار بن."
زیاتر گوتی، "كاتی ڕزگاركردنی شنگال نزیك بووەتەوە، چونكە بارودۆخ و كەشوهەوا فەرزی دەكات كە نزیك بێتەوە، بۆ نموونە ئێستا ئەو ناوچەیەی كە ئێمەی لێین، لە پشت زوممار و عەینزالەین، ئەگەر باران ببارێت، كاریگەری دەكاتە سەر بڕیارەكانمان، تۆ لەسەر جادەی قیرتاویت، لە قیرتاو دەربچیت لە بەر قوڕ و لیتە نە دەبابە و نە زرێپۆش ‌و نە ئۆتۆمبیل دەرناچێت، جۆرە گڵێكی سوور لەو ناوچەیەدا‌ هەیە، كە تەڕ دەبێت وەكو سابوون وایە و ئۆتۆمبیلەكان دەچەقن، لەگەڵ هەموو ئەمانەیشدا تۆ هەر شەڕێك كە بیكەیت دەبێ دۆخی زاتی و مەوزوعیت ئامادە بێت، مەبدەئێكیش لە شەڕدا هەیە، دەڵێ: شەڕێك كە دڵنیا نەبیت لە سەركەوتن، نەیكەیت باشترە".

دەربارەی ئەوەیش كە دەگوترێ پارتی كەمتەرخەم بووە لەوەی بەسەر شنگالدا هات، (فازل میرانی) گوتی، "ناكرێت تۆمەت بە گشتی ببەخشیتەوە، زوڵممان لێ دەكرێ بڵێن پارتی كەمتەرخەمە لە شنگال، سێ بەرپرسی ئێمە كە كەمتەرخەم بوونە لەم میحوەرە دەستنیشان كراون و لێكۆڵینەوە دەستی پێ كردووە."
زیاتر ڕوونی كردەوە، "ئێمە دژی كۆچی بەكۆمەڵین، ئەگەر كادرێكی ئێمە وا بڵێت، ئەمە بۆ لەسەر پارتی حیساب بكرێت، كە بە هیچ شێوەیەك تاكەكەسێك تەنانەت بەرپرسێكیش تەمسیلی سیاسەتی گشتیی پارتی ناكات".

سەبارەت بە پرسی بەشداریی كورد لە حكوومەتی نوێی عێراق، كاتێك كورد (مالیكی) گۆڕییەوە بە (عەبادی) و دەنگی بە حكوومەتەكەی دا، لە سێ مانگی داهاتوودا چیی چاوەڕوان دەكرێ و چییش ڕوو دەدات، سكرتێری مەكتەبی سیاسیی پارتی باوەڕی وایە، "گۆڕینی (مالیكی) ڕەنگە زەرەرێك بێ بۆ ناوبراو و دەستكەوتێكی مەعنەوییش بێت بۆ كورد، بە تایبەت بۆ (سەرۆك بارزانی)، كە پێداگریی كرد لەسەر ئەوەی نابێ (مالیكی) بۆ جاری سێییەم ببێتەوە بە سەرۆكوەزیرانی عێراق، ئەمەیە گرفتی ئێمە لەگەڵ عەرەب، قەدەری ئێمە وابوو كە لەگەڵ میللەتێكی دیكە نەژیاین كە لەگەڵ ڕەوتی پێشكەوتن و سەردەمدا بێت، بە شێوەیەك بەرامبەر میللەتێكی دیكەی جیاواز بڵێ، ئەمانیش مافی خۆیانە وەكو ئێمە بژین و مومارەسەی ماف و ئەركی خۆیان بكەن و بە زمانی خۆیان بخوێنن. ئەمە لە لایەك، لە لایەكی دیكەوە كەسێك بۆ كەسێكی دیكە جیاوازیی هەیە، من لەگەڵ برا عەرەبەكانیش بە شیعە و بە سوننەوە بەم شێوەیە ڕای خۆم گوتووە كە كێشەی ئێمە، كێشەی كەسەكان نییە، كێشەی حكوومەتەكانیش نییە، بەڵكو كێشەی ئێمە، كێشەی عەقڵییەتی عەرەبە، كە تا ئێستا سەرباری هەموو بانگەشەیەك، گوایە لە ڕووی فیكری و سیاسی و تەكنۆ‌لۆژیا و خوێندنی باڵا و پەروەردەوە پێشكەوتنیان بە دەست هێناوە، كەچی لە نێو خودی وڵاتانی عەرەبیدا هێشتا بابەتی قبووڵكردنی خەڵكی تر لە دەرگای مێشكی ئەوانی نەداوە، لە خۆ كەمتر بینینی خەڵكی دی ئێستایش دروشمی گەورەی ئەوانە، ئەمەیە گرفتی ئێمە لەگەڵ عەرەب، قەدەری ئێمە وابوو كە لە گەڵ میللەتێكی دیكە نەژیاین كە لەگەڵ ڕەوتی پێشكەوتن و سەردەمدابێت، بە شێوەیەك بەرامبەر میللەتێكی دیكەی جیاواز بڵێ، ئەمانیش مافی خۆیانە وەكو ئێمە بژین و مومارەسەی ماف و ئەركی خۆیان بكەن و بە زمانی خۆیان بخوێنن، بەختی میللەتی كوردیش وابووە، بۆ ئەوەی بە زمانی خۆی بخوێنێت دەبێ هەزار شەهید بدات، تا قایمقام و بەڕێوەبەری ناحییە لە تۆی كورد بێت دەبێ هەزار شەهید بدەیت، تا پارێزگار و وەزیرێك دادەنێیت هەزار شەهید بدەیت، تا فیدڕاڵییەت وەردەگریت دەبێ بیست هەزار شەهید بدەیت، كە باسی دەوڵەتی كوردیش بكەیت بە خیانەت و جوداخواز لە قەڵەم دەدرێیت و قیامەت هەڵدەستێ، كەواتە ئەمە مەسەلەی شەخس نییە و، عەقڵییەتە، ئەوەش بەدشانسیی ئێمەیە، ئەگەر لەگەڵ ئینگلیز یا وڵاتێكی ئەورووپا ژیاباین، شتێكی دی بوو، بەڵام ئەو وڵاتانەی كە ئێمەیان بەسەردا دابەش كراوە، بەم عەقڵییەتە مامەڵە لەگەڵ كورد دەكەن".

(میرانی) زیاتر گوتی، "(مالیكی و عەبادی) هەردووكیان لە یەك مەدرەسە و یەك حیزب و یەك مەزهەبن، بەڵام بارودۆخی مانەوەی (مالیكی) لە حوكمڕانی لەگەڵ دۆخی (ئاغای عەبادی) جیاوازە."
دەربارەی پێكنەهاتن و دواخستنی دیاریكردنی وەزیرەكانیش، رایگەیاند، "ئێمە دەمانەوێت لە دابەشكردنی وەزیرەكان لە بەغدا یەكڕیزیی نێو ماڵی كورد ڕەنگ بداتەوە و ئەولەوییەتمان پاراستنی یەكڕیزیی لایەنە كوردستانییەكانە، بۆیە وەك چۆن وەزیرمان بۆ پارتی دەوێت، بۆ یەكێتی و گۆڕان و یەكگرتوو و كۆمەڵیش دەمانەوێت. بۆیە پارتی بەبێ هاوبەشە كوردستانییەكانی ناچێتە نێو هیچ حكوومەتێك لە بەغدا، ناكرێ من وەزارەت وەربگرم و گۆڕان و یەكگرتوو و كۆمەڵ بێبەش بن، با وەزارەتمان نەبێ، بەڵام یەكگرتووییمان هەبێ."
دەربارەی ئەوەیش كە ئەگەر بەپێی خاڵبەندی بێت وەزارەتەكان چۆن دابەش دەبن، گوتی، "ئەگەر بە پێی خاڵبەندی بێت، یەكێتی هەقی خۆی وەرگرتووە و وەزارەتی بەرناكەوێت، چونكە سەرۆككۆماریی وەرگرتووە، سەرۆككۆمار نزیكەی سی و دوو خاڵی دەوێت، بۆیە ئەگەر بە خاڵ بێت تەنیا پارتی مەغدوورە، بەڵام لە بەرانبەر پاراستنی یەكڕیزیی كورد با پارتی مەغدوور بێت باشترە، چی تێدایە با وەزیرێك بۆ گۆڕان بێت، ئێمە نایكەینە منەت، بەڵام پێویستە بۆ یەكڕیزیی نێوخۆمان بەرگری لە مافی هەموو لایەنەكان بكەین."

لە وەڵامی ئەو پرسیارەیشدا كە، ئێوە بەشداریی حكوومەتتان كرد و چوونەوە بەغدا، لەمەودوا وەك پارتی بە چ ئاڕاستەیەك كار دەكەن، پێشتر باسی ڕیفراندۆم و زەوینەسازیتان دەكرد بۆ بڕیاردان لە مافی چارەنووس، ئەمە چی لێ هات، كاڵ بووەتەوە؟
(میرانی) دەڵێ، "هیچ یاسایەك نییە ڕێ لە ڕیفراندۆم و مافی بڕیاردانی چارەنووسی میللەتێك بگرێت، بەڵام ڕیفراندۆم لەسەر چی و ئەنجامەكەی چی دەبێت، ئەوە زۆر گرنگە. پارتییش نەیگوتووە، ئەگەر ڕیفراندۆم كرا لە ماوەی بیست و چوار كاتژمێردا، یان دوای ئەو سێ مانگە دەوڵەتی سەربەخۆیی ڕادەگەیەنین، (سەرۆك بارزانی) و پارتییش ئەوەیان نەگوتووە." زیاتر ڕوونی كردەوە، "(سەرۆك بارزانی) پێی باشە ئێمە ڕیفراندۆمێك بكەین، بۆ ئەوەی ڕای میللەتەكەی خۆمان بزانین.
هەر هەنگاوێك كە كورد بینێ و بە دڵی عەرەب و فارس و تورك نەبێت، ئەوان لێی بەرپرسیارن نەك ئێمەی كورد، چونكە ئەركی ئەوانە وەكو حوكمڕان و دەوڵەتمەداری تەشویقی كورد بكەن داوای جیابوونەوە نەكات."

دەربارەی پەیوەندییەكانی پارتی و یەكێتییش كە بۆچی لەم ماوەیەدا‌ هەردوو لا ناڕازین، گوتی، "من هەوڵم داوە و هەوڵیش دەدەم پەیوەندییەكانی پارتی و یەكێتی بپارێزم، لەبەر ئەوە، من نە پێت دەڵێم، بڕۆ پرسیار لە یەكێتی بكە بزانە بۆ گلەییان لە پارتی هەیە، نە منیش گلەییەكانی خۆم لەسەر لاپەڕەی ڕۆژنامەكان دەنووسم، من ڕای خۆم لە نێو كۆبوونەوەی دووقۆڵیی هەردوو مەكتەبی سیاسی دەڵێم."
گوتیشی، "ئێمە و یەكێتی شەریكی یەكین، هاوبەشی وڵات و پەرلەمان و حكوومەتین، شەریكی ڕابردوو و ئێستاین و بە تەئكید شەریكی ئایندەیش دەبینەوە، بەڵام ئەم شەراكەتییە شتێكی لێ كەمە، ئەویش برایەتییە، هەقە برای یەكتریش بین."
جەختیشی كردەوە كە، "شەراكەتەكە مەوجوودە، لێ برایەتییەكە كەلێنێكی تێكەوتووە"، هاوكات هەردوو لایەنی بە هۆكاری دروستبوونی ئەو كەلێنە ناو بردن.